- पदाधिकारीमा ईश्वर पोखरेल नेतृत्वको प्यानलबाट गोकर्ण विष्ट (उपाध्यक्ष) र योगेश भट्टराई (उपमहासचिव) मात्र विजयी
- जेन–जी विद्रोहको माग थियो एमाले नेतृत्वबाट ओलीको बिदाइ तर ओलीले त्यो हुन दिएनन्, बरु आफूलाई जोगाउन र ओलीतन्त्रको रक्षामा ढाल बनेर उभिएका महेश बस्नेतलाई पनि सचिवमा सानदार जित दिलाए
- अध्यक्षमा ह्याट्रिक गरेसँगै बढ्यो ओलीको दम्भ, सरकारविरुद्ध आक्रामक अभिव्यक्ति
- जाँचबुझ आयोगमा बयान नदिने, एमाले नेतृत्वमाथि छोएको दिन देश ठप्प पार्ने चेतावनी, सरकार र जेन–जीबीचको सम्झौता पनि अस्वीकार
काठमाडौं– नेकपा एमालेमा निरन्तर राज गरिरहेका केपी शर्मा ओलीले यसपटक ‘अर्ली महाधिवेशन’ गराए । त्यो पनि इतर पक्षलाई प्यानलै निर्वाचन लड्ने मौका दिएर । चितवन महाधिवेशन सम्झनेहरुले यसलाई ओली अन्तरिक लोकतन्त्रमा खुल्न थालेको भन्दै प्रशंसा थाले । तर निर्वाचनको नतिजा र जितपछिको ओली अभिव्यक्ति सुन्दा एमालेमा परिवर्तनको कुनै छनक नदेखिएको प्रस्टै हुन्छ । पदाधिकारीमा निवर्तमान वरिष्ठ उपाध्यक्ष ईश्वर पोखरेलको नेतृत्वमा १९ जनाकै इतर उम्मेदवारी परेको थियो । तर उपाध्यक्षमा गोकर्ण विष्ट र उपमहासचिवमा योगेश भट्टराईले मात्र जित निकाल्न सके ।
बाँकी १७ जना पदाधिकारीमा ओलीकै वर्चश्व रहने भएको छ । यो भनेको ओलीको अनुदार प्रवृत्तिलाई अनुमोदन गर्नु हो । ओलीकै मनपरिका कारण भदौ २३ र २४ गते जेन–जी विद्रोह भएको थियो । जसका कारण सत्तामा रहेका ओली सडकमा पुगेका थिए ।जेन–जी विद्रोहको माग थियो एमाले नेतृत्वबाट ओलीको बिदाइ । तर ओलीले त्यो हुन दिएनन् । बरु महाधिवेशनबाट ‘ह्याट्रिक’ गरे । आफूलाई जोगाउन र ओलीतन्त्रको रक्षामा ढाल बनेर उभिएका महेश बस्नेतलाई पनि सचिवमा सानदार जित दिलाए ।
जेन–जी विद्रोहको प्रस्ट सन्देश एमाले बदलिनु भन्ने भए पनि प्रतिनिधिहरुले त्यो आवाज नसुनेको एमाले नेता उषाकिरण तिम्सेना बताउँछिन् । ‘पार्टीमा हामी बदलिनुपर्छ कि पर्दैन भन्ने विवाद थियो । महाधिवेशनले जे छ ठिकै छ भन्ने निर्णय दियो,’ तिम्सेनाले भनिन् । तिम्सेना एमालेभित्र प्रतिपक्षीका रुपमा चिनिएकी नेत्री हुन् । ओली प्रवृत्तिविरुद्ध खरो आवाज उठाउँदै आएकी उनले केन्द्रीय सदस्यमा उम्मेदवारी दिएकी थिइन् । तर तिम्सेना पराजित भइन् । ओलीको जितलाई एमालेकै नेताहरु अहंकारको अनुमोदन भएको बताउँछन् ।
