काठमाडौं–धनुषामा प्रधानमन्त्री केपी शर्मा ओलीद्वारा मधेस प्रदेश प्रहरी कार्यालयको नवनिर्मित भवन उद्घाटन भएको छ । शुक्रबार जनकपुरधाम उपमहानगरपालिका नवनिर्मित भवन उद्घाटन भएको हो ।
जनकपुरधाम उपमहानगरपालिका ४ मा करिब २३ करोड १० लाख ४३ हजार ४०७ रुपैयाँ लागतमा प्रदेश प्रहरी कार्यालय भवन निर्माण गरिएको छ । उक्त भवन प्रधानमन्त्रीले उद्घाटन गर्ने कार्यक्रम रहेको मधेस प्रदेश गृह, सञ्चार तथा कानुन मन्त्रालयका प्रवक्ता गणेश नायकले जानकारी दिए ।
विसं २०८० असोज १० निर्माण सम्झौता भई भवन निर्माण सुरु भएको थियो । प्रधानमन्त्री ओलीले आजै महोत्तरीको सोनमा गाउँपालिकामा कालोपत्र सडक निर्माणको शिलान्यास गर्ने कार्यक्रमसमेत रहेको पूर्वाधार विकास कार्यालय जलेश्वरका प्रमुख राजेलाल कर्णले जानकारी दिए ।
प्रदेशको भौतिक पूर्वाधार विकास मन्त्रालयको साझेदारी तथा विश्व बैंकको ऋण सहयोगमा सञ्चालित प्रादेशिक तथा स्थानीय सडक सुधार आयोजनाअन्तर्गत महोत्तरीको हुलाकी राजमार्ग रघुनाथपुर बजार-सोनमा-तरहारी सुन्दरपुर खण्डको आठ दशमलव ३८४ किलोमिटर सडक कालोपत्र गर्न लागिएको हो ।
विसं २०८३ चैत ११ गतेभित्र सम्पन्न गर्नुपर्ने यस परियोजनाको कूल ३४ करोड ६९ लाख ५० हजार ६१६ रुपैयाँ रहेको छ । विश्व बैंकको ऋण सहयोगबाट निर्माण हुने यो सडक १९करोड सात लाख ८३ हजार ६१८ रुपैयाँमा ठेक्का सम्झौता भएको छ । यस योजनाअन्तर्गत प्रदेशका २१ स्थानीय तहका केन्द्रहरूलाई पक्की सडक सञ्जालसँग जोडिने छ ।
