- केन्द्रीय प्रतिनिधिलाई सम्बन्धित प्रदेशभित्रका जिल्लामा पार्टीको अवस्था बुझ्न र आवश्यक विषयमा केन्द्रीय तहमा समन्वय गर्न कांग्रेसको निर्देशन
- समानुपातिक मत आफ्नो पक्षमा पार्ने रणनीतिका साथ उपसभापति डोलप्रसाद अर्यालको संयोजकत्वमा देशभर प्रतिनिधि खटाउँदै रास्वपा
- निर्वाचन परिचालनको प्रभावकारी अनुगमनका लागि भन्दै नेकपाले खटायो देशभर नेता
काठमाडौं- आगामी फागुन २१ मा हुन लागेको प्रतिनिधिसभा सदस्य निर्वाचनका लागि दलहरुले धमाधम निर्वाचन प्रतिनिधि खटाउन थालेका छन् । निर्वाचन मिति नजिकिएसँगै परिणाम आफ्नो पक्षमा पार्न दलहरुले देशभर निर्वाचन प्रतिनिधि खटाउन थालेका हुन् ।
यसरी प्रतिनिधि खटाउनेमा नेपाली कांग्रेस, नेपाली कम्युनिस्ट पार्टी (नेकपा), राष्ट्रिय स्वतन्त्र पार्टी (रास्वपा) लगायतका दल छन् । नेकपा एमालेले भने अहिलेसम्म प्रतिनिधि खटाउने निर्णय गरेको छैन । कांग्रेसले मंगलबार निर्वाचनलाई लक्षित गर्दै सातवटै प्रदेशमा केन्द्रीय प्रतिनिधि खटाएको छ । उपसभापति विश्वप्रकाश शर्माको नेतृत्वमा रहेकोे ‘निर्वाचन परिचालन समिति’ले सातवटै प्रदेशमा पार्टीको अवस्था बुझ्न नेताहरूलाई खटाएको हो । कांग्रेस प्रवक्ता देवराज चालिसेका अनुसार पार्टीले तोकेका केन्द्रीय प्रतिनिधिले सम्बन्धित प्रदेशभित्रका जिल्लामा पार्टीको अवस्था बुझ्ने र आवश्यक विषयमा केन्द्रीय तहमा समन्वय गर्ने छन् ।
उनका अनुसार कांग्रेसले कोशी प्रदेशका ताप्लेजुङ, इलाम, पाँचथर र झापा जिल्लामा सहमहामन्त्री डा. डीला संग्रौलालाई खटाएको छ । कोशीमा संग्रौलासँगै निवर्तमान सहमहामन्त्री भिष्मराज आङ्देम्बे, सुधीरकुमार शिवाकोटी र सुरेश सुब्बालाई खटाइएको छ । कोशीका संखुवासभा, तेह्रथुम भोजपुर, धनकुटा, मोरङ र सुनसरीमा नेताहरु अमृत अर्याल, मीन विश्वकर्मा, तारामान गुरुङ र उमेशजंग रायमाझी खटिएका छन् । सोलुखुम्बु, खोटाङ, ओखलढुंगा, उदयपुर, सिराहा र सप्तरीमा बसन्त भट्टराई, नगेन्द्र कुमाल, प्रमिला राई र धर्म नेपाली दर्जी खटिएका छन् ।
यसैगरी बागमती प्रदेशका धादिङ, रसुवा, नुवाकोट र काठमाडौंका लागि बहादुरसिंह लामाको नेतृत्वमा डा. केदारनरसिंह केसी, राजेन्द्रकुमार केसी, प्रतिमा गौतम, जीतनारायण श्रेष्ठ र डा. अमिता प्रधानलाई जिम्मेवारी दिइएको छ । काभ्रेपलाञ्चोक, सिन्धुली, ललितपुर र मकवानपुरमा जीपछिरिङ लामा, हरिशरण नेपाली, उर्मिला थपलिया, उमा दाहाल र गीता सत्याललाई खटाइएको छ ।
