त्रिशूली- धान्यपूर्णिमा पर्वको अवसरमा नुवाकोटको टुप्चेश्वर महादेव मन्दिरमा लागेको जात्रामा करिब १३ लाखर रुपैयाँ भेटी संकलन भएको छ । यही मङ्सिर १३ देखि १७ गतेसम्म लागेको जात्राको क्रममा दर्शनार्थीले मन्दिरमा चढाएको भेटी १२ लाख ८८ हजार १८० रुपैयाँ संकलन भएको हाे ।
टुप्चेश्वर क्षेत्र विकास कोषका कोषाध्यक्ष राजकुमार श्रेष्ठले मन्दिरबाट संकलन गरिएको नगद र १२ लाख ५४ हजार ८० रुपैयाँ र कोषको बैंक खातामा क्युआरमार्फत ३४ हजार १०० रुपैयाँ भेटी संकलन भएको छ । जात्राको भेटी संकलन गरेर प्रहरी चौही समुन्द्रटारमा ल्याएर गणना गरिएको थियो । जनप्रनिधि, कोषका पदाधिकारी, सुरक्षाकर्मी, विद्यार्थीमार्फत गणना गरिएको हो । ‘जे माग्यो त्यो सिद्ध हुने’ जनविश्वास रहेको टुप्चेश्वर महादेव मन्दिरमा धान्यपूर्णिमा पर्वको अवसरमा करीब एक लाख तीर्थालुले दर्शन गरेको कोषका संरक्षक एवं टुप्चेश्वर गाउँपालिका अध्यक्ष शंकरबहादुर थापाले जानकारी दिए।
टुप्चेश्वर महादेव मन्दिरमा शनिबार र सोमबारका दिन पाँच हजार हारहारीमा तीर्थयात्री आउने र करिब एक लाख रुपैयाँ भेटी संकलन हुँदै आएको छ । हिन्दू र बौद्धमार्गीका लागि यहाँको मन्दिर प्रसिद्ध रहेको छ ।
