- भदौ २३ र भदौ २४ लाई फरक तरिकाले विश्लेषण गरेर भदौ २४ गतेको दोष विद्रोही पक्षधरलाई लगाउने एमाले रणनीति, विध्वंसको विरोधमा मतदाताले आफूलाई मत जाहेर गर्ने आशा
- जेन-जी विद्रोहले मागेको नेतृत्व परिवर्तनको मुद्दालाई विशेष महाधिवेशनमार्फत सम्बोधन गरेको र जेन-जी विद्रोहपछि सबैभन्दा नयाँ पार्टी नै नेपाली कांग्रेस बनेको दाबी
- देशलाई सही दिशामा नपुर्याएसम्म विश्राम नलिने नेकपाका संयोजक दाहालको उद्घोष
हामी घोषणापत्रमा सबैको सुझाव समेट्छौं । छलफल चलाइरहेका छौैं । हामीले स्थिरता चाहिन्छ भनेको आर्थिक विकासकै लागि हो । जनतालाई चित्त बुझ्नेगरी ल्याउँछौं ।
प्रदीप पौडेल
महामन्त्री, कांग्रेस
काठमाडौं- ललितपुर सैंबुका मानबहादुर रावत यसपटक नयाँ दललाई मत दिनुपर्ने बताउँछन् । ७५ वर्षे रावत ललितपुर क्षेत्र ३ का मतदाता हुन् । पुराना दलले सुशासन कायम गर्न नसकेको बताउँदै उनी यसपटक नयाँ दलका उम्मेदवारलाई मत दिने पक्षमा छन् । ‘नयाँ दलले केही गरेनन् । उनीहरु भ्रष्टाचारको वरपर घुमिरहे । त्यसैले नयाँ दललाई यो चोटि मौका दिने विचार गरेको छु,’ रावतले भने ।
रावतझैं काठमाडौं ४ का मतदाता बताउने लुना सुवेदी पनि यसपालि नयाँ दलतिर आकर्षित देखिइन् । फागुन २१ गते हुने प्रतिनिधिसभाको निर्वाचनमा धेरैले नयाँ अनुहार र नयाँ दललाई रोज्ने देखिएको ६० वर्षीया सुवेदी बताउँछिन् । ‘यो पालि सबैतिर नयाँ दलको चर्चा देखिन्छ । सडकदेखि सामाजिक सञ्जालमा नयाँ-नयाँ भन्दै छन्,’ उनी भन्छिन्, ‘यो लहरले सबैलाई तानिने हो कि जस्तो लाग्छ ।’
कतिपयले केही पनि भएन भन्ने एकतर्फी भाष्य निर्माण गर्न खोजिरहेका छन्, जुन सरासर गलत हो । हामीमध्ये धेरैले १० वर्ष अघिको नेपालको पूर्वाधार अवस्था देखेका छौं ।
डा. राजन भट्टराई
सचिव, नेकपा एमाले
युवा पुस्ता भदौ २३ र २४ को विद्रोहपछि युवा उम्मेदवारतिर आकर्षित देखिन्छ । युवामात्र नभएर अहिले प्रौढ पुस्ताले पनि जेन-जी विद्रोहबाट जन्मिएका नयाँ दल र नयाँ उम्मेदवारलाई मौका दिनुपर्ने मत राख्छन् । जेन-जी विद्रोहको मुद्दालाई राष्ट्रिय स्वतन्त्र पार्टी (रास्वपा)ले झण्डै एकल मुद्दा बनाएको देखिन्छ । यो विद्रोहमा अग्रपंक्तिमा देखिएका युवालाई रास्वपाले विभिन्न क्षेत्रमा उम्मेदवार बनाएका छन् ।
जेन-जी विद्रोहअघि सरकारको नेतृत्व गरिरहेका तत्कालीन प्रधानमन्त्री केपी शर्मा ओलीको निर्वाचन क्षेत्र झापा-५ मा रास्वपाले बालेन्द्र (बालेन) शाहलाई प्रतिस्पर्धी बनाएको छ । काठमाडौं महानगरका मेयर रहँदा बालेनलाई युवाहरुले अनुमोदन गरेको देखिन्छ । बालेन अहिले पूर्वबाट पश्चिमसम्म चुनावी अभियानमा पुगेर काठमाडौं फर्किसकेका छन् । बालेनप्रति ‘क्रेज’ देखिएसँगै पुराना दल विशेष गरी नेपाली कांग्रेस, नेकपा एमाले र नेपाली कम्युनिस्ट पार्टीले आफूप्रति ‘थ्रेट’ महसुस गरेको देखिन्छ ।
नेपाली अर्थतन्त्र उत्पादन मुखी बनाउन हामीले जोड दिएका छौं । आत्मनिर्भर बनाउन हामीले उत्पादन बढाउन सहकारी र सार्वजनिक क्षेत्रलाई जोड दिएको छौं ।
देव गुरुङ
नेता, नेकपा
