- सीपको अन्तर्राष्ट्रिय प्रमाणीकरणका लागि चारवटा संस्थासँग सम्झौतापत्रमा हस्ताक्षर
- महोत्तरीको बलवामा आधुनिक ल्यावसहितको आवासीय सीप तालिम केन्द्र स्थापना
- परम्परागत सीप तथा पेसा अपनाएका ५०० जनालाई उद्यमशीलता तालिम प्रदान गरी स्वरोजगार बन्न सहयोग गरिने
काठमाडौं– राष्ट्रिय व्यावसायिक प्रशिक्षण प्रतिष्ठानले गत आर्थिक वर्ष २०८१/८२ मा दक्षिण कोरिया, इजरायल र बेलायतमा जाने आठ हजारभन्दा बढी श्रमिकलाई पूर्वप्रस्थान अभिमुखीकरण तालिम दिएको छ । जिटुजी प्रणालीमार्फत यी मुलुक गएका आठ हजार ३२२ जना श्रमिकलाई तालिम प्रदान गरिएको प्रतिष्ठानले जानकारी दिइएको हो ।
प्रतिष्ठानले वैदेशिक रोजगारीमा जाने युवाहरुलाई अन्तर्राष्ट्रिय मापदण्डअनुसारको सीप विकास गराएर उनीहरुलाई मर्यादित रोजगारीको पहुँचमा पुर्याउने काम गर्दै आएको छ । गत आवमा सीपको अन्तर्राष्ट्रिय प्रमाणीकरणका लागि चारवटा संस्थासँग सम्झौतापत्रमा हस्ताक्षर गरेको जनाएको छ । प्रतिष्ठानले पाठ्यक्रम निर्माण कार्यविधिको मस्यौदा तयार गरी समितिसमक्ष पेस गर्ने तयारी भएकोसमेत जनाएको छ ।
श्रमबजारको मागअनुरुप निर्माण गरिएका १९ वटा सीपमूलक तालिमको पाठ्यक्रम गत वर्ष स्वीकृत भएको उक्त कार्यक्रममा जानकारी दिइएको थियो । स्वदेश तथा वैदैशिक रोजगारीका लागि आउने श्रमिकको मागलाई सम्बोधन गर्नेगरी पाठ्यक्रम तयार गरिएको प्रतिष्ठानको भनाइ छ । उक्त पाठ्यक्रममा होटल टेक्निसियन, गार्मेन्ट मेसिन अपरेटर, मेसन, स्काभेटर अपरेटर, सहायक ब्युटिसियन, वेटर र वेट्रेस, विद्युतीय सवारी मर्मत प्राविधिक, बेल्डर, बारिस्टा, सुन गाल्ने खार्ने कालिगढ, प्लम्बिङ, केयर गिभर, फुटवयर लास्टिङ एण्ड पेस्टिङ, ल्यापटप मर्मत इलेक्ट्रिसियनलगायत सीपहरु समावेश छन् ।
प्रतिष्ठानले महोत्तरीको बलवामा आधुनिक ल्यावसहितको आवासीय सीप तालिम केन्द्र स्थापना गर्न एक विघा १५ कठ्ठा जग्गा प्राप्त भइसकेको जानकारी दिएको छ । यसका लागि चालु आव २०८२÷८३ मा १३ करोड २७ लाख रुपैयाँ अनुदानबाट भवन निर्माणको काम सुरु गर्ने तयारी रहेको जनाइएको छ । युवाहरु सीप र ज्ञानविनै वैदेशिक रोजगारीमा गइरहेको अवस्थामा दक्ष, सीपयुक्त जनशक्ति उत्पादनमा उक्त तालिम केन्द्रले महत्वपूर्ण भूमिका खेल्ने जनाइएको छ । श्रम,रोजगार तथा सामाजिक सुरक्षा मन्त्रालय, प्रदेश सरकार र स्थानीय तहको सहकार्यमा तालिम केन्द्र बन्ने जनाइएको छ ।
वैदेशिक रोजगारीमा जानेलाई सीपयुक्त तालिम दिनुका साथै आन्तरिक रोजगारी सिर्जना गरी बेरोजगारी समस्या न्यूनीकरणमासमेत प्रतिष्ठानले योगदान दिँदै आएको छ । गत आवमा कार्यस्थलमा आधारित तालिम सञ्चालन कार्यविधि समितिबाट स्वीकृत भई मन्त्रालयमा पेस गरिएको, आन्तरिक रोजगारी व्यवस्थापनका लागि सीप विकास गर्न नौ वटा रोजगारदाता संघ र महासंघहरुसँग समझदारीपत्रमा हस्ताक्षर गरिएको, प्रतिष्ठानको नियमावली समितिबाट स्वीकृति भई मन्त्रालयमा पेस गरिएको, सीप परीक्षण र प्रमाणीकरण विनियमावलीको मस्यौदा तयार गरी समितिसमक्ष पेस गर्ने तयारी भएकोजस्ता नीतिगत कामहरु भएको प्रतिष्ठानले जनाएको छ ।
प्रतिष्ठानका अनुसार सो अवधिमा सीप र रोजगारी क्षेत्रमा कार्यरत कर्मचारी, प्रशिक्षक तथा जनशक्ति ७७ जनालाई सामान्य, उद्यमशीलता, अनुगमन तथा मूल्यांकन विषयमा प्रशिक्षक प्रशिक्षण प्रदान गरिएको छ । प्रतिष्ठान र केन्द्रबाट पाँच हजार ३०० जनालाई विभिन्न विषयमा सीपमूलक तथा सीप अभिवृद्धि तालिम प्रदान गरिनुका साथै तालिम सम्पन्न गरेका ३४९ जनाको सीप परीक्षण गरिएको छ ।
प्रतिष्ठानले चालु आवका योजनाको विषयमा पनि जानकारी गराएको छ । जसअनुसार आन्तरिक रोजगारी सिर्जना गर्न १० वटा रोजगारदातासँग गरिएको समझदारीअनुरूप ८६० जनालाई कार्यस्थलमा आधारित तालिम दिइने योजना छ । तालिम लिएकाहरुको रोजगारीको सुनिश्चितता गर्नेसमेत जनाइएको छ । साथै, परम्परागत सीप तथा पेसा अपनाएका ५०० जनालाई उद्यमशीलता तालिम प्रदान गरी स्वरोजगार बन्न सहयोग गर्ने, आगामी वर्ष प्रतिष्ठान र केन्द्रबाट पाँच हजार ७६० जनालाई सीपमूलक र सीप अभिवृद्धि तालिम प्रदान गर्नेलगायत लक्ष्य लिइएको प्रतिष्ठानको दाबी छ ।
-1752335779.jpg)
