खोटाङ- जन्तेढुङ्गा गाउँपालिका-५ चिसापानीस्थित चिसापानी बजारको सडक ढलानको काम तीव्रगतिमा अगाडि बढाइएको । जिल्लाको दक्षिणी क्षेत्रका स्थानीयको पुरानो तथा प्रमुख बजारमध्येमा पर्ने चिसापानी बजारको सडक ढलान हुने भएपछि लामो समय पश्चात मुहार फेर्न लागेको छ ।
गाउँपालिकाको केन्द्रमा पर्ने चिसापानी बजार क्षेत्रभित्रका सडक ढलानका लागि छुट्टाछुट्टै दुईवटा योजना बनाएर काम सुरु गरिएको छ । ठेक्का प्रणालीमार्फत सुरु गरिएको दुवै सडक ढलान योजनाको भौतिक प्रगति करिब ४० प्रतिशत सम्पन्न भएको गाउँपालिकाका प्रमुख इन्जिनियर रमेशकुमार यादवले जानकारी दिभएका छ ।
चिसापानी बजार ढलानका लागि भ्याटसहित एक करोड चार लाख ४२ हजार ३३ रुपैयाँ तथा गाउँपालिका जाने बाटो ढलानका लागि ५९ लाख १३ हजार ७३४ रुपैयाँ लागतमा ठेक्का लगाइएको छ । चिसापानी बजार ढलानको जिम्मा वियान्सा अग्रिम जेभीले लिएको छ भने, गाउँपालिका जाने बाटो ढलानको जिम्मा जेमपिया हिल्स कन्सट्रक्सन प्रालिले लिएको प्रमुख इन्जिनियर यादवले जानकारी दिएका छन् ।
चिसापानी बजार ढलानका लागि निर्माण कम्पनीसँग विसं २०८२ चैत- ३० गतेभित्र ढलानको काम सम्पन्न गर्नेगरी विसं २०८२ असो-५ गते ठेक्का सम्झौता गरिएको छ । यस्तै, गाउँपालिका जाने बाटो ढलानको काम विसं २०८२ चैत-१५ गतेभित्र सम्पन्न गर्नेगरी विसं २०८२ असोज-२६ गते सम्झौता गरिएको छ ।
चिसापानी बजार तथा गाउँपालिकाको कार्यालय जाने सडक ढलानको काम धमाधम भइरहेकाले सम्झौता मितिमै सम्पन्न हुने अवस्था देखिएको जन्तेढुङ्गा गाउँपालिका प्रमुख अरुणादेवी राईले बताएका छन् । “बजार ढलान नहुँदा ठूलो समस्या थियो । गुणस्तर निर्धारण गराउँदै समयमै काम सम्पन्न गराउन गाउँपालिकाको तर्फबाट निर्माण व्यवसायीमाथि खबरदारी गरिरहेका छौँ”, उनले भने, “सडक ढलानको काम सम्पन्न भएपछि चिसापानी बजार सफा र सुन्दर हुनेछ । यसमा स्थानीयवासीको पनि सहयोग र समर्थन आवश्यक छ ।”
बजार ढलानको क्रममा केही समयअघि स्थानीयवासी र निर्माण व्यवसायीबीच विवादसमेत भएको थियो । ढलानमा प्रयोग भएका समाग्री गुणस्तरहीन भएको भन्दै स्थानीयले आवाज उठाएपछि केही दिन कामसमेत रोकिएको थियो । स्थानीयको विरोधपछि अनुगमनमा गएका गाउँपालिकाका कर्मचारीमाथि हातपातसमेत भएको भन्दै कर्मचारीहरुले विज्ञप्ति निकालेर कारबाहीको माग गरेका थिए । निर्माण व्यवसायी र स्थानीयबीचको विवादमा कर्मचारीमाथि हातपात भएपछि सर्वपक्षीय भेलामा सहमति गराएर कामलाई निरन्तरता दिइएको गाउँपालिकाले जनाएको छ ।
बजार क्षेत्रभित्रको सडक साँघुरो रहेको र त्यसलाई फराकिलो बनाउनेक्रममा पनि विवाद भएको थियो । स्थानीयको अवरोधका कारण विवाद भएपछि गाउँपालिकाको तर्फबाट सबै समस्या समाधान गरेर काम सुरु गराइएको हो । हरेक हप्ताको शनिबार हटिया लाग्ने चिसापानी बजार क्षेत्रभित्रका सबै सडक ढलान हुने भएपछि स्थानीयसमेत हर्षित भएका छन् । साँघुरो ठाउँ तथा हिउँदमा धुलो र बर्सातमा हिलोका कारण समस्या झेल्दै आएका चिसापानी बजारका स्थानीय ढिलै भएपनि बजार ढलान हुने भएपछि हर्षित भएका हुन् ।
चिसापानी बजारस्थित बिपी चोकलाई केन्द्र मानेर चिसापानी माध्यमिक विद्यालय, गाउँपालिकाको कार्यालय तथा बसपार्क जाने छुट्टाछुट्टै तीनवटा सडक ढलानको काम सुरु गरिएको जनाइएको छ । दायाँबायाँ नाली निर्माण गरेर कम्तीमा चार मिटर चौडाइ सडकमा ढलान गर्नेगरी काम सुरु गरिएको योजना सम्पन्न भएपछि चिसापानी बजार क्षेत्रका सबै सडक ढलान हुने गाउँपालिकाले जनाएको छ ।
गाउँपालिकाले सङ्घीय सरकारसँगको लागत साझेदारीमा गत वर्षबाट चिसापानी बजारको सडक ढलानको काम सुरु गरेको गाउँपालिकाका उपप्रमुख खेमबहादुर खड्काले जानकारी दिए । गत वर्ष ४२ लाख ४२ हजार २१५ रुपैयाँ लागतमा भीमा कन्सट्रक्सन प्रालिले ठेक्का लिएर ११५ मिटर सडक ढलान गरेको थियो ।
