जुनसुकै खेलका प्रतियोगितामा सहभागी हुन हिजोआज नेपाली खेलाडीहरु विदेशमा पुग्दा त्यहाँ रहेका नेपालीले भब्य स्वागत गर्ने गरेका छन् । नेपालको क्रिकेट, फुटबललगायतका टिमहरुको खेल हेर्न विदेशमा भएका नेपाली आ-आफ्नो कार्यस्थलमा बिदा लिएर पनि जुटने गरेका छन् । उनीहरु बाजागाजासहित नेपालका खेलाडीले लगाउने जर्सी नै लगाएर रंगशालामा उपस्थित हुँदा वातावरण नै अत्यन्त उत्साहजनक हुने गरेको छ । नेपाली खेलप्रेमीले विदेशी भूमिसमेतमा देखाएको यसप्रकारको सद्भावबाट नेपाली खेलाडी हौसला बढ्न गएको देखिएको छ ।
नेपाली राष्ट्रिय पुरुष क्रिकेट टिमका लागि यो वर्ष चुनौतीपूर्ण मानिएको छ । ‘टि–ट्वाण्टी’ विश्वकप क्रिकेट प्रतियोगितामा जसरी भए पनि छनोट हुनुपर्ने चुनौती नेपाली क्रिकेट टिमलाई रहेको छ । नेपालले सन् २०१४ मा पहिलोपटक तत्कालीन कप्तान पारस खडकाको नेतृत्वमा टि-ट्वाण्टी विश्वकप खेलेको थियो । दोस्रोपटक पुनः सन् २०२४ मा विश्वकपमा उत्साहजनक प्रदर्शन गरेको नेपाललाई तेस्रोपटक विश्वकपमा प्रवेश दिलाउन हाल नेपाल क्रिकेट संघ क्यानमा सचिवको जिम्मेवारी सम्हालिरहेका खडकासहितका पदाधिकारीको काँधमा आएको छ । यो वर्ष अक्टोबरमा ओमानमा आइसिसी पुरुष टि-ट्वाण्टी विश्वकपका लागि एसिया तथा पूर्वी एसिया प्रशान्त क्षेत्रको छनोट प्रतियोगिता सञ्चालन हुंँदै छ । छनोट प्रतियोगितामा सहभागी हुने कूल नौ टिममध्ये अग्रपंक्तिमा रहेका तीन मुलुक आगामी विश्वकपका लागि छनोट हुने छन् । नेपालले विश्वकपमा छनोटका लागि समूह चरणमा कुवेत र जापानको सामना गर्नुपर्ने छ ।
नेपालले यसअघि सन् २०२४ को विश्वकपमा राम्रो प्रदर्शन गरेर जुन स्तर स्थापित गरेको थियो त्यसको आधारमा नै आगामी विश्वकपका लागि पनि छनोट हुन सक्ने आँकलन गरिएको छ । अमेरिका तथा वेस्ट इण्डिजमा भएको सो विश्वकपमा नेपाल दोस्रो चरणमा पुग्न नसके पनि दक्षिण अफ्रिका तथा बंगलादेशजस्ता मुलुकसँग झिनो अन्तरले पराजित हुनु त्यति सहज थिएन । केही दिनअघि भारतको बेंगलोरमा भएको प्रशिक्षण पनि राम्रो भएको र अब अस्ट्रेलियामा नेपालले टप इण्ड टि-ट्वाण्टी क्रिकेट प्रतियोगितामा उचित प्रदर्शन गर्ने तयारी भएको छ । नेपालले अस्ट्रेलियाका विभिन्न टिमलगायत पाकिस्तान र बंगलादेशजस्ता बलिया टिमसँग खेल्न पाउनाले थप अनुभव हासिल हुने छ ।
गत मार्चमा नेपाली राष्ट्रिय क्रिकेट टिमको मुख्य प्रशिक्षकको जिम्मेवारी सम्हालेका अस्ट्रेलियाली नागरिक स्टुवार्ट लको प्रशिक्षणमा नेपाली क्रिकेट टिम अस्ट्रेलिया पुगेको छ । उनी अस्ट्रेलियाको राष्ट्रिय टिमका पूर्वब्याटर हुन् । नयाँ प्रशिक्षक स्टुवार्टले अस्ट्रेलियाबाट सुखद् सुरुआत गर्ने अनुमान गरिएको छ । नेपालले आगामी विश्वकपको छनोट चरणको तयारीस्वरुप अस्ट्रेलियाको डार्बिनमा अगस्ट १४ देखि अगस्ट २४ सम्म आयोजना हुने टप एण्ड टि–ट्वाण्टी क्रिकेट प्रतियोगितामा केही शीर्ष अन्तर्राष्ट्रिय तथा घरेलु टोलीको सामना गर्ने छ । उक्त प्रतियोगितामा नेपालले पहिलोपटक भाग लिन लागेको हो । आगामी विश्वकपको छनोटको तयारीको रूपमा यस प्रतियोगितालाई हेरिएको छ । नेपालले पहिलो खेल अस्ट्रेलियाको नर्दन टेरिटोरी स्ट्राइकसँग शुक्रबार पहिलो खेल खेल्दै छ ।