भक्तपुर, दोलखा, रामेछाप, सिन्धुपाल्चोक र चितवनमा अर्जुननरसिंह केसी, दिलमान पाख्रिन, धना खतिवडा, मधुराप्रसाद घिमिरे र धर्मराज गौतम खटिएका छन् ।
यस्तै गण्डकी प्रदेशका पर्वत, म्याग्दी, मुस्ताड र बागलुङका लागि चीनकाजी श्रेष्ठ, मनकुमारी गुरुड, कृष्णबहादुर केसी र चिनु पोखरेल खटिएका छन् । स्याङ्जा, कास्की, मनाङ र नवलपुरका लागि ध्रुव वाग्ले, जगदीशचन्द्र उपाध्याय, मनकुमारी गुरुङ, किरणराज शर्मा पौडेल खटिएका छन् । यस्तै गोरखा, लमजुङ र तनहुँका लागि अब्दुल सत्तार, रेशम बानियाँ, शारदा पौडेल र सरस्वती अर्याल तिवारी खटिएका छन् ।
लुम्बनी प्रदेशका रुपन्देही, पाल्पा, नवलपरासी र गुल्मीका लागि डा गोपाल दहित, गहेन्द्र गिरी, प्रदीप शर्मा र राजेन्द्रगोपाल सिंह खटिएका छन् । कपिलवस्तु, अर्घाखाँची, रूकुमपूर्व, प्यूठान र रोल्पाका लागि कृष्णकिशोर घिमिरे, मैकुलाल वाल्मिकी, छन्दबहादुर पहराई र केशव आचार्य रहेका छन् । दाङ, बाँके र बर्दियाका लागि चन्द्रबहादुर केसी, कमलप्रसाद भुसाल राधेश्याम पाठक र रंगमती शाही खटिएका छन् ।
यस्तै सुदूरपश्चिम प्रदेशको कन्चनपुर, बैतडी, दार्चुला र बझाङका लागि हिमबहादुर रावल, निपा चोख्पाल र विद्यादेवी तिमिल्सिना खटिएका छन् । कैलाली र डडेलधुराका लागि जगतप्रसाद जोशी, सुनिता राना, डा. रणबहादुर रावल र नृपबहादुर वड खटिएका छन् । डोटी, अछाम र बाजुराका लागि नरेन्द्र भट्ट, सम्झना खत्री र सुशीला मिश्र भट्ट खटिएको कांग्रेस निर्वाचन परिचालन समितिले जानकारी दिएको छ ।
नेकपाले निर्वाचन परिचालनको प्रभावकारिता अनुगमन गर्ने
नेपाली कम्युनिस्ट पार्टी (नेकपा)ले सोमबार नै निर्वाचन परिचालनको प्रभावकारी अनुगमनका लागि भन्दै नेताहरुलाई खटाउने निर्णय गरेको छ । नेकपाको निर्वाचन परिचालन समितिको सचिवालयको बैठकले अनुगमनका लागि प्रदेशगत जिम्मेवारी तोकेको हो । नेकपाले कोशी प्रदेशमा बेदुराम भुसाल, मधेस प्रदेशमा अग्नि सापकोटा, बागमती प्रदेशमा राजेन्द्र श्रेष्ठ, गण्डकी प्रदेशमा देव गुरुङ, लुम्बिनी प्रदेशमा पम्फा भुसाल, कर्णाली प्रदेशमा प्रमेश हमाल र सुदूरपश्चिम प्रदेशमा रञ्जिता श्रेष्ठलाई जिम्मेवारी दिएको छ ।
त्यसैगरी, निर्वाचनका लागि अपिल छिट्टै सार्वजनिक गर्ने र घोषणापत्रलाई परिमार्जन गरी प्रकाशन गर्ने निर्णय पनि बैठकले गरेको नेकपा नेता अग्नि सापकोटाले जानकारी दिए । प्रचारप्रसार कार्यलाई व्यवस्थित बनाउन सापकोटाको नेतृत्वमा जगतनाथ खतिवडा र गोविन्द आचार्य सदस्य रहेको केन्द्रीय प्रचार समिति गठन गरिएको छ ।
