काठमाडौं- नेकपा एमालेमा केपी शर्मा ओली र शंकर पोखरेललाई एक सिक्काका दुई पाटा मानिन्छ । जसै ओली कुनै पनि पदमा शंकरलाई सुरक्षित बनाएर लैजान चाहन्छन् ।
काठमाडौंमा जारी ११औं महाधिवेशनमा पनि ओलीले शंकरलाई महासचिवमा व्यवस्थापन गर्दा उनको समूह भने संकटमा पर्ने देखिएको छ । कारण असन्तुष्ट समूहले कोही विद्रोहमा उत्रिएका छन् भने कोही धमाधम इतर समूहतर्फबाट उम्मेदवारी दिएका छन् । ओलीका सबैभन्दा प्रिय पात्र प्रदीप ज्ञवालीले यसरी नै मौन विद्रोह गरे । ज्ञवाली पक्कापक्की महासचिवका उम्मेदवार बन्ने थिए । तर सोमबार बिहान आएको सूचीमा उनी उपाध्यक्षको लहरमा थिए । जसकारण साँझ ५ बजेसम्मै पनि उनले उपाध्यक्षमा उम्मेदवारी दिएनन् । उनले लुसुक्क केन्द्रीय सदस्यमा उम्मेदवारी दिएर मौन विद्रोह गरे । प्रदीप उनै नेता हुन् जसले पछिल्लो समय ओलीको प्रवक्ता बनेर लगातार ओलीका अलोकप्रिय कदमहरुको बचाऊ गर्दै आएका थिए ।
ओलीलाई सधैं बचाऊ गर्दै आएका अर्का नेता हुन् प्रचार विभाग प्रमुख राजेन्द्र गौतम । महाधिवेशन सुरु भएको दिनदेखि उनी सूचीमा पर्ने छनक देखिएन । जसकारण सोमबार बिहान भृकुटीमण्डपको महाधिवेशनस्थलमा स्थापना गरेको मिडिया सेन्टरमा आएर उपमहासचिवमा उम्मेदवारी घोषणा गरेका थिए । ‘हुन त ठूलाहरुले मैले काम नगरेको देख्ला । मैले पार्टीमा धेरै दुःख गरेको छु । त्यसैले मेरो उम्मेदवारी उपमहासचिवमा हो,’ गौतमले भनेका थिए । उनको कुराको कुनै सुनुवाइ नभएपछि गौतमले स्वतन्त्रबाट उपमहासचिवमा उम्मेदवारी दिएका छन् ।
ओलीलाई ‘राजीनीतिका पेले’ भनेर घोषणा गरेका कृष्णगोपाल श्रेष्ठले पनि ओलीको साथ छाडेका छन् । श्रेष्ठले ओलीको साथ छाडेर सचिवमा उम्मेदवारी दिएका हुन् । श्रेष्ठ ईश्वर समूहमा खुलेका छन् । माधव नेपाल गुट छाडेर पछिल्लो समय ओलीनिकट बनेका रघुजी पन्तले पनि उपाध्यक्षमा उम्मेदवारी दिएका छन् । पन्त ओलीको सूचीमा उपाध्यक्षमा परेनन् । ‘मैले उपाध्यक्षमा उम्मेदवारी दिएको छु । अब निर्वाचनबाटै फैसला हुन्छ,’ पन्तले सञ्चारकर्मीसँग भने । यद्यपि प्रदीप ज्ञवालीले उम्मेदवारी नदिएका कारण आफू दुवै पक्षको साझा उम्मेदवार बन्ने लबिइङमा पन्त लागेका छन् ।
सूचीमा नपरेपछि लालबाबु पण्डितले पनि सचिवमा उम्मेदवारी दिएका छन् । उनी ओली गुटकै नेता हुन् । चितवन महाधिवेशनमा पनि पण्डित असन्तुष्ट सुनिएका थिए । दोलखाका आनन्द पोखरेलले पनि ओलीको साथ छाडेका छन् । उनी ईश्वर समूहबाट उपमहासचिवको उम्मेदवार छन् । यसैगरी बाराका पुरुषोत्तम पौडेलले पनि ओलीको साथ छाडेका छन् । उनी ईश्वर समूहबाटै सचिवको उम्मेदवार छन् ।
चितवन महाधिवेशनमा निषेध गरिएका टंक कार्कीलाई ईश्वर समूहले उपाध्यक्षमा समेटेर ओली समूहमा ठूलै धक्का दिएको छ । हुन त ओली समूहले इतरबाट उम्मेदवार बनेकाहरुलाई व्यवस्थापन गर्न निर्वाचन सार्ने र गलाउनेसम्मको रणनीति तय गरेको बताइएको छ । तर आफूहरु त्यसको पक्षमा नरहने महासचिव पदका उम्मेदवार पौडेल बताउँछन् । ‘मेरो उम्मेदवारी फिर्ता हुँदैन । महासचिवमा जितेपछि बधाइ दिनुहोला,’ पौडेलले भने ।
यसरी असन्तुष्ट हुँदै ओलीको साथ छाड्नेमा अग्नि खरेल पनि अर्का नेता हुन् । उनलाई ओली प्यानलमा केन्द्रीय सदस्यको सूचीमा राखिएको थियो । तर, खरेलले सचिवमा ‘स्वतन्त्र’ उम्मेदवारी दिएका छन् । ओली समूहको सूची तयारीको क्रममा रघुवीर महासेठ र लेखराज भट्टले तीव्र असन्तुष्ट जनाएका थिए । त्यसपछि ओलीले रघुवीरलाई उपमहासचिवमै राखेर भट्टलाई सचिवको सूचीमा राखे । तर भट्टले आक्रोश पोखेपछि उनलाई उपमहासचिवमा उकालेर भानुभक्त ढकाललाई उपमहासचिवबाट सचिवमा झारियो ।