सबैभन्दा बढी त एमाले अध्यक्ष ओलीले । उनले बालेनलाई ‘बतासे अण्डा’को संज्ञा दिँदा आफूसँग निर्वाचनमा केही गर्न नसकिने दाबी शनिबार गरे । ‘मेरै ठाउँमा पनि केही ठुटे सिङ लिएर पुगेका छन् सिंगौरी खेल्न । मैले धेरै केही भन्नु पर्दैन । अण्डा दुई प्रकारका हुन्छन्, एउटा बतासे, एउटा साँच्चैको । बतासे अण्डाबाट चल्ला निक्लिँदैन । बतासे अण्डाहरुबाट कुनै चल्ला निस्किनेवाला छैन,’ ओलीले भने ।
ओलीले यसो भने पनि यो निर्वाचन हुन नसक्नेतिर इंगित गर्न पनि छाडेनन् । ओलीले सामाजिक सञ्जालमा नयाँ दलप्रति देखिएको क्रेजतिर संकेत गर्दै भने, ‘आगो बाल्न जानेको छ, देश बिगार्न जानेको छ, भड्काउन जानेको छ, तोडफोड गर्न जानेको छ, लुटपाट गर्न जानेको छ । यस्ता कुराहरुलाई क्रान्ति भनेर महिमा गाइएको छ । र, अरुमाथि विभिन्न प्रकारको आरोप लगाएको छ । यी आकासेखेती हुन् । यिनीहरु जनतासम्म पुगेका छैनन् । कहाँबाट कसले खेलाएका हुन् थाहा छैन । एउटा मोबाइल भन्ने भाँडो छ, त्यही भाँडाबाट देशमा हुडलो मच्चाएको छ ।’
यतिमात्र हैन उनले संसद् पुनस्र्थापनाका मुद्दा पर्दा पनि अदालत नबोलेकोमा अचम्म मानेका छन् । ‘हामीले संसद् पुनस्र्थापनाको माग गरिरहेका छौं । संविधान मिचिएको छ भनिरहेका छौं । अदालतले यसमा बोल्नुपर्छ,’ ओलीले भनेका छन् । ओलीले बाहिर यसो भन्दै गर्दा चुनावी तयारीमा भने रणनीति बनाएरै लागेको उनी निकट नेताहरु बताउँछन् ।
एमाले अहिले पार्टी छाडेर नेपाली कम्युनिस्ट पार्टी (नेकपा)तिर लागेका नेताहरु फकाउन लागिपरेको उनीहरु बताउँछन् । ‘बाहिर पार्टी अध्यक्षले चुनावको विरोध गरेको देखिए पनि भित्री रुपमा एमाले परिपक्व तरिकाले नतिजा आफ्नोपक्षमा पार्ने रणनीति बनाउन लागिपरेको छ । सुरुआती चरणमा पार्टी छाडेर नेकपातिर लागेका नेताहरुलाई फकाएर मत आफूतिर पार्ने तयारी छ,’ एमालेका ती नेताले भने । यतिमात्र हैन जेन-जी विद्रोहमा सबै पार्टी एकातिर हुँदा एमाले भने एक्लो रक्षात्मक बनेर उभिएको छ । एमालेले भदौ २३ मा र भदौ २४ लाई फरक तरिकाले विश्लेषण गरेर भदौ २४ गतेको दोष विद्रोह पक्षधरलाई लगाउने तयारीमा देखिन्छ । यसले भदौ २४ गते भएको विध्वंसको विरोधमा मतदाताले आफूलाई मत जाहेर गर्ने एमालेको आशा देखिन्छ ।
एमाले सचिव डा. राजन भट्टराई पार्टीले घोषणापत्रमार्फत पनि मतदातालाई आकार्षित गर्ने बताउँछन् । ‘कतिपयले केही पनि भएन भन्ने एकतर्फी भाष्य निर्माण गर्न खोजिरहेका छन्, जुन सरासर गलत हो । हामीमध्ये धेरैले १० वर्ष अघिको नेपालको पूर्वाधार अवस्था देखेका छौं । राजनीतिक अस्थिरताका बाबजुद पूर्वाधार क्षेत्रमा उल्लेखनीय प्रगति भएको छ- सडक, खानेपानी, विद्युत्, सञ्चारजस्ता आधारभूत सेवा विस्तार भएका छन्,’ भट्टराईले आइतबार एक कार्यक्रममा भने ।
यद्यपि, अहिलेको प्राथमिकता आर्थिक सुशासन भएको र लगानीको वातावरण बनाउनुपर्ने उनले बताए । ‘अहिलेको प्राथमिकता सुशासन र लगानीमैत्री वातावरण निर्माण हो । राजनीतिक स्थिरता नभएसम्म लगानीकर्ताले विश्वास गर्दैन । लगानीको सुरक्षा, प्रतिफलको सुनिश्चितता र कानुनी जटिलताको अन्त्य नगरी न आन्तरिक न वैदेशिक लगानी आकर्षित हुन्छ,’ उनले भने ।
