- नेतृत्वबाट हटाउन तीव्र दबाब भइरहेका बेला देउवा भने अण्डरग्राउण्ड
- गगन–विश्व एक भएर विशेष महाधिवेशनको माग गर्दा शेखरको साथ नपाएपछि ‘ब्याक’
- कुनै बेला गगनको साथ लिएर सभापतिमा भिडेका कृष्णप्रसाद सिटौला अहिले शशांक कोइराला, विमलेन्द्र निधि र प्रकाशमान सिंहसँग नजिकिँदै, यही समूहमा मिसिए प्रवक्ता डा. प्रकाशशरण महत
- देउवा समूहबाट सहमहामन्त्रीमा निर्वाचित भीष्मराज आङ्देम्बे, महालक्ष्मी उपाध्याय डिना शेखर समूहसँग नजिकिँदै
काठमाडौं– नेपाली कांग्रेसमा तीव्र ध्रुवीकरण सुरु भएको छ । जेन–जी विद्रोहपछि सडकमा आइपुगेको कांग्रेसभित्र नेतृत्व परिवर्तनको विषयलाई लिएर तीव्र ध्रुवीकरण सुरु भएको हो ।
कांग्रेस, एमाले र माओवादीका सबै साथीहरुलाई म अपिल गर्छु– हामीले तीनजनै नेतालाई भन्नुपर्छ– अब ‘नो मोर’ । ‘इफ’, ‘बट’ केही हुँदैन । तपाईंहरुले अब छाड्नुपर्छ । तपाईंहरु अब घर बस्नुपर्छ । तपाईंहरुविना पार्टी चलाउँछौं भनेर हामीले भन्नुपर्छ । यसो गर्न सकेमात्र हाम्रो पार्टीले आम मानिससँग कुरा गर्न सक्छ ।
गगन थापा
महामन्त्री, नेपाली कांग्रेस
सभापति शेरबहादुर देउवा भदौ २४ यता सार्वजनिक भएका छैनन् । जेन–जी आन्दोलनका क्रममा देउवा आफ्नै निवास बूढानीलकण्ठमा कुटिएका थिए । त्यसपछि सेनाको सुरक्षामा उपचारका लागि लगिएका देउवा केन्द्रीय समिति नजिकिँदा पनि सार्वजनिक भएका छैनन् ।
कांग्रेसले आइतबारका लागि डाकेको केन्द्रीय समिति भोलि २८ गतेका लागि सारेको छ । यो बीचमा महामन्त्रीद्वय गगन थापा र विश्वप्रकाश शर्माले विशेष महाधिवेशनको पहल गरेका थिए । तर डा. शेखर कोइरालाले साथ नदिएपछि दुई महामन्त्रीले नियमित महाधिवेशन हुनुपर्ने माग गरेका छन् ।
केन्द्रीय समितिका लागि एजेण्डा तय गर्न बिहीबारबाट तीन दिनसम्म चलेको पदाधिकारी तथा पूर्वपदाधिकारी बैठकले केही निचोड निकाल्न सकेन । यो बीचमा संस्थापनपक्ष र संस्थापनइतरका शेखर नियमित महाधिवेशनबाटै नेतृत्व चयन गर्नुपर्ने पक्षमा देखिन्छन् । चौतर्फी रुपमा देउवालाई नेतृत्वबाट हटाउनुपर्ने आवाज उठ्न थालेको छ ।
देउवानिकट मानिने पूर्वमहामन्त्री डा. शशांक कोइरालाले देउवाले तत्काल कार्यबाहक सभापति तोक्नुपर्ने सुझाएका छन् । ‘मैले शेरबहादुरजीलाई भनेँ– यो मेरो व्यक्तिगत विचार हो । मैले उहाँलाई के भने भने तपाईं (कार्यसमिति) विघटन गर्नुस् । एक जनालाई कार्यवाहक सभापति दिनुस् । उनले गठन गर्दछन् र उनले मिति तय गर्दछन् । मलाई लाग्छ– मंसिरसम्ममा मिति तय होला भन्ने मेरो भावना हो,’ शनिबार कोइरालाले भनेका थिए । देउवापक्षकै केन्द्रीय सदस्य उदयशमशेरले पनि देउवाले कार्यवाहक तोक्नुपर्ने बताएका छन् ।
