काठमाडौं– भारतमा मात्र होइन, नेपालमा पनि लकडाउन अन्त्य गरिएसँगै कोरोना संक्रमित ह्वातै बढेका छन् । भारतले लकडाउन खुकुलो गरेपछि त्यहाँ पछिल्लो समय दैनिक ५० हजारभन्दा बढी नयाँ संक्रमित भेटिन थालेका छन् । यस्तै, नेपालमा पनि झण्डै पाँच महिने लकडाउन अन्त्य गरिएसँगै दैनिक संक्रमित बढिरहेका छन् ।
पछिल्लो समय देशभर कोरोना संक्रमित बढ्दै गएको छ । त्यसमा पनि काठमाडौं उपत्यका कोरोनाको उच्च जोखिममा रहेको छ । आइतबारमात्रै उपत्यकामा थप ९२ जनामा संक्रमण पुष्टि भएको छ । सरकारले लकडाउन खुलाएसँगै सार्वजनिक यातायात र बजारमा भीडभाड बढेपछि उपत्यकामा कोरोनाको जोखिम बढेको हो ।
आइतबार थप ३८० जनामा कोरोना संक्रमण देखिएको छ । पछिल्लो २४ घण्टामा ८ हजार ५१५ जनाको पिसीआर परीक्षण गरिएकोमा ३८० मा कोरोना संक्रमण पुष्टि स्वास्थ्य तथा जनसंख्या मन्त्रालयले जनाएको हो । जसमध्ये ९२ जना काठमाडौं उपत्यकाका हुन् । योसँगै नेपालमा कोरोना संक्रमितको संख्या २२ हजार ९७२ पुगेको छ । आइतबार काठमाडौंमा ९० र ललितपुरमा दुई जनामा संक्रमण पुष्टि भएको मन्त्रालयले जनाएको छ ।
मन्त्रालयको नियमित पत्रकार सम्मेलनमा दिइएको जानकारीअनुसार आइतबार ४० जना कोरोना संक्रमणमुक्त भएर घर फर्किएका छन् । आइतबारसम्म कोरोना संक्रमणमुक्त भई घर फर्किनेको संख्या १६ हजार ३५३ रहेको छ ।
यस्तै, मुलुकभर क्वारेन्टिनमा ११ हजार ३८ जना रहेका छन् । हालसम्म ४ लाख ४३ हजार ८०४ जनाको पिसीआर परीक्षण गरिएको मन्त्रालयका प्रवक्ता डा जागेश्वर गौतमले जानकारी दिए ।
यस्तै, कोरोनाबाट नेपालमा थप दुई जनाको मृत्यु भएको छ । कास्कीको पोखरा महानगरपालिका–१९ का ६२ वर्षीय एक पुरुषको २४ साउनमा उपचारका क्रममा मृत्यु भएको थियो । उनीमा मधुमेहको समस्या रहेको बताइएको छ । यस्तै पर्साको वीरगञ्ज महानगरपालिका–२ का २० वर्षीया महिलाको २४ साउनमा मृत्यु भएको थियो । योसँगै नेपालमा आइतबारसम्म कोरोनाबाट मृत्यु हुनेको संख्या ७५ पुगेको छ ।
स्वास्थ्य मन्त्रालयका अनुसार आइतबार मुलुकभर ६ हजार ५४४ कोरोनाका सक्रिय संक्रमित रहेका छन् । प्रदेशगत रूपमा प्रदेश नं १ मा ५११, प्रदेश नं २ मा तीन हजार ७५, वाग्मती प्रदेशमा एक हजार १३२, गण्डकी प्रदेशमा २३७, प्रदेश नं ५ मा ४४६, कर्णाली प्रदेशमा १६९ र सुदूरपश्चिम प्रदेशमा ९७४ रहेका छन् ।
पछिल्लो विवरणअनुसार विश्वभर एक करोड ९८ लाख १७ हजार ५७४ जना कोरोनाका संक्रमित भएका छन् । हालसम्म ७ लाख २९ हजार ७४८ जनाको मृत्यु भइसकेको छ । एक करोड २७ लाख ५० हजार ३८४ जना निको भइसकेका छन् ।
नेपालमा कोरोनाको पीसीआर परीक्षण प्रति १० लाख जनसंख्यामा दुई दशमलव ७५ रहेको छ । संक्रमणबाट मुक्त हुने दर ७१ दशमलव एक रहेको छ । पाँच सयभन्दा बढी सक्रिय संक्रमित रहेका चार जिल्ला पर्सा, रौतहट, महोत्तरी र काठमाडौं छन् ।
७२ प्रतिशतले मात्रै माक्स प्रयोग गर्छन्
यसैबीच नेपालमा कोरोनाबाट बच्न ७२ प्रतिशतले मास्क लगाएको पाइएको छ । नेपाल स्वास्थ्य अनुसन्धान परिषद्ले गरेको एक अध्ययनअनुसार ७२ प्रतिशतले मात्रै सही तरिकाले मास्क लगाउने गरेको पाइएको छ । काठमाडौंका ३२ सार्वजनिक स्थलमा गरिएको अवलोकनमा अहिले पनि २७ प्रतिशतभन्दा बढीले मास्क राम्रोसँग लगाउँदैनन् ।
परिषद्का सदस्यसचिव प्रा डा प्रदीप ज्ञवालीले काठमाडौंका २३ सार्वजनिकस्थलमा गरिएको अध्ययनमा ७२ प्रतिशतले मात्रै सही तरिकाले मास्क लगाएको पाइएको जानकारी दिए । अध्ययनका क्रममा व्यक्तिले मास्क लगाएको, नलगाएको वा कस्तो प्रकारको मास्क लगाएको भनी चार हजार ५०२ जनामा गरिएको अवलोकनमा मास्क लगाउनेको संख्या ७२ दशमलव एक र मास्क नलगाउनेको संख्या २७ दशमलव एक प्रतिशत रहेको देखिएको छ । सार्वजनिकस्थलमा जम्मा दुई हजार ७०३ जनामा गरिएको अवलोकनमा सही तरिकाले मास्क लगाउने ७२ दशमलव ६६ प्रतिशत र मास्कको बेवास्ता गरी लगाउनको संख्या २७ दशमलव ३४ प्रतिशत रहेको पाइएको छ । मास्क लगाउनेमध्ये पनि कपडाको मास्क लगाउने १५ दशमलव आठ प्रतिशत रहेका छन् ।