अध्यक्षमा भिड्दै ओली र पोखरेल
एमाले अध्यक्ष पदका लागि केपी शर्मा ओली र ईश्वर पोखरेलले उम्मेदवारी दर्ता गराएका छन् । निवर्तमान अध्यक्ष ओलीले सोमबार दिउँसो अध्यक्ष पदका लागि उम्मेदवारी दर्ता गराएका हुन् ।
नवौं र दशौं महाधिवेशनबाट अध्यक्ष निर्वाचित ओलीले ११औं महाधिवेशनमा पनि पुनः अध्यक्ष पदका लागि उम्मेदवारी दिएका हुन् । त्यसैगरी, यसअघि पार्टीका वरिष्ठ उपाध्यक्ष रहेका ईश्वर पोखरेलले पनि अध्यक्ष पदका लागि उम्मेदवारी दर्ता गराएका छन् । पोखरेलले सोमबार दिउँसो ३ बजे उम्मेदवारी दर्ता गराएका हुन् ।
११औं महाधिवेशनबाट नयाँ नेतृत्व चयनका लागि आज मध्याह्न १२ बजेदेखि साँझा ६ बजेसम्म मतदान हुने कार्यतालिका छ ।
महासचिवमा पोखरेल र पाण्डे भिड्दै
महासचिवमा ओली समूहबाट ओलीका विश्वासपात्र शंकर पोखरेल र ईश्वरको समूहबाट सुरेन्द्र पाण्डेको उम्मेदवारी परेको छ । शंकर निवर्तमान महासचिव हुन् भने पाण्डे निवर्तमान उपाध्यक्ष ।
पाण्डेले ओलीइतर प्यानल बनाउन निकै संघर्षसमेत गरेका थिए । जसकारण उनलाई महासचिव पदमा सर्वसम्मत उभ्याउन ईश्वर प्यानल सफल भएको हो । इतरपक्षले अध्यक्षमा नभए पनि महासचिव आफ्नो पक्षमा जिताउनेगरी माहोल तयार पारेको नेताहरु बताउँछन् । ओलीपक्षकै नेताहरु विष्णु पौडेल, शेरधन राई, रघुवीर महासेठ, पृथ्वीसुब्बा गुरुङजस्ता नेताहरु शंकर पोखरेलसँग रुष्ट सुनिएकाले सुरेन्द्रले महासचिवमा बाजी मार्ने बताइन्छ । यद्यपि, ओलीले विभिन्न पद बाँडेरै भए पनि शंकरलाई नै महासचिवमा ल्याउने अर्काथरी नेताहरु बताउँछन् ।
मतदानका लागि ८० वटा विद्युतीय भोटिङ मेसिन
नेकपा एमालेको जारी ११औं राष्ट्रिय महाधिवेशनमा ८० वटा विद्युतीय भोटिङ मेसिन मतदानका लागि प्रयोग गरिने भएको छ । महाधिवेशनमा १०० वटा मेसिन ल्याइए पनि ८० वटा मेसिन मतदानका लागि प्रयोग गरिने एमाले केन्द्रीय निर्वाचन आयोगका अध्यक्ष डा. विजय सुब्बाले जानकारी दिए ।
उनकाअनुसार एक जना मतदातालाई मतदान गर्न कम्तीमा २५ देखि ३० मिनेट लाग्ने छ । महाधिवेशनमा दुई हजार २६३ प्रतिनिधि सहभागी छन् । रामलक्ष्मण इनोभेसन प्रालिका सञ्चालक लक्ष्मण रिमालले १० वटा नमूना अभ्यास र १० वटा अतिरिक्त मेसिन राखिएको बताए ।
कुन पदमा क–कसको उम्मेदवारी ?
- अध्यक्षः ईश्वर पोखरेल र केपी शर्मा ओली
- उपाध्यक्षः अरुण नेपाल, गुरुप्रसाद बराल, गोकर्णराज विष्ट, टंकप्रसाद कार्की, पर्शुराम मेघी गुरुङ, रघुजी पन्त, रामबहादुर थापा, डा. विन्दा पाण्ड र विष्णुप्रसाद पौडेल
- महासचिवः शंकर पोखरेल र सुरेन्द्रप्रसाद पाण्डे
- उपमहासचिवः आनन्दप्रसाद पोखरेल, योगेश भट्टराई, रघुवीर महासेठ, राजेन्द्रप्रसाद गौतम, लेखराज भट्ट, विष्णुप्रसाद रिमाल र वैजनाथ चौधरी
- सचिवः अग्निप्रसाद खरेल, इन्द्रलाल सापकोटा, कर्णबहादुर थापा, कृष्णगोपाल श्रेष्ठ, खगराज अधिकारी, गोकुलप्रसाद बास्कोटा, छविलाल विश्वकर्मा, ठाकुरप्रसाद गैरे, पद्याकुमारी अर्याल, पुरुषोत्तम पौडेल, पेम्बा लामा, भानुभक्त ढकाल, महेश बस्नेत, यामलाल कंडेल, रचना खड्का, राजन भट्टराई, लालबाबु पण्डित, विनोदप्रसाद ढकाल, शेरधन राई र हिक्मतकुमार कार्की