अध्यक्षमा पुनः निर्वाचन हुनासाथ ओलीले दिएको अभिव्यक्तिबाट नै यो पुष्टि हुन्छ । सरकार र जेन–जीबीच भएको सम्झौतालाई इंगित गर्दै ओलीले भने, ‘यो सरकारसँग संविधानलाई चलाउने कुनै अधिकार छैन । सरकार र जेन–जीबीचको सम्झौता लागू हुन सक्दैन । एमालेले लागू हुन दिँदैन । कि चुनावको तयारी गर, नत्र बाटो लाग्दा हुन्छ ।’यतिमात्र हैन ओलीले जेन–जी विद्रोहको क्रममा भएको दमन र नरसंहारबारे बयानसमेत नदिने छाँट देखाएका छन् । आफूलाई छोएको दिन यो सरकार ढाल्ने ओलीले चेतावनी दिए । ‘नेकपा एमाले को नेतृत्वमाथि प्रचारको हल्लाले भएन ।
अब भौतिक हमलाद्वारा आक्रमण गर्ने अथवा जाली मुद्दा लगाउने पञ्चायतकालीन कूकर्महरूको फेरि थालनी गर्ने हल्ला मच्चाइएको छ । यो मिडिया ट्रायल यथार्थ हल्ला हुन सक्दछ,’ अध्यक्षमा विजयी भएर शपथ लिएलगत्तै ओलीले भने, ‘म तपाईंहरूलाई भन्न चाहन्छु एमाले नेतृत्वमाथि छोएको दिन देश ठप्प हुनुपर्छ । यो सरकार ढल्नुपर्छ । ढालिने छ यो सरकार ।’यसका लागि एमाले देशभरिबाट तयारी हालतमा बस्नुपर्नेसमेत उनले बताए । ‘संसारमा केही महँगो पथ्र्यो भने एमालेलाई छुनु महँगो पर्ने छ । यो कुराका लागि हामीले कुराले होइन कामले तयार हुनुपर्दछ । गरेर देखाउनुपर्दछ,’ ओलीले भने ।
अध्यक्षमा ओली, पदाधिकारीमा को–को आए ?
एमालेको ११औं महाधिवेशनले ओलीलाई पुनः अध्यक्षमा निर्वाचित गरेको छ । ओलीले एक हजार ६६३ मत पाउँदा प्रतिद्वन्द्वी ईश्वर पोखरेलले ५६४ मत पाएका छन् । केन्द्रीय निर्वाचन आयोगका अनुसार उपाध्यक्षमा पृथ्वीसुब्बा गुरुङले एक हजार ७३७ मत, विष्णुप्रसाद पौडेलले एक हजार ६७५ मत, रामबहादुर थापाले एक हजार ५१६ मत, गोकर्णराज विष्टले एक हजार ३६८ मत र रघुजी पन्तले एक हजार २५८ मत पाएर निर्वाचित भए ।
त्यसैगरी महासचिवमा ओली प्यानलकै शंकर पोखरेल एक हजार २२८ मत पाउँदै निर्वाचित भए । उनका प्रतिद्वन्द्वी सुरेन्द्र पाण्डेले ९९९ मत पाए । उपमहासचिवमा लेखराज भट्टले एक हजार ४५२, रघुवीर महासेठले एक हजार ३६८ र योगेश भट्टराई एक हजार ३४८ मत पाउँदै निर्वाचित भए ।
सचिवमा महेश बस्नेतले एक हजार ५४४, छविलाल विश्वकर्माले एक हजार ५०६, पद्माकुमारी अर्यालले एक हजार ५३०, शेरधन राईले एक हजार ५०३, हिक्मतकुमार कार्कीले एक हजार ३३७, खगराज अधिकारीले एक हजार ३३१, यमलाल कँडेलले एक हजार १८५, राजन भट्टराईले एक हजार १८१ र भानुभक्त ढकाल एक हजार १०८ मत पाउँदै निर्वाचित भए ।
४० मुनिका १५ जनामा को–को ?
