प्रधानमन्त्री केपी शर्मा ओलीले दोस्रोपटक ८ जेठ २०७८ मा गरेको प्रतिनिधिसभा विघटन बदर हुँदा सोही वर्षको २८ असारमा सर्वोच्चको परमादेशको आधारमा प्रधानमन्त्री नियुक्त भएका थिए । यसपटक पनि देउवा त्यस्तै अवसर आउने ठानिरहेका छन्
- कांग्रेस बैठक रहस्यमयी ढंगले सरेको सरेकै
- स्रोतको दाबीमा भावी प्रधानमन्त्री देउवा र सभापति गगन बन्नेगरी समझदारी बनाउन बैठक सारिएको सारिएकै
काठमाडौं – नेपाली कांग्रेसको केन्द्रीय समिति बैठक सरेकोसरेकै छ । आज बिहानका लागि तय बैठक पनि आइतबार दिउँसो २ बजे बस्नेगरी सरेको छ । यसरी पटकपटक बैठक सार्नुलाई रहस्यमयी रूपमा हेरिएको छ ।
नियमित कि विशेष महाधिवेशन गर्ने विषय पेचिलो बन्दा बैठक सारेकोसारेकै गर्नुलाई एकथरीले पार्टी र राजकीय सत्ताको सम्भावित नेतृत्वसँग जोडेर विश्लेषण गर्न थालेका छन् । स्रोतका अनुसार सभापति शेरबहादुर देउवा चाहन्छन्– प्रतिनिधिसभा पुनस्र्थापित भए प्रधानमन्त्री बन्न अघि सर्ने र महाधिवेशनबाट गगनलाई सभापति बनाउने । यी दुई विषयमा पहिले सझदारी जुट्ने वातावरण बनाउन देउवा अग्रसर छन् । समझदारी बनेमात्रै उनी बैठक चल्न दिने मनस्थितिमा छन् ।
बिहीबार झन्डै दिनभरजसो देउवाले आफ्नो भाडाको निवास चुनदेवीमा कार्यवाहक सभापति पूर्णबहादुर खड्का, महामन्त्रीद्वय गगन र विश्वप्रकाश शर्मासँग पटकपटक छलफल गरेका थिए । छलफलमबाट कुनै निष्कर्ष भने निस्केन । यद्यपि, उनीमाथि जेन–जी विद्रोहपछि पार्टी राजनीतिबाट मात्रै होइन सत्ता राजनीतिबाट पनि अलग हुन दबाव छ । विशेष महाधिवेशनमा पार्टीलाई लान महामन्त्रीहरू थापा र शर्मालगायत नेताहरूले जोडबल गरिरहेका छन् । यस्तो अवस्थामा देउवाले प्रतिनिधिसभा पुनस्र्थापित भए आफू प्रधानमन्त्री र गगनलाई सभापति बनाउनेगरी महाधिवेशन गर्ने योजना बनाएको बुझिएको छ ।
प्रतिनिधिसभा गत २७ भदौमा विघटन भएको हो । प्रधानमन्त्री सुशीला कार्कीले त्यसबेला हुँदै नभएको संविधानको धारा प्रयोग गरेर विघटन सिफारिस गरेको भन्दै नेकपा एमाले र स्वतन्त्र कानुनविद्हरूले सर्वोेच्च अदालतमा दायर रिट दायर गरेका छन् । ती रिटहरू विचाराधीन अवस्थामा छन् । कार्की सरकारले गरेको विघटन न्यायिक परीक्षणमा जाँदा बदर हुने सम्भावना दलहरूले देखेका छन् । तत्कालीन प्रधानमन्त्री केपी शर्मा ओलीले दोस्रोपटक ८ जेठ २०७८ मा गरेको प्रतिनिधिसभा विघटन बदर हुँदा सोही वर्षको २८ असारमा सर्वोच्चको परमादेशको आधारमा प्रधानमन्त्री नियुक्त भएका थिए । यसपटक पनि देउवा त्यस्तै अवसर आउने ठानिरहेका छन् ।
बिहीबार विराटनगर पुगेर कांग्रेस उपसभापति धनराज गुरुङले निर्वाचन हुनै नसक्ने दाबी गरे । यता प्रधानमन्त्री सुशीला कार्कीसँगको भेटमा एमाले नेताहरुले आफ्नो अध्यक्ष ओलीलाई स्थानहद तोकेर निर्वाचन हुन नसक्ने चेतावनी दिइसकेका छन् । अर्कोतिर, जेन–जीहरूको एक समूहले प्रधानमन्त्री कार्की र गृहमन्त्री ओमप्रकाश अर्यालको राजीनामा मागेको छ । मिरज ढुंगाना र उनी समर्थक जेन–जीहरूले राजीनामा माग्दै बुधबार त बालुवाटार क्षेत्रमा प्रदर्शन नै गरे ।
सुधन गुरुङ र उनी समर्थक जेन–जीहरूले बाराको सिमरा घटनालाई लिएर गृहमन्त्री ओमप्रकाश अर्यालको राजीनामा माग्दै आएका छन् । प्रधानमन्त्री कार्की पनि सत्तामा पुगेपछि व्यावहारिक रूपमा दण्डहीनता र नातावादको पक्षपाति देखिको भन्दै उनको आलोेचना हुन थालेको छ । यसबीच उनको सरकार ढल्ने चर्चा पनि भइरहेको हो ।
भित्री रुपमा पूर्वप्रधानन्यायाधशीश कल्याण श्रेष्ठ यो खेलमा लागेको स्रोतको दाबी छ । श्रेष्ठ यसअघि आफै प्रधानमन्त्री बन्ने दाउमा लागेका थिए । आफू सफल नभएपछि देउवालाइ प्रधानमन्त्री बनाउनुपर्ने भन्दै श्रेष्ठले भित्री छलफल बाक्लो बनाएका छन् ।यस्तो अवस्थामा आफू प्रधानमन्त्री बन्ने छाँट देउवाले देखेको उनीनिकट एक नेता बताउँछन् । त्यसो हुनाले भावी प्रधानमन्त्री आफू र सभापति थापालाई बनाउन पार्टीभित्र आन्तरिक समझदारी जुटाउनका लागि बैठक सारेको सारेकै गरिरहेका हुन् ।
