[caption id="attachment_9178" align="alignnone" width="800"]
काठमाडौं– प्रधानमन्त्री केपी ओलीले विदेशमा भएका नेपालीहरुलाई तत्काल फिर्ता ल्याए थप समस्या उत्पन्न हुने बताएका छन् । सरकारले ल्याएको नीति ता कार्यक्रममाथि उठेको प्रश्नको जवाफ दिने क्रममा मंगलबार संसदमा प्रधानमन्त्री ओलीले तत्कालै विदेशबाट सबै नेपालीलाई स्वदेश फर्काउन सक्ने सरकारको क्षमता नरहेकाले तत्काल सबैलाई ल्याउन नसकिने बताए ।[/caption]
उनका अनुसार रोजगारदाता मुलुकहरुमा अलपत्र परेकाहरुमा प्राथमिकताका आधारमा अप्ठ्यारोमा परेकाहरुलाई मात्र स्वदेश ल्याउन सकिन्छ । प्रधानमन्त्री ओलीले नेपालको अवस्था अमेरिका, अष्ट्रेलियालगायत विकसित राष्ट्रहरुले थोरै संख्यामा आफ्ना नागरिकलाई सजिलै फिर्ता गरेजस्तो सजिलो नरहेको धाराणा व्यक्त गरेका छन् ।
उनले नेपाली नागरिक अन्य मुलुकमा धेरै संख्यामा रहेको कारण पनि सहज स्वदेश फिर्ता हुन नसक्ने तर्क गर्दै अन्य मुलुकले सजिलैसँग आफ्नो मानिसहरुलाई उद्धार गरेजस्तो नेपाल सरकारले नसक्ने बताए ।
विदेशमा रहेका लगभग ४५ लाख नेपालीहरुलाई फर्काउन पर्याप्त समय, स्रोत तथा साधनको कमी रहेको स्विकार्दै विदेशमा रहेका नेपालीहरुको तत्काल उद्धार गर्न नसकिने बताएका छन् । साथै उनले उद्धार सजिलो काम नभएको हु्ँदा यसका लागि केही समय लाग्नेसमेत बताए ।
प्रधानमन्त्री ओलीले हाल कतारमा मात्र भएको पौने चार लाख नागरिकलाई समेत क्वारेन्टाइनमा राख्ने क्षमता र जनशक्ति नभएको हुँदा हतारमा निर्णय लिई पछुताउने पर्ने स्थिति हुने भएको तर्क गरे । यसका लागि सरकारले राम्रोसँग अध्ययन एवं तयारी गरी उनीहरुलाई देश ल्याउने बताए । उनले यस अवस्थामा नागरिकलाई देश फर्कन नदिने नभनेको तथा देश फर्कनलाई अनुकूल वातावरण तयार गर्न समय लाग्ने भएको बताएका छन् ।
उनले कतार, कुवेत, बहराइन, ओमान, साइप्रस, युएई, इजरायललगायत मुलुकहरुका प्रधानमन्त्री तथा राष्ट्रपतिहरुसँग कुराकानी गरेको र ती मुलुकका सरकारलाई नेपाली नागरिकलाई यस्तो अवस्थामा लखेट्नु नहुने भनेको बताए । त्यस्तै कुवेतमा अवैधानिक रुपमा रहेकाहरुलाई कानुनी बनाउने, उनीहरुलाई कोरोनाको समस्या सकिएपछि उनीहरुलाई त्यहिँ काम गर्न बस्ने वा स्वदेश फर्किने विकल्प दिइने कुरा भएको पनि प्रधानमन्त्री ओलीले प्रष्ट्याए ।
प्रधानमन्त्री ओलीले मुलुक तयार नभई हचुवाको भरमा विदेशमा भएका नेपालीहरुलाई ल्याए यसले झनै भयानक स्थिति पैदा गर्ने भन्दै सुरक्षित व्यवस्थापन गर्न नसकिन्जेल नेपालीहरु फिर्ता ल्याउन नसकिने बताएका छन् । उनले अप्ठ्यारोमा परेकाहरुलाई फिर्ता ल्याइने तर जथाभावी ल्याएर मुलुकलाई थप संकट पैदा नगर्ने बताए ।
यदि अहिले नै बिनासोचबुझ विदेशमा भएको नेपलीहरु ह्वार ह्वार ल्याए उनीहरुको व्यवस्थापन गर्न नसकेर मुलुकभित्र थप कोरोना फैलने र स्वदेशमा रहेका नागरिकलाई पनि अप्ठ्यारोमा पर्ने बताउँदै सरकार यस पक्षमा नरहेको उनले बताए ।