यता नेपाली कांग्रेसले भने जेन-जी विद्रोहले मागेको नेतृत्व परिवर्तनको मुद्दालाई विशेष महाधिवेशनमार्फत सम्बोधन गरेको दाबी गरेको छ । ‘विद्रोहले नेतृत्व परिवर्तन गर्नु भनेको थियो । हामीले यो गरेका छौं,’ सभापति गगन थापाले भने, ‘जेन-जी विद्रोहपछि सबैभन्दा नयाँ पार्टी नै नेपाली कांग्रेस बनेको छ ।’
थापाको नेतृत्वमा अघि बढेको कांग्रेसले मधेस जोड्नेगरी नयाँ ‘भिजन’ ल्याउने तयारी गरेको छ । सभापति थापालाई प्रधानमन्त्रीको उम्मेदवारको रुपमा अघि सार्दै कांग्रेसले ‘भिजन-१०’ मार्फत मतदातालाई आफूतिर आकर्षित गरिरहेको छ । यतिमात्र हैन कांग्रेसले प्रत्यक्षमा १६५ मध्ये १०६ स्थानमा युवा उम्मेदवारहरुलाई मौका दिएको छ ।
कांग्रेसका महामन्त्री प्रदीप पौडेलले कांग्रेसले ‘१० बुँदामा घोषणापत्र’ ल्याउन लागेको र स्थिरतालाई प्रमुख मुद्दा बनाउने बताए । ‘हामीले घोषणापत्रमा राख्ने कन्टेन्टको विषयमा सबैसँग छलफल गरेर राख्नुपर्छ । हामी सबैको सुझाव समेट्छौं । छलफल चलाइरहेका छौैं,’ उनले भने, ‘हामीले स्थिरता चाहिन्छ भनेको आर्थिक विकासकै लागि हो । जनतालाई चित्त बुझ्नेगरी ल्याउँछौं । हामी भ्रष्टाचारमुक्त नेपाल बनाउन चाहन्छौं ।’
यसैगरी कांग्रेसले विशेष महाधिवेशनमा असन्तुष्ट रहेको पक्षलाई पनि मनाउने कोसिस गरिरहेको छ । यता विभिन्न वाम शक्तिसँग एकता गर्दै नेपाली कम्युनिस्ट पार्टी बनेको पुष्पकमल दाहाल नेतृत्वको दलले भने भावनात्मकरुपमा मत तान्ने प्रयास जारी राखेको छ । जेन-जी विद्रोहलाई समर्थन गरे पनि पछिल्लो समय कमजोर देखिएको यो दलका संयोजक पुष्पकमल दाहालले आइतबारमात्र भावनात्मक सन्देश जारी गरेका छन् ।
दाहालले आफू खलनायकका रुपमा इतिहासको पानामा हराउन आफू तयार नरहेको उल्लेख गर्दै देशलाई सही दिशामा नलगी राजनीतिबाट आराम नलिने उद्घोष गरेका छन्् । ‘यदि म धेरै अघि बिदा भएको भए सायद देशले मलाई नायकको रूपमामात्र सम्झिन्थ्यो होला । तर, म खलनायक बनेर इतिहासको पानामा हराउन चाहन्नँ । म यो देशलाई सही दिशामा नपुर्याएसम्म विश्राम लिने छैन । तपाईंहरूले मलाई आज कुन रूपमा देख्नुहुन्छ, यो तपाईंहरूको स्वतन्त्रता र अधिकारको कुरा हो । तर मेरो अभावमा मेरो उपस्थितिको महसुस तब हुने छ, जब तपाईंहरूले मैले कोरेका परिवर्तनहरूलाई भोग्नुहुने छ । म हार मान्न तयार छैन किनकि मेरो काम अझै सकिएको छैन,’ दाहालले भिडियो सन्देश जारी गर्दै भनेका छन् ।
नेकपाका नेता देव गुरुङले मतदाता आकर्षित गर्न सुशासनलाई पहिलो एजेण्डा बनाउने बताए । ‘नेपाली अर्थतन्त्र उत्पादन मुखी बनाउन हामीले जोड दिएका छौं । आत्मनिर्भर बनाउन हामीले उत्पादन बढाउन सहकारी र सार्वजनिक क्षेत्रलाई जोड दिएको छौं,’ गुरुङले भने । यद्यपि गुरुङले निर्वाचनको निष्पक्षतामाथि भने आशंका व्यक्त गरेका छन् । ‘निर्वाचनबाट प्रोक्सी दलहरु आउने त होइन भन्ने शंका छ,’ गुरुङले भने । विशेष महाधिवेशनअघि कांग्रेससँग तालमेलको प्रयासमा रहेको नेकपा अहिले एमालेसँग ‘सबै वाम, एक ठाम’ नीतिका साथ चुनावी गठबन्धनको गोप्य छलफलमा रहेकोसमेत बताइएको छ ।
नेपाली अर्थतन्त्र उत्पादन मुखी बनाउन हामीले जोड दिएका छौं । आत्मनिर्भर बनाउन हामीले उत्पादन बढाउन सहकारी र सार्वजनिक क्षेत्रलाई जोड दिएको छौं ।
देव गुरुङ
नेता, नेकपा
