काठमाडौं- नेपाली कम्युनिस्ट पार्टी (नेकपा) पाँचथरले प्रतिनिधिसभा सदस्य उम्मेदवार हर्कबहादुर नेम्बाङ ‘मिक्सो’लाई सिफारिस गरेको छ । नेम्बाङ पहिलोपटक संसदीय निर्वाचनमा उम्मेदवार बन्न लागेका हुन् ।
उनलाई संसदीय निर्वाचनमा पार्टीभित्र अवसर नपाएका नेताका रूपमा चिनिन्थे । उनै नेम्बाङलाई यसपटक भने पार्टीको जिल्ला कमिटीले उम्मेदवार सिफारिस गरेको हो ।उनी तत्कालीन नेकपा माओवादी केन्द्रको कोशी प्रदेश अध्यक्ष थिए । हाल नेकपाको एकता महाधिवेशन आयोजक समिति सदस्य हुन् ।
उनी बेदागी कम्युनिस्ट नेता हुन् । १० वर्षे माओवादी युद्धमा उनको प्रवेश जनमुक्ति सेनाबाट भएको थियो । थुप्रै मोर्चामा युद्ध लडेको उनको अनुभव छ । उनी युद्धका घाइते समेत हुन् । १५ भदौ २०५९ मा ओखलढुंगाको रुम्जाटार मोर्चामा उनी घाइते भए ।जनमुक्ति सेनामा छँदा उनी कम्पनी भिसीसम्म भए । त्यसपछि २०६० सालदेखि पार्टी संगठनमा उनी क्रियाशील रहे । २०६१ सालमा पार्टीको पाँचथर सचिव हुँदै इञ्चार्ज भए । २०६३ सालमा धनकुटा इञ्चार्ज भए । माओवादी पार्टी छँदा उनी पोलिटब्युरो सदस्य पनि भएका थिए ।
स्थानीय तह उपनिर्वाचन र स्वतन्त्र विद्यार्थी युनियनको गत निर्वाचनमा कोशी प्रदेशमा अनपेक्षित जित माओवादीले निकाल्दा नेम्बाङको नेतृत्व भूमिकालाई लिएर पार्टी अध्यक्ष पुष्पकमल दाहालले प्रशंसा गरेका थिए । उनको घर पाँचथरको लुङरुपा हो, जसलाई माओवादीको लालकिल्ला भन्ने गरिन्छ ।
