लिस्बन- पोर्चुगलको राजधानी लिस्बनस्थित रहेको नेपाली दूतावासले पोर्तोमा राहदानी नवीकरण तथा कागजात प्रमाणीकरण (कन्सुलर सेवा) सम्बन्धी दुईदिने घुम्ती शिविर सञ्चालन गर्ने भएको छ । दूतावासले यही जनवरी २४ र २५ तारिखका दिन पोर्तोको भिला नोभा दि गइयास्थित नमस्ते पोर्तो रेष्टुरेन्टको हलमा राहदानी नवीकरण तथा कागजात प्रमाणीकरण (कन्सुलर सेवा) सम्बन्धी दुईदिने घुम्ती शिविर सञ्चालन गर्ने भएको हो ।
राहदानी नवीकरण तथा प्रहरी चारित्रिक प्रमाणपत्र (प्रहरी रिपोर्ट) लगायतका कागजात प्रमाणीकरणसम्बन्धी समस्यामा परेका पोर्तो क्षेत्रका नेपालीलाई सोही स्थानमै सेवा उपलब्ध गराउने उद्देश्य अनुरुप शिविर सञ्चालन गर्न लागिएको दूतावासले जनाएको छ । दूतावासले टोली खटाएर पोर्तो सहरमा पहिलोपटक घुम्ती शिविर सञ्चालन गर्न लागेको हो ।
दूतावासको टोलीले राहदानीको म्याद सकिएका, हराएका, क्षति भएका तथा राहदानीको म्याद एक वर्षभन्दा कम भएकाहरूको विद्युतीय राहदानी (ई–पासपोर्ट) का लागि जैविक विवरणसहितको आवेदन संकलन गर्नेछ । साथै राहदानी नवीकरण, प्रहरी चारित्रिक प्रमाणपत्र प्रमाणीकरण, पारिवारिक कागजात प्रमाणीकरण, शैक्षिक प्रमाणपत्र प्रमाणीकरण, राहदानी वितरणलगायतका कन्सुलर सेवा प्रदान गर्ने दूतावासले जनाएको छ ।
राजधानी लिस्बनबाट टाढा रहेका नेपालीहरूलाई घुम्ती शिविरमार्फत सहज सेवा उपलब्ध गराउने योजनाअनुरुप पोर्तोमा शिविर सञ्चालन गर्न लागिएको पोर्चुगलका लागि नेपाली राजदूत प्रकाशमणि पौडेलले बताए । दूतावास धाउन टाढा भएकै कारण पोर्तो क्षेत्रमा रहेका नेपालीलाई राहदानी नवीकरणलगायतका कागजात प्रमाणीकरणमा समस्या नहोस् भन्ने उद्देश्यले टोली खटाएरै सेवा दिन लागिएको पौडेलले बताए ।
शिविरबाट राहदानी नवीकरण तथा कागजात प्रमाणीकरणलगायतका आवश्यक सेवा लिन पोर्तो क्षेत्रमा बसोबास गर्ने नेपालीलाई राजदूत पौडलले आग्रह समेत गरे । यसअघि दूतावासले पोर्चुगलको फारो र मदेइरामा घुम्ती शिविर सञ्चालन गरेर सो क्षेत्रमा बसोबास गर्ने नेपालीहरूलाई सेवा प्रदान गरेको थियो ।
