काठमाडौं- नेपाली कांग्रेसले कात्तिकमा हुने रुपन्देही क्षेत्र नम्बर ३ को उपनिर्वाचनको विषयमा नेपाली कांग्रेसले छलफल सुरु गरेको छ । रुपन्देहीमा हुने उपनिर्वाचन हुने गरी मुख्य एजेण्डा बनाएर सभापति शेरबहादुर देउवाले शुक्रबार विहान छलफलका लागि शीर्ष नेताहरुलाई निवास डाकेका थिए ।
देउवा निवास बुढानीलकण्ठमा भएको छलफल पछि चुनावी रणनीति र वस्तुस्थितिका बारेमा मुख्य गरेर छलफल भएको प्रमुख सचेतक श्याम घिमिरेले जानकारी दिए । उनले भने,‘रुपन्देही ३ मा समानुपातिकमा पहिलो पार्टी हौं । स्थानीय तहको निर्वाचनमा पनि पहिलो पार्टी हौं । तर प्राविधिक हिसाबले मात्र हारेका हौं ।’ साथै भोटको अवस्था मजबुत छ भन्ने कुरा छलफल भएको घिमिरेको भनाई छ ।
बैठकमा उम्मेदवारका विषयमा भने केही छलफल नभएको घिमिरेले बताए । उनले भने,‘बैठकमा भूमि विधेयक र निजामती विधेयक माथि पनि छलफल भएको थियो । त्यस निजामती विधेयकमा एमालेका सांसदले राखेको प्रस्ताव पार्टीको रुपमा नभई सांसदले स्वतन्त्रता प्रयोग गरेको रुपमा लिएका छौं ।’ ‘एमालेले आधिकारिक रुपमा भन्नुभन्दा पनि आफ्नो सांसदहरुको स्वतन्त्रता प्रयोग गरेर संशोधन प्रस्ताव उनीहरुले राखेको घिमिरेले बताएका छन् । बैंठकबाट विधेयकको समग्रमा सांसदहरुले स्वतन्त्रतापूर्वक संशोधन प्रस्ताव राखेको भन्ने बारेमा कुरा भएको घिमिरेको भनाई छ ।