यता कांग्रेस महामन्त्री थापाले भने आइतबार भिडियो वक्तव्य जारी गर्दै देउवालाई नेतृत्व छाड्न भनेका छन् । तीन ठूला पार्टीमध्ये एमाले र माओवादीले पनि नेतृत्व फेर्नुपर्ने थापाको भनाइ थियो । ‘तिम्रो पार्टीका टाउको हटाऊ, उनीहरुलाई विश्राम लिन लगाऊ भन्छन् हाम्रै मतदाता । यसको बारेमा कुनै द्विविधा छ ? छैन । तर हामी टेक्निकल कुरा गरिरहेका छौं । उहाँहरुले हट्न चाहनुभएको छैन । हामीले पनि हटाउन सकिरहेका छैनौं,’ गगनले भनेका छन्, ‘कांग्रेस, एमाले र माओवादीका सबै साथीहरुलाई म अपिल गर्छु– हामीले तीनजनै नेतालाई भन्नुपर्छ– अब ‘नो मोर’ । ‘इफ’, ‘बट’ केही हुँदैन । तपाईंहरुले अब छाड्नुपर्छ । तपाईंहरु अब घर बस्नुपर्छ । तपाईंहरुविना पार्टी चलाउँछौं भनेर हामीले भन्नुपर्छ । यसो गर्न सकेमात्र हाम्रो पार्टीले आम मानिससँग कुरा गर्न सक्छ ।’
थापाले जेन–जीको आन्दोलनपछि र अघिको अवस्था एउटै नभएकाले अब नियमको कुरा गरेर प्रमुख नेताहरुले पदमा बस्न नसुहाउने र उनीहरुका लागि अरुले वकालत गर्न नमिल्ने बताए । ‘नियम बाँकी छ अब ? भदौ २५ र भदौ २२ सम्मको नेपाल एउटै हो ? यो मेसेजलाई हामीले बुझ्नुपर्छ कि पर्दैन ?,’ उनले भनेका छन्, ‘नेतृत्व बदलेपछि पार्टीको संस्कृति बदल्नु छ । मति बदल्नु छ । गति बदल्नु छ । तर त्यसका लागि नेतृत्व बदलेमात्र बाटो खुल्छ ।’
कांग्रेस नेता कृष्णप्रसाद सिटौलाले भने अहिले नै सभापति देउवाको विकल्प खोज्ने बेला भइनसकेको बताएका छन् । ‘अहिले नै सभापतिको विकल्प खोज्ने बेला भएको हो त ? विकल्प खोज्नु पर्ने अवस्था अहिले म देख्दिनँ,’ शीर्ष नेताको बैठकमा सिटौलाले भने । कुनै बेला गगनको साथ लिएर सभापतिमा भिडेका सिटौला अहिले शशांक, विमलेन्द्र निधि र प्रकाशमान सिंहसँग नजिकिएका छन् । यो समूहमा कांग्रेस प्रवक्ता डा. महत पनि लागेका छन् ।
देउवा समूहबाट सहमहामन्त्रीमा निर्वाचित भीष्मराज आङ्देम्बे, महालक्ष्मी उपाध्याय ‘डिना’ भने शेखर समूहमा नजिकिएका छन् । पदाधिकारी बैठकबाट एजेण्डा तय गर्न नसकेपछि कांग्रेसले अनौपचारिक छलफलसमेत थालेको छ । यी छलफलबाट केन्द्रीय समितिको एजेण्डा तय गरिने कांग्रेस प्रवक्ता डा. प्रकाशशरण महतले बताए ।
एमालेको महाधिवेशन मंसिरमा, प्रतिनिधिसभा विघटनविरुद्ध अदालत जाने
विधानअनुसार नेकपा एमालेको ११औं महाधिवेशन हुन एक वर्ष बाँकी छ । तर पछिल्लो परिस्थितिको सम्बोधन गर्न भन्दै एमालेले आउँदो मंसिर अन्तिम साता महाधिवेशन गर्ने निर्णय गरेको छ ।
आइतबार भक्तपुरको गुण्डुमा बसेको सचिवालय बैठकले ११औं महाधिवेशन मंसिर अन्तिम साता गर्ने निर्णय गरेको पार्टीका उपमहासचिव प्रदीप ज्ञवालीले जानकारी दिए । उनका अनुसार महाधिवेशनको मिति र स्थान केन्द्रीय कमिटी बैठकले तय गर्ने छ । केन्द्रीय कमिटी बैठक यही असोज २९ देखि ३१ गतेसम्म बस्दै छ । एमालेको १०औं महाधिवेशन २०७८ मंसिर १० देखि १४ गतेसम्म चितवनमा भएको थियो ।
यसैगरी एमालेले प्रतिनिधिसभा विघटन असंवैधानिक रहेको बताउँदै पुनस्र्थापनाको मागसहित अदालतमा जाने निर्णय गरेको छ । ‘प्रतिनिधिसभा विघटनलाई यो बैठकले असंवैधानिक र अलोकतान्त्रिक ठहर गरेको छ । असंवैधानिक र अलोकतान्त्रिक ढंगले गरिएको विघटन बदर गर्दै प्रतिनिधिसभा पुनःस्थापना हुनुपर्छ भन्ने स्पष्ट माग बैठकले गरेको छ,’ ज्ञवालीले भने ।