एमालेको केन्द्रीय कमिटीमा युवा क्लस्टरबाट प्रतिनिधित्व गर्ने १५ जनामा खुलातर्फ दुई जना, भूगोलबाट आठ जना तथा समावेशीअन्तर्गत आदिवासी जनजातितर्फ दुई जना, मधेसीबाट तीन जना र दलितबाट दुई जना गरी ४० वर्ष मुनिका युवाको प्रतिनिधित्व भएको छ ।
केन्द्रीय सदस्यको खुला युवातर्फको दुई सिटमा नरेश रोकाया र सुशीलकुमार थापा निर्विरोध निर्वाचित भएका छन् । सातै प्रदेश र उपत्यका विशेष गरी भूगोलतर्फको युवा क्लस्टरमा कडा प्रतिस्पर्धा भएको थियो । यसमध्ये कोशी प्रदेशबाट क्षितिज थेबे, मधेस प्रदेशबाट इञ्जिनियर मोबिन आलम, बागमती प्रदेशबाट निशा अधिकारी, गण्डकी प्रदेशबाट नवराज ओझा, लुम्बिनी प्रदेशबाट लिलामणि गौतम, कर्णाली प्रदेशबाट रुद्रबहादुर शाही र सुदूरपश्चिम प्रदेशबाट गोविन्द गिरी र राजधानी विशेषबाट सुनिता डंगोल निर्वाचित भएका छन् ।
समावेशी क्लस्टरको पाँच जना युवामध्ये आदिवासी जनजाति युवातर्फ सम्राट गौचन र मनोज ताम्ली निर्वाचित भएका छन् । मधेसी युवातर्फ अमरकुमार यादव र रौनित शाह निर्वाचित भएका छन् । दलित युवातर्फ निता घतानी निर्वाचित भएका छन् ।
ओलीसहित १४ पदाधिकारी केन्द्रीय सदस्यमा पराजित
एमालेका १४ जना पदाधिकारी केन्द्रीय सदस्यमा पराजित भएका छन् । अध्यक्षमा निर्वाचित केपी शर्मा ओली केन्द्रीय सदस्यमा पराजित भए । त्यस्तै, उपाध्यक्ष विष्णु पौडेल, रामबहादुर थापा, महासचिवमा शंकर पोखरेल पनि केन्द्रीय सदस्यमा पराजित भए । उपमहासचिवमा लेखराज भट्ट, रघुवीर महासेठ पनि केन्द्रीय सदस्यमा पराजित भए । सचिवमा निर्वाचित भएका महेश बस्नेत, पद्माकुमारी अर्याल, शेरधन राई, हिक्मत कुमार कार्की, खगराज अधिकारी र यामलाल कँडेल पनि केन्द्रीय सदस्यमा पराजित बने ।
यसैगरी उपमहासचिवमा पराजित विष्णु रिमाल केन्द्रीय सदस्यमा पनि पराजित भए । महासचिवमा उम्मेदवारी दिएका सुरेन्द्र पाण्डे केन्द्रीय सदस्यमा पनि अनुमोदन हुन सकेन । महासचिवमा ९९९ मत पाएका पाण्डेले केन्द्रीय सदस्यमा ९६१ मतमात्र पाए । १९ पदाधिकारीमध्ये पृथ्वीसुब्बा गुरुङ, गोकर्णराज विष्ट, रघुजी पन्त, योगेश भट्टराई र छविलाल विश्वकर्माले केन्द्रीय सदस्यमा जित निकाले । एमाले विधानमा पदाधिकारी र केन्द्रीय दुवैतर्फ उम्मेदवार बन्न पाउने व्यवस्थाअनुसार नेताहरुले दुवैतर्फ उम्मेदवारी दिएका थिए । जसमा अधिकांश पराजित भएका हुन् ।
निर्वाचित पदाधिकारी
अध्यक्ष: केपी शर्मा ओली
उपाध्यक्षः विष्णु पौडेल, रामबहादुर थापा, पृथ्वीसुब्बा गुरुङ, रघुजी पन्त, गोकर्ण विष्ट
महासचिवः शंकर पोखरेल
उपमहासचिवः रघुवीर महासेठ, लेखराज भट्ट, योगेश भट्टराई
सचिवः छविलाल विश्वकर्मा, भानुभक्त ढकाल, पद्मा अर्याल, खगराज अधिकारी, यामलाल कँडेल, राजन भट्टराई, शेरधन राई, हिक्मत कार्की, महेश बस्नेत
