अन्तरिम सरकार गठन भइसकेको छ । निर्वाचनको मिति घोषणा भएको छ । एउटा जिम्मेवार लोकतान्त्रिक पार्टी भएकोले तोकिएको समयमा निर्वाचन सुनिश्चित गराऔं, यसको निमित्त निर्वाचन गराउने जिम्मेवारी लिएर आएको सरकारलाई सहयोग गरौं ।
गगन थापा
महामन्त्री, नेपाली कांग्रेस
काठमाडौं- प्रतिनिधिसभा विघटनको विरोधमा उत्रिएका दलहरु मध्यावधि चुनावमा भने जान तयार भएका देखिन्छन् । जेन–जी आन्दोलनको बलमा प्रधानमन्त्री बनेकी सुशीला कार्की नेतृत्वको सरकारले आगामी फागुन २१ गते प्रतिनिधिसभाको निर्वाचन घोषणा गरेसँगै दलहरुले यस्तो संकेत गरेका हुन् ।
विघटित प्रतिनिधिसभाको सबैभन्दा ठूलो दल नेपाली कांग्रेसका महामन्त्री गगन थापाले कार्की नेतृत्वको सरकारलाई सघाउन अपिल गरेका छन् । जेन–जीको आन्दोलनपछि सिर्जना भएको परिस्थितिलाई स्वीकार गर्दै चुनावमा जानुको विकल्प नभएको उनले बताएका छन् । ‘अन्तरिम सरकार गठन भइसकेको छ, निर्वाचनको मिति घोषणा भएको छ । एउटा जिम्मेवार लोकतान्त्रिक पार्टी भएकोले तोकिएको समयमा निर्वाचन सुनिश्चित गराऔं, यसको निमित्त निर्वाचन गराउने जिम्मेवारी लिएर आएको सरकारलाई सहयोग गरौं,’ थापाले सोमबार विज्ञप्तिमार्फत भनेका छन् ।
यो सरकार अन्तरिम सरकार भएका नाताले उसको कर्तव्य समयमा निर्वाचन गराउने हो, शान्ति सुरक्षाको वातावरण तयार गरेर समयमा निर्वाचन गराउने क्रममा सरकारको ध्यान जाने छ । मुलुकलाई संविधानतर्फ फर्काउनका लागि तोकिएकै समयमा निर्वाचन गर्न जरुरी छ ।
शंकर पोखरेल
महासचिव, नेकपा एमाले
तोकिएकै मितिमा निष्पक्ष निर्वाचन सम्पन्न गरेर संविधान र लोकतन्त्रलाई ट्र्याकमा ल्याउनु अहिलेको मुख्य विषय भएको उनले बताएका छन् । अघिल्लो दिनमात्र कांग्रेस उपसभापति पूर्णबहादुर खड्काले प्रतिनिधिसभाको विघटन असंवैधानिक रहेको बताएका थिए । ‘संविधानबमोजिम जनताबाट लोकतान्त्रिक विधिअनुसार निर्वाचित देशकै सर्वोच्च प्रतिनिधिमूलक संस्था प्रतिनिधिसभाको विघटनको कार्य पूर्णरुपमा अलोकतान्त्रिक र असंवैधानिक छ,’ आइतबार उपसभापति खड्काले जारी गरेको विज्ञप्तिमा भनिएको छ । कांग्रेस सभापति शेरबहादुर देउवा भदौ २३ गते जेन–जीको प्रदर्शनको क्रममा आफ्नै निवासमा आक्रमणमा परी घाइते भएका छन् । देउवा उपचारमै भएकोले कांग्रेसका आधिकारिक धारणा भने केन्द्रीय समिति बैठकपछि मात्र आउने कांग्रेस प्रवक्ता डा. प्रकाशशरण महत बताउँछन् ।
अन्तरिम सरकार बनेर निर्वाचनको मिति घोषणा भइसकेको छ । त्यही स्थितिबाट घोषित मितिमा चुनाव हुनुपर्छ भनेर एकजुट भएर जानुपर्ने अहिलेको आवश्यकता हो ।
नारायणकाजी श्रेष्ठ
वरिष्ठ उपाध्यक्ष, माओवादी केन्द्र
प्रतिनिधिसभामा दोस्रो रहेको नेकपा एमालेका महासचिव शंकर पोखरेलले पनि निर्वाचनमा जान आफ्नो पार्टी तयार रहेको बताएका छन् । सोमबार एमालेको मुख्यालय च्यासल पुगेर महासचिव पोखरेलले शान्ति सुरक्षाको वातावरण तयार गरेर समयमै निर्वाचन गराउन सरकारले काम गर्ने विश्वास व्यक्त गरे । ‘यो सरकार अन्तरिम सरकार भएका नाताले उसको कर्तव्य समयमा निर्वाचन गराउने कुरा हो, शान्ति सुरक्षाको वातावरण तयार गरेर समयमा निर्वाचन गराउने क्रममा सरकारको ध्यान जाने छ,’ पोखरेलले भने । एमाले लोकतान्त्रिक पार्टी भएकोले जनताको बीचमा ताजा जनादेशका लागि जान तयार रहेको उल्लेख गरे । ‘नेपालका सबै लोकतान्त्रिक पार्टीहरू जनतामा गएर जनताका बीचबाट अभिमत प्राप्त गर्ने प्रक्रियामा प्रवेश गर्नु पर्दछ भन्ने हामी ठान्दछौं । किनकि जनमत प्राप्त गर्ने माध्यम भनेको सधैंभरि सडक हुन सक्दैन,’ पोखरेलले भने ।
