काठमाण्डौं- नेपाल पर्वतारोहण संघ (NMA) को आगामी भदौ ८ गते हुने निर्वाचनमा सदस्य पदका लागि उम्मेदवारी दिएका चार जना उम्मेदवारहरूले संयुक्त सन्देश सार्वजनिक गरका छन् ।
संखुवासभा, चैनपुर-५का सन्देश शेर्पा , संखुवासभा, भोटखोला-३, हुङ्गुङका जेनजेन लामा , संखुवासभा, याफु-९का मिङमार शेर्पा र सोलुखुम्बु, माप्य दूधकोशी गाउँपालिका-१का फुर्तेन्जी शेर्पाले सम्पूर्ण पर्वतारोहण क्षेत्रका सरोकारवालाहरू समक्ष हार्दिक अपिल गरेका हुन् ।
हामी सबैको साझा उद्देश्य, विगत लामो समयदेखि विभिन्न चरणमा हिमाल क्षेत्रमा कार्यरत हुँदै भोगिएका समस्याहरूको बुझाइका आधारमा, तिनको दीर्घकालीन समाधानका लागि स्पष्ट र सशक्त भूमिका निर्वाह गर्नु रहेको उनीहरुले बताए ।
उनीहरुका अनुसार विशेषतः पर्वतारोहण क्षेत्रमा क्रियाशील युवाहरूको सहभागिता र सक्रिय भूमिकाको खाँचो अझ बढी महसुस भइरहेका सन्दर्भमा, युवाको सशक्त उपस्थिति र आवाजलाई संस्थागत तहमा प्रतिनिधित्व दिन अग्रसर भएको बताएका छन् ।
त्यसै सन्दर्भमा, भोलि आइतबार (भदौ १ गते) बिहान ८ बजे General Federation of Nepalese Trade Unions (GEFONT) को प्रांगणमा आयोजना हुन गइरहेको कार्यक्रमका लागि सम्पूर्ण पर्वतारोहण क्षेत्रका अभियन्ता, मार्गदर्शक, व्यवसायी, युवा र सरोकारवालाहरूको उपस्थितिको पनि आवहान् गरेका छन् ।
पर्वतीय क्षेत्रका समस्या सुल्झाउन नजिकबाट अनुभूति गरेका हामी युवाहरूले सदस्य पदमा उम्मेदवारी दिएका उनीहरुले बताएका छन् ।
उनीहरुले यो निर्वाचनलाई पर्वतीय समुदायको हक, अधिकार र विकासका लागि एउटा महत्वपूर्ण अवसरका रूपमा लिन र आफ्नो उपस्थिति सुनिश्चित गर्न आग्रह गरेका छन् ।
