काठमाडाैं- तराई-मधेश लोकतान्त्रिक पार्टीले मधेशको हकहितका लागि निरन्तर संघर्ष गर्ने, विभाजनकारी राजनीति अस्वीकार गर्ने र लोकतान्त्रिक मूल्यहरूको संरक्षणमा दृढ रहने जनाइएकाे छ। तराई-मधेश पार्टीले हालै एक प्रेस विज्ञप्ति जारी गरी जनाएकाे हाे ।
विज्ञप्तिमा भनिएको छ कि, पार्टीले आफ्नो स्थापनाकालदेखि नै मधेशी जनताको हक, पहिचान र समान अधिकारका लागि संघर्ष गर्दै आएको छ र त्यो अभियान अझ सशक्त रूपमा अघि बढाइनेछ। तराई–मधेशका जनतामाथि निरन्तर भइरहेको अन्याय, राज्यकाे बेवास्ता र असमान व्यवहारकाे निन्दा गर्दै पार्टीले मधेशी समुदायकाे आवाजलाई राष्ट्रिय राजनीतिको मुख्य धारमा ल्याउन निरन्तर प्रयासरत रहने बताएको छ।
त्यसैगरी, अन्य राजनीतिक दलहरूले मधेशका मुद्दाहरूप्रति देखाएको असंवेदनशीलता, विभाजनकारी र अवसरवादी प्रवृत्तिप्रति गम्भीर असन्तुष्टि प्रकट गरिएको छ। पार्टीकाे भनाइअनुसार, विभिन्न शक्तिहरूले मधेशी आन्दोलनकाे भावना कमजोर पार्ने षड्यन्त्र गरिरहेका छन्, जसकाे कडा प्रतिवाद गरिँदैछ।
पार्टीले आफ्ना कार्यकर्ताहरूलाई एकता, अनुशासन र जनसेवाको भावनासहित संगठनलाई बलियो बनाउने आह्वान गरेको छ। साथै, मधेशका गाउँ–गाउँमा पुगेर जनतासँग प्रत्यक्ष संवाद गर्ने र उनीहरूको समस्यालाई नीतिगत रूपमा सम्बोधन गर्ने योजना पनि सार्वजनिक गरिएको छ।
विज्ञप्तिमा मधेशी जनताकाे अधिकार सुनिश्चित गर्न संविधानकाे उचित संशोधन, प्रतिनिधित्वकाे समान अवसर, भाषिक तथा सांस्कृतिक अधिकारकाे संरक्षण र आर्थिक समृद्धिकाे आधार निर्माण गर्न सरकारलाई दबाब दिने घोषणा गरिएको छ।
