काठमाडौं– नेपाल समाजवादी कांग्रेसको केन्द्रीय समितिको बैठकले देशको विभिन्न परिस्थितिको बारेमा छलफल गर्दै विभिन्न निर्णय गरेको छ ।
बैठकले लिम्पियाधुरा, लिपुलेक, कालापानी क्षेत्र नेपालको भूमि भएकाले त्यसलाई स्वामित्वमा ल्याउन वर्तमान सरकारबाट पहल नगरे शासन सत्ता अन्त्यको निम्ति सशक्त आन्दोलन गर्ने र आन्दोलनकै क्रममा भारतसँंग वार्ताको पहल गर्ने निर्णय गरेको हो ।
यस्तै, पार्टीले रुकुम घटना अमानवीय घटना भएकाले दोषीउपर कारबाही गर्न सरकारी पक्षबाट पहल गरिनुपर्ने समेत निर्णय गरेको जनाएको छ । यस्तै, पार्टीले अघि सारेको विश्व संवैधानिकता, संवैधानिक प्रजातन्त्र, हिन्दूराज्य, स्थानीय स्वशासन, समाजवादी अर्थनीति, राजसंस्था, भन्ने नीति महत्वपूर्ण भएकाले त्यसलाई व्याख्या गर्न आवश्यक भएको हुँदा सो विषयबारे व्याख्या गर्न पार्टी अध्यक्ष गोविन्द निरौलालाई जिम्मा दिएको छ ।
यस्तै, कोरोना महामारीबाट ज्यान गुमाएका सबैप्रति श्रद्धाञ्जली अर्पण गर्दै पीडितहरूप्रति सरकारको तर्फबाट उचित उपचार गर्न माग गरिनुपर्ने निर्णय गरेको छ भने राज्यमा देखिएको जातीय, क्षेत्रीय र लिंगीय विभेद्को अन्त्य गर्न वर्तमान शासन सत्ताको अन्त्य र संघीयता, धर्मनिरपेक्षताको खारेजी आवश्यक भएको कुरा निष्कर्ष निकालेको छ । जसका लागि सशक्त नागरिक आन्दोलन हुन आवश्यक भएको निचोड निकाल्दै आन्दोलन कै अभियानमा नयाँ संविधान जारी गर्नुपर्ने अवस्थालाई ध्यानमा राखेर अब बन्ने नयाँ संविधानको मस्यौदा तयार गर्न पार्टी अध्यक्ष निरौलालाई जिम्मा दिएको छ ।
