काठमाडौं- संसद भवन नयाँ बानेश्वर र सिंहदरबारको मध्यविन्दुमा पर्ने गरी पूर्व राष्ट्रपति विद्या भण्डारीले आफ्नो सम्पर्क कार्यालय खोलेकी छन् । यसरी सम्पर्क कार्यालय खडा गर्नुको मुख्य उद्देश्य हो च्यासलविरुद्ध चुनौति दिनु ।
च्यासल अर्थात् एमाले अध्यक्षसमेत रहेका प्रधानमन्त्री केपी शर्मा ओलीको दबाबमा दुई वर्षअघि नवीकरण गरिएको पार्टी सदस्य ‘होल्ड’मा राखिएको थियो । त्यसपछि साउन ९ गते बबरमहलको कार्की ब्याङक्वेटमा भण्डारीले पत्रकार सम्मेलन आयोजना गरी दुखेसो पोखेकी थिइन् । त्यतिबेला नै धेरैले अनुमान गरेका थिए - पत्रकार सम्मेलनमार्फत विद्याले ओलीलाई चुनौति दिनेछिन् । उक्त दिन मौन बसेकी विद्याले बिहीबार भने ओलीसामु चुनौति पेश गरेकी छन् । ‘आफ्नो त पार्टीको सदस्यतामै च्यासलले प्रश्न उठाएको छ । साथीहरुले मलाई नेता भन्छन् । ४५ वर्ष भयो सदस्य भएको । पार्टीले विशेष निर्णय गरेर राष्ट्रपति भएँ,’ बिहीबार नयाँ कार्यालय पुगेकी विद्याले भनिन्, ‘एमालेको कार्यकर्ता बनेर काम गर्न चाहन्छु र गर्छु । पार्टीले जिम्मेवारी देओस् या नदेओस् । काम गर्ने हो । पार्टीको विसंगतिविरुद्ध लड्ने हो ।’
भण्डारी ओलीविरुद्ध आक्रामकसमेत सुनिइन् । पछिल्लो दिन सरकारप्रति चौतर्फी आक्रोश सुनिन्छ । दलभित्र पनि ओलीको तानाशाही प्रवृत्ति मौलाएको नेताहरु नै आरोप लगाउँछन् । तर एमालेमा ओलीविरुद्ध बोल्ने नेताहरुमाथि कारबाहीको दण्ड चलाइन्छ । ‘मैंले सबै कुरा नजिकबाट हेरिरहेकी छु । हामी आन्दोलनमा आउँदा एमाले जन्मिएको पनि थिएन,’ विद्याले भनिन्, ‘अहिले एमाले भनेको एउटा ब्रान्डजस्तो बनेको छ । खास नेपाल कम्युनिस्ट पार्टी हो । पूर्ण लोकतन्त्रको युगमा प्रवेश गरेको बेला राजनीतिक दलभित्र विसंगति विकृति फस्टाएको छ ।’ राजनीनिक दलहरुका कारण युवाहरुमा निराश छाएको उल्लेख गर्दै भण्डारीले एमालेको हिँडाईमाथिसमेत प्रश्न उठाए । ‘राजनीति भनेको जनताको समस्या समाधान गर्नु नै हो । राजनीतिक दलहरु राम्ररी चलेका छैनन् । समस्या कसरी समाधान गर्ने ? यसमा जानु प¥यो । युवाहरुमा निराश छाएको छ,’ उनले भनिन् । मदन भण्डारीले प्रतिवाद गरेको जबजको सान्दर्भिकता अझै रहेको उल्लेख गर्दै उनले एमाले यस बाटोमा हिँडेको छ कि छैन भनी प्रश्न गरिन् ।
अहिले संसद्समेत निरीह भएको र आरोप लाग्दैमा निलम्बन गर्न थालिएकोप्रतिसमेत उनले चिन्ता जनाइन् । ‘राज्यका संयन्त्र राम्ररी चलेको छैन । संसद पनि निरीह भए । सविधान संशोधन गर्ने भनेका छन् । कसलाई आरोप लाग्यो उसले बोल्न पाइँदैन । आरोप लाग्दैमा निलम्बन भइहाल्ने कुन व्यवस्था हो यो ?’ सरकारको कार्यशैलीप्रति विद्याले प्रश्न उठाइन् । आरोप पुष्टि नभएसम्म निलम्बन गर्न नहुने विद्याको धारणा रह्यो । ‘जनताका निर्वाचित प्रतिनिधि दोषी हो कि होइन ? निलम्बन गरिहाल्ने,’ उनले भनिन् ।
संसदमा लामो छलफल चल्दा पनि कानुन बन्न सकिरहेको छैन । जसका कारण जमिन वितरणदेखि घरजग्गा व्यवसाय ठप्प छ । यसको मुख्य दोषी सत्ताामा बसेका नेपाली कांग्रेस र एमाले भएको उनले इंगित गरिन् । ‘देशका प्रमुख पार्टीहरू के हेरेर बसिरहेका छन् । म एउटा पार्टीको संस्थापक पनि हो । मूल्य र मान्यता अनुसार नै जानुपर्छ । आज किन सांसद निरिह भएका छन् । किन एउटा कानुन बनाउन सक्दैन । एउटा वडा अध्यक्ष उठाउन पनि नेताको आदेश कुर्नुपर्छ,’ विद्याले प्रश्न गरिन् । देशको अर्थतन्त्र संकटोन्मुख रहेको छ । उद्योग चलेका छैनन् । यस्तो अवस्थामा खुट्टाले टेक्नुपर्ने देश टाउकाले टेकेर हिँडिरहेको उनको भनाई थियो ।
तीन उपाध्यक्षको साथ
भण्डारीको सम्पर्क कार्यालय उद्घाटनमा एमालेका ३ जना उपाध्यक्षहरू सहभागी भए । कार्यक्रममा वरिष्ठ उपाध्यक्ष ईश्वर पोखरेल, उपाध्यक्ष युवराज ज्ञवाली र सुरेन्द्र पाण्डे अतिथिका रूपमा सहभागी थिए । कार्यक्रममा वरिष्ठ उपाध्यक्ष पोखरेलले ओलीप्रति कटाक्ष गर्दै भने, ‘कहिलेकाहीँ विचारकै टोपी लाउनेहरुले विचारलाई क्षतविक्षत बनाइरहेका हुन्छन् । यो चिज बुझ्नुपर्ने आवश्यकता छ । त्यसकारणले टोपी लाएर प्रश्न बोल्नेहरु मात्रै विचारका संवाहक हुन्छन् भन्ने ठान्ने भूल गर्नु हुँदैन । यस्तो अवस्थामा विचारको रक्षा गर्नुपर्ने जरुरी छ ।’
गत असार १४ गते मदन भण्डारी फाउण्डेसनले आयोजना गरेको कार्यक्रममा ओलीले जबज भण्डारीले मात्रै प्रतिवादन गरेको सिद्धान्त नभएको जिकिर गरेका थिए । ज्ञवाली र पाण्डेले विद्यालाई सक्रिय राजनीतिमा आउने बाटो बन्द गर्न नहुने पक्षमा पार्टीभित्र मत राख्दै आएका छन् । साउन पहिलो साता बसेको एमाले केन्द्रीय कमिटी बैठकले विद्याको पार्टी सदस्यता निष्क्रिय बनाउने निर्णय गरेको थियो ।
