व्यापारको कुरामा चीनको पनि स्पष्ट कुरा देखिएन । यो विषयमा आसन्न प्रधानमन्त्री केपी शर्मा ओलीको भ्रमणका क्रममा छोटो वार्ता गर्ने हाम्रो योजना रहेको छ ।
पृथ्वीसुब्बा गुरुङ
प्रवक्ता, नेपाल सरकार
काठमाडौं- नेपालको भूमि लिपुलेकलाई व्यापारिक केन्द्र बनाउने विषयमा चीन र भारतबीच भएको सहमतिको विषयमा सरकारले उच्चस्तरीय छलफल गर्ने भएको छ । प्रधानमन्त्री केपी शर्मा ओलीको आसन्न चीन भ्रमणको क्रममा लिपुलेकको विषयमा कुरा उठाउने सरकारका प्रवक्ता एवं सञ्चार तथा सूचना प्रविधिमन्त्री पृथ्वीसुब्बा गुरुङले बुधबार जानकारी दिए ।
‘व्यापारको कुरामा चीनको पनि स्पष्ट कुरा देखिएन । यो विषयमा आसन्न प्रधानमन्त्री केपी शर्मा ओलीको भ्रमणका क्रममा छोटो वार्ता गर्ने हाम्रो योजना रहेको छ,’ बुधबार मन्त्रिपरिषद्को निर्णय सार्वजनिक गर्न मन्त्रालयमा आयोजित पत्रकार सम्मेलनमा प्रवक्ता गुरुङले भने, ‘नेपाल र चीनको बीचमा भएका धेरै सम्झौता र बोर्डर इस्युमा एक खालको सहमति छ, त्यसमा लिपुलेक त हाम्रो हो भन्ने उनीहरुलाई थाहा छ नि त !’
भारतका राष्ट्रिय सुरक्षा सल्लाहकार अजित डोभालको निमन्त्रणमा यही भदौ २ र ३ गते नयाँदिल्ली पुगेका चिनियाँ विदेशमन्त्री वाङ यीले भारतसँग यस्तो सहमति गरेका हुन् । यो समाचार बाहिरिएसँगै प्रतिपक्षी दललगायतले चौतर्फी विरोध गर्दै आएका छन् । नेपाली भूमिमाथि दुई देशले यस्तो सहमति गरेकाले भारतीय प्रभानमन्त्री नरेन्द्र मोदी र चिनियाँ राष्ट्रपतिसँग प्रश्न सोध्नुपर्ने बेला आइसकेको सरकारका प्रवक्ता गुरुङको भनाइ थियो । ‘लिपुलेक, कालापानी र लिम्पियाधुराको बारेमा अब हाम्रो प्रश्न भारतीय प्रधानमन्त्री नरेन्द्र मोदीसँग मात्रै छैन । चिनियाँ राष्ट्रपति सी चिनफिङ या ली क्याङसँग पनि हाम्रो प्रश्न छ,’ उनले भने ।
शनिबार चीन जाँदै प्रधानमन्त्री
प्रधानमन्त्री केपी शनिबार चीन जाँदै छन् । सांघाई सहयोग संगठनको शिखर सम्मेलनमा सहभागी हुन प्रधानमन्त्री ओली त्यसतर्फ जान लागेका हुन् । भ्रमणका क्रममा प्रधानमन्त्री ओलीले चिनियाँ राष्ट्रपति सीसँग द्विपक्षीय भेटवार्ता गर्ने छन् । यही भेटमा लिपुलेकको विषय उठाउने तयारी सरकारले गरेको छ ।
प्रधानमन्त्री ओलीले भदौ १६ गते शिखर सम्मेलनलाई सम्बोधन गर्ने कार्यक्रम छ । सोही दिन विभिन्न राष्ट्रका नेताहरूसँग पनि भेटवार्ता गर्ने छन् । त्यसैगरी १७ गते प्रधानमन्त्री ओलीले बेइजिङमा चीनका उपराष्ट्रपति हान झेङसँग भेटवार्ता गर्ने छन् । प्रधानमन्त्री ओलीसँगै ओलीपत्नी राधिका शाक्य, शिक्षामन्त्री रघुजी पन्त, संस्कृति, पर्यटन तथा नागरिक उड्डयनमन्त्री बद्रीप्रसाद पाण्डे, कांग्रेसका उपसभापति पूर्णबहादुर खड्का, प्रधानमन्त्रीका आर्थिक तथा विकास सल्लाहकार डा. युवराज खतिवडा, एमाले सांसद छविलाल विश्वकर्मासहित उच्चपदस्थ सरकारी अधिकारीहरू सहभागी हुने छन् । प्रधानमन्त्री ओली १८ गते स्वदेश फर्किने कार्यक्रम छ ।
