काठमाडौं– नेपाली कांग्रेसमा संस्थापनइतरका नेताहरु मंसिरमा जसरी पनि महाधिवेशन गर्नुपर्ने पक्षमा देखिन्थे । नियमित महाधिवेशन नभए विशेष महाधिवेशन हुनुपर्ने भन्दै जोडतोडले आवाजसमेत उठाएका थिए ।संस्थापनइतरकै नेताहरु डा. शेखर कोइराला, महामन्त्री गगन थापा यसको पक्षमा थिए । उनीहरुले नियमित महाधिवेशन मंसिरमै गराउन दबाब दिन हस्ताक्षरसमेत संकलन गरे । कांग्रेस केन्द्रीय समितिलाई दबाब दिएर पुसको २६ गतेबाट काठमाडौंमा गर्ने गरी १५औं महाधिवेशनको कार्यतालिका सार्वजनिक गर्न शेखर र गगन सफल पनि भए ।
अधिवेशन केही लम्बिन सक्छ । तर मैले सार्न खोजेको होइन, म त पुस २६ गते हुनुपर्छ भन्ने व्यक्ति हो ।
डा शेखर कोइराला
नेता, नेपाली कांग्रेस
तर यी दुवै नेता अहिले महाधिवेशन सर्ने भन्दै सार्वजनिकरुपमा बोल्न थालेका छन् । मंगलबार कांग्रेस नेता डा. कोइरालाले काठमाडौंमा आयोजित कार्यक्रममा सार्वजनिकरुपमै महाधिवेशन सर्ने बताए । ‘अधिवेशन केही लम्बिन सक्छ । तर मैले सार्न खोजेको होइन, म त पुस २६ गते हुनुपर्छ भन्ने व्यक्ति हो,’ उनले भने ।कांग्रेसको क्रियाशील सदस्यता वितरण र नवीकरणको काम तोकिएको समयमा नसकिएकोले महाधिवेशन सर्ने उनको भनाइ थियो । मंगलबार बसेको क्रियाशील सदस्यता व्यवस्थापन समितिको बैठक नवीकरणको समय पुस ९ गते मध्याह्न १२ बजेसम्म थपेको छ । यसअघि पुस मसान्तभित्र नवीकरण विवरण पठाइसक्ने समय तोकिएको थियो ।
क्रियाशील सदस्यता वितरणका लागि कांग्रेसले केन्द्रबाट पठाएका चार लाख फाराममा क्रम संख्या उल्लेख नगरेको पाइएपछि त्यसलाई लिएर विवादसमेत भयो । यो विषय लिएर शेखर सभापति शेरबहादुर देउवासँग भेट्न गएका थिए । त्यसपछि उक्त फारामको ठाउँमा नयाँ फाराम पठाइएको छ । ती फारामहरु जिल्ला जिल्लामा पुग्न ढिलाइ हुँदा कांग्रेस महाधिवेशन कार्यतालिका प्रभावित बन्न थालेको छ ।
कोइरालाले व्यंग्य गर्दै भने, ‘क्रियाशील सदस्य नयाँ थपिए । नयाँ क्रियाशील सदस्य बाँड्ने क्रममा देशभरि सिरियल नम्बर नभएको पठाउने त शेखर कोइराला होइन होला । अर्कैले पठाएको होला । मैले त थाहा पाएँ । थाहा पाएपछि चनाखो भएँ ।’ कोइरालाको व्यंग्य महामन्त्री थापातिर लक्षित थियो । महामन्त्री थापा कांग्रेस क्रियाशील व्यवस्थापन समितिका संयोजक हुन् ।
जुन तिथिमा हामीले वडाको अधिवेशन भनेका छौं, त्यसमा एक–दुई दिन तलमाथि होला, थोरै तलमाथि होला ।
गगन थापा
महामन्त्री, नेपाली कांग्रेस
उनै थापाले जिल्लाजिल्लामा पठाएका छ लाखमध्ये चार लाख फाराम क्रम संख्या नभएको भेटिएको हो । थापाले फर्जी काम गरेको आरोपसमेत शेखरले लगाए । यसै कारण महाधिवेशन धकेलिँदै गएको उनले आरोप लगाए । कांग्रेसको महाधिवेशनलाई लिएर सबैले सोध्दा कहिलेकाहीँ दिक्क लाग्नेसमेत शेखरले सुनाए । ‘कांग्रेस महाधिवेशनबारे सबैलाई किन चिन्ता लागेको हो मैले बुझेको छैन । एउटा पार्टीको अधिवेशन हुनु, पार्टीको अधिवेशन हो, निरन्तर चार÷चार वर्षमा हुनुपर्छ । भइरहन्छ भन्ने बुझ्नुस् । जसले पनि अधिवेशनको बारेमा सोध्छ । मलाई त दिक्क पनि लाग्छ कहिलेकाहीँ । आफ्नो तरिकाले जान्छ, किन चिन्ता गर्ने ?,’ कोइरालाले प्रश्न गरे ।
यता महामन्त्री थापाले पनि सोमबारमात्र महाधिवेशन सर्न सक्ने संकेत गरेका थिए । क्रियाशील सदस्यता व्यवस्थापनमा ढिलाइ हुने उल्लेख गर्दै थापाले भनेका थिए, ‘जुन मितिमा हामीले वडाको अधिवेशन भनेका छौं, त्यसमा एक–दुई दिन तलमाथि होला, थोरै तलमाथि होला ।’ तोकिएको मितिमा महाधिवेशन नभए विशेष महाधिवेशनमा अघि बढ्ने चेतावनी थापाको थियो । ‘कि नियमित अधिवेशन सरासर अगाडि बढ्छ कि विशेष महाधिवेशन हुन्छ । त्योभन्दा अर्को कुरा केही पनि छैन । अधिवेशन हुन्छ,’ थापाले भनेका थिए । संस्थापन पक्षले भने वैशाखको अन्तिममा मात्र महाधिवेशन गर्नुपर्ने कार्यतालिका पेस गरेको थियो । सार्वजनिक कार्यतालिका अनुसार कांग्रेसको वडा अधिवेशन पुस १६ गतेका लागि तोकिएको छ । गाउँ तथा नगर समितिदेखि जिल्लाहुँदै प्रदेश कार्यसमितिको अधिवेशन भएपछि महाधिवेशन हुन्छ । कांग्रेसको १५औं महाधिवेशन पुस २६ देखि २८ गतेसम्म गर्ने तय गरिएको छ ।
यो कार्यतालिकामा मुख्यगरी कांग्रेस नेताहरु विमलेन्द्र निधि र कृष्णप्रसाद सिटौलाले आपत्ति जनाएका थिए । तयारी नपुगेकाले पुसमा महाधिवेशन हुनै नसक्ने ठोकुवा उनीहरुले गरेका थिए । अहिले उनै नेताहरुको असहयोगका कारण महाधिवेशनको कार्यतालिका प्रभावित भएको गगनको आरोप छ । ‘जसले यो कार्यतालिकाको विरोध गरेका थिए, उहाँहरु नै अब अधिवेशन सर्छ सर्छ भनिरहनुभएको छ,’ थापाले भने ।
