- तुइन खोलामा पहिरो झरेको झर्यै, यात्रुहरूको विजोग
- देशभरका विभिन्न राजमार्ग अवरुद्ध
- अवरुद्ध राजमार्ग छिटो खुलाउन भौतिक पूर्वाधारमन्त्री घिसिङको निर्देशन
काठमाडौंऔ दसैंमा घर जानेहरूको भीड काठमाडौंका बसपार्कहरूमा देखिँदा प्रमुख राजमार्गहरू बाढी र पहिरोले अवरुद्ध भएका छन् । राजमार्गहरू अवरुद्ध भएसँगै कतिपय यात्रुहरू बीच बाटैमा अलपत्र परेका छन् । घर जान भनेर बसपार्कमा पुगेका यात्रुहरू रोकिनु परेको छ ।
देशकै सर्वाधिक व्यस्तमध्येमा पर्ने मुग्लिन–नारायणगढ सडकखण्ड पहिरोले अवरुद्ध भएको छ । शनिबार बिहानैदेखि उक्त सडक दुईतर्फी नै बन्द भएको हो । पहिरो खसिरहेका कारण पन्छाएर सवारी सञ्चालन गर्न नसकिएको चितवनका प्रहरी उपरीक्षक (एसपी) गोविन्द पुरीले बताए । ‘पहिरो झरेको झरेकै भयो । रोकिँदै रोकिएन । हाम्रो टोली पहिरोग्रस्त नजिकै छ,’ उनले प्रभावसँग भने, ‘पहिरो रोकिएपछि पन्छाउँछौं ।’
पहिरो झरेको झरेकै भयो । रोकिँदै रोकिएन । हाम्रो टोली पहिरोग्रस्त नजिकै छ । पहिरो रोकिएपछि पन्छाउँछौं ।
गोविन्द पुरी
प्रहरी उपरीक्षक, चितवन
उनले आज (आइतबार) मध्याह्न १२ बजेअघि पहिरो पन्छाएर सवारी सञ्चालन गर्न मुस्किल पर्ने बताए । पहिरो खसेको क्षेत्र चितवनको इच्छाकामना गाउँपालिकास्थित तुइन खोलामा हो । त्यहाँ शुक्रबारदेखि नै पहिरो खसिरहेको हो । पहिरो खसिरहेपछि सडक अवरुद्ध हुँदा यात्रुवाहक तथा मालवाहक सवारीसाधनहरू बाटोमा अलपत्र परेका छन् । अलपत्र यात्रुहरूलाई शनिबार दिउँसो जिल्ला प्रशासन कार्यालय र प्रहरीले पानी र खानाको व्यवस्था गरेको एसपी पुरीले बताए ।
अविरल वर्षापछिको बाढीपहिरोले मुग्लिन–नारायणगढ सडकमात्रै होइन, देशका विभिन्न मुख्य राजमार्गहरू पनि अवरुद्ध भएका छन् । कोशी राजमार्गको संखुवासभास्थित भोटखोला गाउँपालिका–४ बरुण र मकालु गाउँपालिका–३ एकुवामा अविरल वर्षापछि सडक पूर्णरूपमा बिग्रिएको छ । सिद्धिचरण लोकमार्गको उदयपुरको कटारी नगरपालिकारू–८ को सिरिरेमा पहिरोले सडक पूर्वरुपमा अवरुद्ध छ ।
साउनको २४ गते रसुवाको गोसाइँकुण्ड गाउँपालिका–२ मा पर्ने नेपाल–चीन जोड्ने पुल बाढीले बगाए पनि अझै पुनर्निर्माण हुन सकेको छैन, जसले गर्दा अझैसम्म पूर्णरूपमा यो सडक अवरुद्ध छ । अरनिको राजमार्गअन्तर्गत सिन्धुपाल्चोकको भोटेकोशी गाउँपालिका–२ मा पर्ने कोदारी र सोही गाउँपालिकाको वडा नम्बर ४ स्थित डाक्लाङमा पहिरोका कारण सडक पूर्णअवरुद्ध रहेको सडक विभागले जानकारी दिएको छ ।
दसैंको मुखमा मुख्य राजमार्ग नै अवरुद्ध भएपछि शनिबार दिउँसो भौतिक पूर्वाधार तथा यातायात मन्त्रालयमा छलफल भयो । भौतिक पूर्वाधारमन्त्री कुलमान घिसिङले राजमार्ग खुलाउन र वैकल्पिक व्यवस्थासमेत गराउन सम्बन्धित निकायलाई निर्देशन दिएको उनको सचिवालयले जानकारी दिएको छ ।
यात्रुवाहक सवारी सुरुङमार्गबाट सञ्चालन, दाउन्ने खण्डमा ठूला सवारीलाई रोक
दसैंमा घर जाने यात्रुलाई सहज बनाउन यात्रुवाहक सार्वजनिक सवारीसाधनलाई नागढुंगा–सिस्नेरी सुरुङमार्गबाट चल्न दिइने भएको छ । शनिबार भौतिक पूर्वाधार तथा यातायातमन्त्री कुलमान घिसिङले यात्रुवाहक सार्वजनिक सवारीसाधनलाई उक्त सुरुङमार्ग प्रयोग गर्ने व्यवस्था मिलाउन निर्देशन दिएका हुन् ।
मन्त्रालयको निर्णयमा भनिएको छ, ‘काठमाडौं उपत्यकाबाट बाहिर जाने सवारीसाधनहरूमध्ये यात्रुवाहक सार्वजनिक सवारीसाधनहरू सो सुरुङमार्ग (नागढुंगा–सिस्नेरी)बाट बाहिर जाने ।’मन्त्री घिसिङले चौबिसै घण्टा यात्रुलाई सडक अवस्थाबारे जानकारी दिन र गुनासो सुन्न तथा त्यसको व्यवस्थापनका लागि निर्देशन दिए । त्यसैगरी बाढीपहिरोले अवरुद्ध सडकहरु तत्काल सञ्चालनमा ल्याउन पनि निर्देशन दिएका छन् । आम नागरिकहरुलाई मौसम र सडकको अवस्था बुझेर मात्र यात्रा गर्न अनुरोध गर्दै सार्वजनिक सूचना जारी गर्ने निर्णयसमेत भएको छ ।
मुलुकभरिको सडकहरुको अवस्था र सुरक्षालाई व्यवस्थित गर्न २४ घण्टा नै सञ्चालन हुनेगरी ‘फोकल पर्सन’ समेतको व्यवस्थापन गर्नरगराउन सडक विभागलाई निर्देशन दिइएको छ ।
दाउन्ने खण्डमा ठूला सवारीलाई रोक
बुटवल–नारायणघाट सडकको दाउन्ने खण्डमा दसैं अवधिमा ठूला भारवाहन (१२ चक्के र सोभन्दा माथि) सवारीसाधन सञ्चालन नहुने भएको छ । भौतिक पूर्वाधार तथा यातायातमन्त्री घिसिङको अध्यक्षतामा शनिबार बसेको बैठकले दसैंको अवधिभर यात्रुवाहक सवारीहरूको चाप बढ्ने हुँदा ठूला भारवाहन सवारीलाई सञ्चालनमा रोक लगाउने निर्णय गरेको हो । यद्यपि, बैठकले खाद्यान्नलगायतका अत्यावश्यक सामाग्रीहरू ढुवानी गर्ने सवारीसाधनलाई भने सञ्चालनमा रोक नलगाउने निर्णय गरेको यातायात व्यवस्था विभागले जानकारी दिएको छ ।