यसअघि नेपालले यसै वर्ष नेदरल्याण्डस तथा स्कटल्याण्डविरुद्ध टि–ट्वाण्टी शृंखला खेलेर दोस्रो स्थान हासिल गरेको थियो । विश्वकप छनोट खेल्नुअघि नेपाली टिमले यही सेप्टेम्बरमा सारजाहाँमा वेस्ट इण्डिजसँग खेल्ने मैत्रीपूर्ण शृंखलाले पनि नेपाली खेलाडीलाई थप खेल कौशल सिक्ने अवसर प्राप्त हुने आशा गरिएको छ । नेपाली खेलकुद क्षेत्रमा आज क्रिकेट खेल अग्रणी खेलका रूपमा स्थापित भइसकेको छ । क्रिकेटको माध्यमबाट आज विश्वमा नेपालको बेग्लै परिचय बनेको छ । राष्ट्रिय खेलकुद परिषद्अन्तर्गत रहेका सयौं खेल संघमध्ये खेल गतिविधि तथा उपलब्धिका हिसाबले नेपाल क्रिकेट संघलाई सफल संघ मानिएको छ ।
नेपाली टिममा बिगतमा अस्ट्रेलियामा खेल अनुभव बटुलिसकेका लेग स्पिनर सन्दिप लामिछाने पनि टिममा हुनाले टिमलाई सहज भएको छ । अस्ट्रेलियाका क्लबका साथै खेलाडीहरुसँगसमेत लामिछाने परिचित छन् । लामिछानेले अस्ट्रेलियामा व्यावसायिक खेलाडीका रूपमा स्थानीय क्लबसँग अनुबन्ध भई खेलको अनुभव बटुलिसकेका छन् । अस्ट्रेलियाको फेञ्चाइज टि–ट्वाण्टी लिग बिग ब्यास बिबिएलमा लामिछाने सहभागिता रहेको थियो । अस्ट्रेलियाको मेलबर्न स्टार्स, होबर्ट हुरिकान्सजस्ता क्लबमा उनी आबद्ध भएका थिए । सन् २०१६ मै अस्ट्रेलियाका पूर्वकप्तान माइकल क्लार्कको रोजाइमा परेका लामिछानेलाई सिड्नीको वेस्टर्न सबर्ब क्लबमा खेल्न आमन्त्रण गरिएको थियो । हाल क्यानसँग केन्द्रीय सम्झौतामा नरहे पनि लामिछाने निरन्तर नेपाली राष्ट्रिय टिममा आबद्ध रहीआएका छन् । लामिछानेको खेलको कदर गर्दै उनको गृहजिल्ला स्याङ्जाको थाप्ले गाँउपालिकामा क्रिकेट रंगशाला बनाउन सुरु गरिनुका साथै कक्षा ४ को पाठ्यक्रममा लामिछानेको जीवनी पनि समावेश गरिएको छ ।
विगतमा भएका कयौं महŒवपूर्ण राष्ट्रिय तथा अन्तर्राष्ट्रिय प्रतियोगितामा कुशल खेलको माध्यमबाट योगदान गर्दै आएका ललित राजवंशी मुलुकले अन्तर्राष्ट्रिय प्रतिस्पर्धा गरिरहँदा मातृशोकमा छन् । पारिवारिक शोकमा परेका ललित अस्ट्रेलिया प्रस्थान गर्न असमर्थ भएपछि शाहब आलमलाई टिममा समावेश गरिएको थियो । पाली राष्ट्रिय क्रिकेट टिम अस्ट्रेलिया प्रस्थान गर्नुअघि नै नेपाल प्रिमियर लिग एनपिएलको आगामी संस्करणका लागि खेलाडीको अक्सन हुनाले पनि खेलाडीको मनोबल बढ्न गएको छ । खेलाडी भएर जीवनयापन गर्न धौधौ पर्ने मुलुकमा एउटै प्रतियोगितका लागि लाखौं रुपैयाँ पारिश्रमिक घोषणा गरिनाले खेलाडी उत्साहित भएका थिए । एनपिएलमा सहभागी हुने आठवटै टिमका लागि राष्ट्रिय टिमका आठ जना खेलाडीका रूपमा चयन गरिएको थियो । उनीहरुले गत वर्षजस्तै लाखौं पारिश्रमिक पाउने निश्चित भए पनि रकम भने सार्वजनिक गरिएको छैन । अक्सनबाट भने कूल ९१ जना खेलाडी छानिएका थिए । उनीहरुले न्यूनतम् दुई लाखदेखि १५ लाख रुपैयाँसम्म पारिश्रमिक पाउने घोषणा गरिएको थियो ।
