प्रज्ज्वलको प्रचार लोभलाग्दो, एमालेको साथ पाउनेमा ढुक्क
यता राष्ट्रिय प्रजातन्त्र पार्टी (राप्राप)बाट प्रज्ज्वल बोहोरा आफ्ना दिवंगत बुवा दीपक बोहोराका विरासत थाम्न भन्दै सक्रियता देखाउन थालेका छन् । एमालेको सहयोगमा निर्वाचन जितेका बोहोरा विकासप्रेमी नेताका रुपमा परिचित थिए । निर्वाचन घोषणापूर्व नै घरदैलोमा सक्रिय देखिएका प्रज्ज्वलले उपनिर्वाचन घोषणापछि आफ्नो सक्रियता अझ बढाएका छन् । गाउँमा खानेपानी, शिक्षा, खेलकुदलगायत सामाजिक काममा उनी व्यस्त देखिन्छन् ।
निर्वाचन क्षेत्रभर ३६ वडा छन् । सबै वडामा उनले आफ्नो कार्यक्रमको सञ्जाललाई फैलाएका छन् । यो क्षेत्र सुरक्षित पार्न राप्रपाले दीपकका दुई छोरा प्रज्ज्वल र गौरवसहित छ जनालाई उमेदवारका लागि सिफारिस गरेको छ । हालै रुपन्देहीमा बसेको जिल्ला कार्यसम्पादन समिति बैठकले पार्टी केन्द्रीय सदस्यद्वय वसन्तविक्रम शाही, स्वाती थापा, रुपन्देही अध्यक्ष सागरप्रताप राणा, स्व. बोहोराका छोराहरु गौरव, प्रज्ज्वल र जिल्ला नेता दीलिप मल्लिकको नाम सिफारिस गरेको हो ।
अघिल्लो निर्वाचनमाझैं एमालेले यसपटक पनि आफ्नो दललाई सहयोग गर्नेमा राप्रपा ढुक्क देखिन्छ । गत मंगलबार भैरहवामा राप्रपा रुपन्देही क्षेत्र न ३ को आयोजनामा भएको क्षेत्रीय कार्यकर्ता भेलामा राप्रपा अध्यक्ष राजेन्द्र लिङ्देनले यसमा ढुक्क रहन कार्यकर्तालाई ढाडस दिए । एमालेसँग विगतको सहकार्य पाँच वर्षका लागि भएको उल्लेख गर्दै लिङ्देनले भने, ‘हिजो दीपक दाइको जितमा एमाले कार्यकर्ताले साथ दिनुभयो यसपटक पनि सहयोग गर्नुहुने छ भन्ने विश्वास छ ।’ एमालेले खिमलाल भट्टराई, व्यवसायी शशी पौडेल, भैरहवाका यज्ञजित साह र सिद्धार्थनगर नगरपालिकाका पूर्वमेयर हरि अधिकारीको नाम जिल्लालाई सिफारिस गरेको छ ।
गत चुनावमा कांग्रेसलाई लोकतान्त्रिक समाजवादी पार्टी (लोसपा)ले सघाउँदा राप्रपालाई जनता समाजवादी पार्टी (जसपा) नेपालले सघाएको थियो । नागरिक उन्मुक्ति पार्टी र जनमत पार्टीमात्र त्यहाँ चुनाव लडेका थिए । नागरिक उन्मुक्तिलाई चौथो मत प्राप्त भएकोले यसपटक लोसपा, जसपा नेपालले नागरिक उन्मुक्तिलाई सघाउने चर्चा छ ।
यस्तै राष्ट्रिय जनमोर्चाले वामपन्थी नेता तथा राष्ट्रिय जनमोर्चाका केन्द्रीय सल्लाहकार बद्रे आलमलाई उम्मेदवार बनाउने भएको छ । राष्ट्रिय जनमोर्चाका अध्यक्ष चित्रबहादुर केसीले असार २९ गते प्रेस विज्ञप्ति जारी गर्दै रुपन्देही–३ को उपनिर्वाचनमा केन्द्रीय सल्लाहकारसमेत रहेका आलमलाई उम्मेदवार बनाउने घोषणा गरेका हुन् ।
२०७९ को चुनावमा समानुपातिकतर्फ नेपाली कांग्रेसले २० हजार २७८, एमालेले १६ हजार ९८६ मत, रास्वपाले १४ हजार १५४, राप्रपाले नौ हजार १८३ मत ल्याएका थिए । यस क्षेत्रमा तत्कालीन गृहमन्त्री बालहृष्ण खाणलाई हराउँदै राप्रपा नेता बोहोरा निर्वाचित भएका थिए । उक्त निर्वाचनमा बोहोराले ३६ हजार ७१७ र खाणले ३४ हजार ३६ मत पाएका थिए । गत चैत १९ मा बोहोराको निधन भएपछि यस क्षेत्रमा उपनिर्वाचन हुन लागेको हो । रास्वपाबाट सुलभ खरेल, पाधिवेन्द्र उपाध्याय, डा. लेखजंग थापा, ज्ञानु पौडेल, जीतबहादुर गुप्ता, कुसुम महर्जन, रचना क्षेत्री, पुनमकुमारी अग्रवाल र मधुप्रसाद आचार्यले आवेदन दिएका छन् ।
आगामी असोज २१ गते बिहान १० देखि ५ बजेसम्म निर्वाचन अधिकृतको कार्यालयमा उम्मेदवारको मनोयन दर्ता हुने र सोही दिन साँझ उम्मेदवारको सूची प्रकाशन हुने कार्यतालिका निर्वाचन आयोगले तय गरेको छ ।असोज २४ गते उम्मेदवारको अन्तिम नामावली प्रकाशन हुने छ । कात्तिक १७ गते बिहान ७ देखि अपराह्न ५ बजेसम्म सम्बन्धित मतदान केन्द्रमा मतदान हुने छ । प्रतिनिधिसभा सदस्य तथा प्रदेशसभा सदस्य निर्वाचन, २०७९ को समानुपातिक निर्वाचन प्रणालीतर्फ बन्दसूचीमा नाम समावेश भएको व्यक्ति उम्मेदवार हुन नपाउने आयोगले जनाएको छ ।
