काठमाडौं-उपसभामुख इन्दिरा रानाले मुलुकको अर्थतन्त्रको दरिलो आधारका रूपमा पर्यटन रहेको बताईन । राननले रेष्टुरेन्ट तथा बार एसोसिएसन नेपाल (रेबान) को ३५औँ वार्षिक साधारणसभा बताएकी हुन् ।
पर्यटन क्षेत्रको विकास प्रवद्र्धनका लागि सबै सरोकारवाला एकताबद्ध भएर लाग्नुपर्नेमा जोड दिइन् । रेष्टुरेन्ट तथा बार एसोसिएसन नेपाल (रेबान) को ३५औँ वार्षिक साधारणसभाको आज यहाँ उद्घाटन गर्दै उनले पर्यटनसँगै संस्कृति प्रवद्र्धनमा समेत रेबान, होटल सङ्घलगायतको महत्त्वपूर्ण भूमिका हुने उल्लेख गरिन् ।
उपसभामुख रानाले आतिथ्य उद्योगले गुणस्तरीय पर्यटकीय सेवाको सुनिश्चित गर्दै पर्यटन प्रवद्र्धनमा केन्द्रित हुनुपर्नेमा जोड दिइन् । उनले दिगो पर्यटन विकासका लागि पूर्वाधारमा लगानी अभिवृद्धि गरी सेवालाई विशिष्टीकृत बनाउन जरुरी भएको खाँचो औँल्याईन् । उपसभामुख रानाले आतिथ्य व्यवसायमा नवप्रवर्तन र ‘डिजिटाइजेसन’लाई प्राथमिकता दिइनुपर्ने धारणा राखिन् ।
कार्यक्रममा नेपाल उद्योग वाणिज्य महासङ्घका वरिष्ठ उपाध्यक्ष अन्जान श्रेष्ठले आर्थिको विकासको महत्वपूर्ण पाटो पर्यटन क्षेत्रलाई राज्यले विशेष प्रोत्साहन गरिनुपर्नेमा जोड दिइन् । उनले लयमा रहेको अर्थतन्त्रलाई सबलीकरण गर्न सबै जिम्मेबार भएर लाग्नुपर्नेमा जोड दिइन् ।
पूर्वराजदूत महेश दाहालले रेष्टुरेन्ट व्यवसाय पर्यटन प्रवद्र्धन मात्रै नभई देशको कला संस्कृतिको संरक्षण प्रवद्र्धनमा समेत महत्वपूर्ण भूमिका खेलेको उल्लेख गरे । उनले नेपालको पहिचानलाई अन्तरराष्ट्रियजगत्मा प्रवद्र्धन गर्न योगदान पुर्याएको पर्यटन व्यवसायलाई राज्यका तर्फबाट प्रोत्साहन जरुरी भएको बताए ।
होटल सङ्घ नेपालका अध्यक्ष विनायक शाहले ठूलो लगानी रहेको आतिथ्य उद्योगको क्षमताको पूर्ण उपयोग हुन नसक्दा लगानीकर्तामा निराशा छाएको भन्दै यसतर्फ नीतिगत सुधारको खाँचो औँल्याए । वरिष्ठ पर्यटन व्यवसायी किशोरराज पाण्डेले सरकार र निजी क्षेत्रको साझेदारितामा पर्यटन प्रवर्द्धनको कामलाई प्रभावकारी बनाइनुपर्नेमा जोड दिए ।
रेबानका अध्यक्ष सङ्घर्ष बिष्टले मुलुकको अर्थतन्त्रमा योगदान दिइरहेको रोष्टुरेन्ट व्यवसायलाई राज्यले उद्योग सरह मान्यता दिनुपर्ने माग गरे । उनले भने,‘रेष्टुरेन्टमा अर्बौं लगानी छ । व्यवसायलाई चलायमान बनाउन र आर्थिक रूपमा सबल बनाउन राज्यले प्रोत्साहन गर्नुपर्छ ।’रेबानका उपाध्यक्ष नरेशध्वज श्रेष्ठले रेष्टुरेन्ट व्यवसायलाई राज्यका तर्फबाट उद्योगसरह मान्यता दिएर आवश्यक छुट र सहुलियतको व्यवस्था गर्न माग गरे । रेबान पोखराका उपाध्यक्ष विकास भट्टराईले पर्यटन विकासका लागि नीतिगत सुधार जरुरी भएको उल्लेख गरे ।