अस्ट्रेलियामा हालै आयोजित एउटा क्रिकेट प्रतियोगिताको समापनका अवसरमा नेपाली राष्ट्रिय क्रिकेट टिमका पूर्वप्रमुख प्रशिक्षक जगत टमाटालाई प्रमुख अतिथिका रूपमा आमन्त्रण गरिएको थियो । अस्ट्रेलियामा रहेको सगरमाथा क्रिकेट क्लब प्रथम भएको उक्त सामुदायिक प्रतियोगिताको समापनका बेला प्रशिक्षक टमाटाले नेपालको क्रिकेटको विकासमा आबद्ध भइसकेका विभिन्न व्यक्ति तथा आफ्ना पुराना चेलासमेतलाई भेटेका थिए । अस्ट्रेलियामा रहेको नेपलिज क्रिकेट एसोसिएसन अफ अस्ट्रेलियाजस्ता संस्थाले क्रिकेटको माध्यमबाट नेपाली तथा अस्ट्रेलियाली समुदायबीच सम्बन्ध सुमधुर बनाउने कार्य गर्दै आइरहेको छ ।
विगतमा नेपालमा राष्ट्रिय टिमका साथै विभिन्न तहमा क्रिकेट खेलेका खेलाडी अहिले अस्ट्रेलियामा विभिन्न पेसामा आबद्ध भए पनि बेलाबखत क्रिकेट मैदानमा जुट्ने गरेका छन् । केही नेपाली खेलाडी स्थानीय क्लबसँग अनुबन्ध भई खेल्ने गरेका छन् । नेपालमा आयोजित एनपिएल लिगमा अस्ट्रेलियामा रहेका नेपाली खेलाडीको पनि प्रतिनिधित्व भएको छ । नेपालमा जस्तै अस्ट्रेलियामा पनि एनपिएल अस्ट्रेलिया क्रिकेट प्रतियोगिता आयोजना हुनु गौरवको प्रसंग मानिएको छ । जुनसुकै खेलका प्रतियोगितामा सहभागी हुन हिजोआज नेपाली खेलाडीहरु विदेशमा पुग्दा त्यहाँ रहेका नेपालीले भब्य स्वागत गर्ने गरेका छन् । नेपालको क्रिकेट, फुटबललगायतका टिमहरुको खेल हेर्न विदेशमा भएका नेपाली आ-आफ्नो कार्यस्थलमा बिदा लिएर पनि जुटने गरेका छन् । उनीहरु बाजागाजासहित नेपालका खेलाडीले लगाउने जर्सी नै लगाएर रंगशालामा उपस्थित हुँदा वातावरण नै अत्यन्त उत्साहजनक हुने गरेको छ ।
नेपाली खेलप्रेमीले विदेशी भूमिसमेतमा देखाएको यसप्रकारको सद्भावबाट नेपाली खेलाडी हौसला बढ्न गएको देखिएको छ । अस्ट्रेलियामा ठूलो संख्यामा नेपाली बसोबास गर्दै आइरहेका छन् । यसपालि डार्बिनमा हुने क्रिकेट प्रतियोगितामा नेपालको खेल भएको दिन अत्यधिक संख्यामा नेपाली खेलप्रेमी उपस्थित हुनसक्ने अपेक्षा गर्न सकिन्छ । नेपाली क्रिकेट डार्बिनस्थित अन्तर्राष्ट्रिय विमानस्थलमा अवतरण हुँदा त्यहाँ रहेका नेपालीले गरेको भब्य स्वागत वास्तवमै उदाहरणीय थियो ।
विदेशमा बस्ने नेपालीको संगठन एनआरएनएले अस्ट्रेलियाली भूमिमा नेपाली क्रिकेट टिमलाई समर्थन र हौसला प्रदान गर्न आह्वान गरेको छ । अस्ट्रेलियामा रहेका खेलप्रेमी नेपालीलाई रातो र नीलो रङका कपडा लगाएर क्रिकेट रंगशालामा एकसाथ उपस्थित हुन अनुरोध गर्दैं सो संस्थाले राष्ट्रिय झण्डासमेत लिएर आउन गरेको आग्रहले राष्ट्रिय टिमलाई खेल जित्न उत्प्रेरित गराउने छ । यस्तो कार्यले नेपाली संसारको जुनसुकै मुलुकमा पुगेता पनि राष्ट्रिय एकताको भावना सुदृढ बनाउन योगदान पुग्न जाने देखिएको छ । अनुभवी खेलाडी तथा प्रतिष्ठित टिमहरुसँग अस्ट्रेलियामा हुने प्रतिस्पर्धाबाट नेपाललाई आगामी विश्वकप प्रवेशका लागि ढोका खोल्न यथोचित खेल कौशल र रणनीति हासिल गर्ने यथोचित सहयोग पुग्न जाने आशा गरिएको छ । रासस
