काठमाडौं– नेपाल आयल निगमको नयाँ मुल्यदर आज राति १२:०१ बाट लागू गरेको छ । इण्डियन आयल कर्पोरेशन ( IOC) ले पठाएको नयाँ खरिद मूल्य बढेर आए पनि उपभोक्तामाथिको थप भार कम गर्न नेपाल आयल निगमले पेट्रोल र डिजेलमा सीमित मात्र वृद्धि गर्ने निर्णय गरेको हो ।
निगमको सञ्चालक समितिको मिति २०८२/०७/२९ को निर्णयअनुसार नयाँ मूल्य आज देखि लागू भएको छ । इण्डियन आयलबाट प्राप्त नयाँ दर अनुसार पेट्रोलमा प्रति लिटर २.५४ रुपैयाँ र डिजेलमा ६.५३ रुपैयाँ वृद्धि भए पनि निगमले उपभोक्ताको हितलाई प्राथमिकता दिंदै पेट्रोलमा २ रुपैयाँ र डिजेलमा ३ रुपैयाँ मात्र बढाउने निर्णय गरेको निगमले जारी गरेको प्रेस विज्ञप्तिमा उल्लेख छ ।
नयाँ मूल्यसँगै निगमको डिपो वा कार्यालयदेखि १५ किलोमिटर भित्रका क्षेत्रमा पेट्रोलियम पदार्थको खुद्रा बिक्री मूल्य निधारर्ण कायम गरेका छ । जसअनुसार नयाँ खुद्रा बिक्री मूल्य प्रति लिटर पेट्रोल पहिलो वर्ग १५८.५० रुपैयाँ, दोस्रो वर्ग १६०.०० रुपैयाँ र तेस्रो वर्ग १६१.००रुपैया रहेको छ । त्यसैगरी डिजेलरमट्टितेल पहिलो वग १४३.०० रुपैयाँ, दोस्रो वग १४४.०० रुपैयाँ र तेस्रो वर्ग १४६.०० रुपैयाँ रहेको छ ।
साथै वर्ग अनुसार पहिलो वर्गमा चारआली, विराटनगर, जनकपुर, अमलेखगञ्ज, भलवारी, नेपालगञ्ज, धनगढी र वीरगञ्ज, दोस्रो वर्गमा सुर्खेत र दाङ र तेस्रो वर्गमा काठमाडौं, पोखरा र दिपायल रहेका छन् । निगमका अनुसार अन्तर्राष्ट्रिय बजार मूल्यमा भएको उतार–चढावका कारण समायोजन आवश्यक भएको हो । निगमले ‘सहजता, शुद्धता र पारदर्शिता’ मा आफ्नो प्रतिवद्धता दोहोर्याउँदै उपभोक्तामैत्री मूल्य निर्धारणमा निरन्तरता रहने जनाएको छ ।
नेपाल आयल निगमका प्रवक्ता अनुसार नयाँ दर लागू भएपछि आवश्यक आपूर्तिमा कुनै समस्या नआउने विज्ञप्तिमा जनाइएको छ ।