पोखरेलले चुनावमै जोड दिँदै संविधानतर्फ फर्काउन तोकिएकै समयमा चुनाव हुनुपर्ने बताए । ‘समाधान सधैँ सडकबाट खोज्ने हो भने स्थायित्व र विकास हुन सक्दैन । मुलुकलाई संविधानतर्फ फर्काउनका लागि तोकिएकै समयमा निर्वाचन गर्न जरुरी छ,’ उनले भने । जेनऔजी आन्दोलनका कारण प्रधानमन्त्रीबाट राजीनामा दिएका एमाले अध्यक्ष केपी शर्मा ओली अझै सेनाको सुरक्षामा छन् । अध्यक्ष ओलीको धारणा आइनसकेकाले यसलाई एमालेको आधिकारिक धारणा मान्न नसकिने एमाले नेताहरु बताउँछन् । यद्यपि, महासचिव पोखरेल ओलीका विश्वासपात्र हुन् । यता तेस्रो ठूलो दल नेकपा माओवादी केन्द्रका वरिष्ठ उपाध्यक्ष नारायणकाजी श्रेष्ठले पनि चुनावमा जानुको विकल्प नरहेको बताएका छन् । सोमबार पेरिसडाँडास्थित पार्टीका क्षतिग्रस्त भवनमा पुगेर श्रेष्ठले चुनावमा एक भएर लग्न आग्रह गरेका हुन् । ‘अन्तरिम सरकार बनेर निर्वाचनको मिति घोषणा भइसकेको छ । त्यही स्थितिबाट घोषित मितिमा चुनाव हुनुपर्छ भनेर एकजुट भएर जानुपर्ने अहिलेको आवश्यकता हो,’ वरिष्ठ उपाध्यक्ष श्रेष्ठले भने ।
कार्की नेतृत्वको चुनावी सरकार असफल भएमा देशमा गम्भीर संकट आउने श्रेष्ठको तर्क छ । यसैले उनले सरकार पनि चुनाव केन्द्रित गतिविधिमा लाग्नुपर्ने बताए । ‘अहिलेको आवश्यकतालाई ध्यान दिएर जेन–जी आन्दोलनको उपलब्धिलाई कुनै हालतमा गुम्न नदिनेगरी अहिले अन्तरिम सरकारलाई सफल पार्न हामीले मदत गर्नुपर्दछ,’ श्रेष्ठले भने, ‘सरकारले मुख्य कुरा यसैलाई बनाओस् । अरु छिटफुट कुरामा तपाईंहरू नलाग्नुहोस् । निर्वाचन सम्पन्न गर्ने कुरालाई केन्द्रित गरेर त्यसमै लाग्नुहोस् ।’ माओवादी केन्द्रका अध्यक्ष पुष्पकमल दाहाल पनि जेन–जीको प्रदर्शनयता नेपाली सेनाको निगरानीमा छन् । देउवा, ओली, दाहालसहित दलका अधिकांश नेताहरुको निवास जेन–जी प्रदर्शनका क्रममा आगजनी गरिएको छ । शनिबारमात्र राष्ट्रपति रामचन्द्र पौडेलले निर्वाचन सफल गराउन सबै पक्षलाई अपिलसमेत गरेका छन् । ‘बडो जुक्तिपूर्ण ढंगले प्राप्त अवसरको सदुपयोग गर्दै जनता रिझाउने र आफैं संयमित रहँदै चुनाव सम्पन्न गराउन सहयोग गर्न सबैलाई हार्दिक अपिल गर्दछु,’ राष्ट्रपति पौडेलको वक्तव्यमा भनिएको छ ।
चुनाव घोषणा भएसँगै कार्की नेतृत्वको अन्तरिम सरकार चुनावी सरकारको रुपमा परिणत भएको छ । आइतबार प्रधानमन्त्रीको पदभार ग्रहणपछि कार्कीले छ महिनामा चुनाव गरेर छाड्ने बताएकी छन् । ‘छ महिनामा आफ्नो काम कारबाही गरेर मुक्त हुने र नयाँ आउने मन्त्रीहरूलाई जिम्मेवारी र दायित्व सुम्पिने अठोट गरेका छौं । यो अठोटमा यहाँहरूको साथ नपाइकन सम्भव छैन । सुरक्षा निकायले पनि साथ नदिइकन सम्भव छैन । हेर्नुस्, मलाई सहयोग गर्नुस्,’ कार्कीले पदभार ग्रहणका क्रममा भनेकी छन् ।