५१ नेता खटाउँदै रास्वपा
राष्ट्रिय स्वतन्त्र पार्टी (रास्वपा) ले पार्टीका उपसभापति डोलप्रसाद अर्यालको संयोजत्वमा ५१ सदस्यीय संघीय निर्वाचन सम्पादन समिति गठन गरेको छ । पार्टीका प्रवक्ता मनिष झाका अनुसार निर्वाचनलक्षित गतिविधिहरु सञ्चालन गर्न केन्द्रीय समितिको निर्णयानुसार समिति गठन गरिएको हो । समितिको सदस्यसचिवमा शंकर श्रेष्ठ रहेका छन् । यो समितिले विशेषगरी समानुपातिक मत तान्न ध्यान दिने र प्रत्यक्ष क्षेत्रमा उम्मेदवारहरु नै खटिने प्रवक्ता झाले बताए । ‘सम्बन्धित क्षेत्रका उम्मेदवारहरु प्रत्यक्ष क्षेत्रमा खट्ने नै भए । उपसभापतिको नेतृत्वमा गठन भएको समितिले समानुपातिक मतमा ध्यान दिने छ,’ झाले भने ।
रास्वपाले कोशीमा उपेन्द्र पाण्डेको नेतृत्वमा लक्ष्मी बर्देवा, ओमनाथ भण्डारी, चन्द्रशेखर सापकोटा, पुस्कर थापा, निरज गौली, रामकुमार थपलियालाई खटाएको छ । मधेसमा नमिता यादवको नेतृत्वमा महमद अयुब, हेमराज पोखरेल, यम श्रेष्ठ, प्रदिप तिमल्सेना, मानबहादुर लामा, बागमतीमा सरिता ज्ञवालीको नेतृत्वमा अरनिको पाँडे, सुरज प्रधान, लव विष्ट, प्रकाश आचार्य, दीपक विश्वकर्मा र सुमनविक्रम पाण्डेलाई खटाएको छ ।
गण्डकीमा तोयाराज अधिकारीको नेतृत्वमा प्रदीप पाण्डे, गोकुल सापकोटा, हरि जोशी, कृष्णमान श्रेष्ठ, प्रमिला शर्मा भुसाल र नवराज पुडासैनीलाई खटाएको छ । यता लुम्बिनीमा अर्जुन अधिकारीको नेतृत्वमा इश्रामुल्ला मिया, होम क्षेत्री, गोपाल घिमिरे, महेन्द्र गुप्ता, कल्पना पाण्डे र हरिप्रसाद रिजाललाई जिम्मेवारी तोकेको छ । कर्णालीमा श्यामबाबु गौतमको नेतृत्वमा प्रभात अधिकारी, गणेशदत्त देवकोटा, शंकर ढकाल, सुशील अधिकारी र साजन विकलाई खटाएको छ ।
सुदूरपश्चिममा डा. कृष्ण भेटवालको नेतृत्वमा लक्ष्मण थारु, खेमराज साउद, शिवराज पन्त, कविन्द्र ठकुल्ला, कृष्ण न्यौपाने र जमुना शर्मालाई खटाएको छ । नेकपा एमालेले भने प्रदेशगतरुपमा यसरी प्रतिनिधि खटाउने कुनै निर्णय गरिनसकेको पार्टीका प्रचार विभाग संयोजक मीनबहादुर शाहीले बताए । उनले प्रतिनिधि खटाउनेबारे अर्को बैठकमा छलफल हुने बताए । ‘पार्टीले प्रतिनिधि खटाउने विषयमा कुनै निर्णय गरेको छैन । फागुन ४ गतेबाट औपचारिक सभा हुन्छ । केही दिनमा पार्टीले खटाउँला,’ शाहीले भने ।
