उहाँको जे भूमिका मुलुकका लागि आवश्यक ठानिएको छ । त्यो परिप्रेक्षमा पार्टी राजनीतिमा फर्किनु उचित हुँदैन भन्ने निष्कर्ष निकालीसकेपछि सदस्यताको विषय स्वतः निष्क्रिय भएको छ
शंकर पोखरेल
महासचिव, नेकपा एमाले
काठमाडौं- पूर्व राष्ट्रपति विद्यादेवी भण्डारीले असार १४ गते आफू दलीय राजनीतिमा फर्किएको घोषणा गरिन् । प्रधानमन्त्रीसमेत रहेका एमाले अध्यक्ष केपी शर्मा ओलीलाई निम्त्याइएको कार्यक्रममै भण्डारीले आफ्नो इच्छा सार्वजनिक गरेकी थिइन् ।
भण्डारीको यो आकंक्षा एमाले हाँक्ने शैलीकै थियो । ‘फरक ढंगको राजनीतिक जिम्मेवारीबाट अलग भएपछि नेकपा एमालेमै रहेर पार्टीको राजनीतिक यात्रालाई निरन्तर दिने पवित्र उद्देश्यका साथ मैले पार्टी सदस्यता नवीकरण गरेको छु,’ भण्डारीले राष्ट्रिय सभागृहबाट घोषणा गरिन् । त्यसपछि भने लोकतान्त्रिक संविधानका पक्षधरहरुले भण्डारीको सक्रियतामाथि नैतिकताको प्रश्न तेस्र्याए ।
पहिले ओलीले राजनीतिमा आउन विद्या भण्डारीलाई उक्साए । पूर्व राष्ट्रपतिले पाउने सेवासुविधा त्याग्न लगाइयो, त्यसपछि पार्टीको ढोका बन्द गरिदिए । अहिले भण्डारी निकै कमजोर पात्र बनेकी छन्
विद्या भण्डारी निकट एक नेता
‘सार्वजनिक पदमा रहेका व्यक्तिले प्रत्यक्ष राजनीति गर्न मिल्दैन वा राजनीतिमा आए सरकारी सेवासुविधा त्याग्नुपर्छ’ यस्तो प्रश्न बढ्न थालेपछि भण्डारीले पूर्व राष्ट्रपतिले पाउने सबै सेवासुविधा फिर्ताका लागि निवेदन दिइन् । असार १८ गते परेको निवेदनलाई गृह मन्त्रालयले तत्कालै सदर गरिदियो ।
भण्डारीलाई गृह मन्त्रालयले एक उपसचिव सरहका स्वकीय सचिव, कार्यालय सहयोगी समेतको लागि मासिक डेढ लाख रूपैयाँ उपलब्ध गराउँदै आएको थियो । रत्नराज्य लक्ष्मी क्याम्पसका पूर्वस्ववियु सभापति राजकुमार राई स्वकीय सचिवका रूपमा कार्यरत थिए । सुविधा फिर्ता भएसँगै राईले सरकारबाट तलब पाउने छैनन् । त्यस्तै पूर्व राष्ट्र प्रमुखको लागि खटिने सुरक्षाकर्मीका लागि बस्न घर भाडामा लिइएको छ । भण्डारीलाई प्रोटोकलभित्र सुरक्षा भने हटाउन नमिल्ने गृह मन्त्रालयले जनाएको छ ।
सुविधा फिर्तापछि एमालेको ढोका बन्द
सुविधा फिर्तापछि एमालेभित्र विद्याको ‘कमब्याक’बारे बहस भयो । एमालेको मुख्यालय च्यासलमा सचिवालय बैठकदेखि पोलिटब्युरो बैठक हुँदै केन्द्रीय कमिटी बैठक पनि भयो । यो बीचमा भण्डारीले सदस्यता नवीरकण नै नगरेको चर्चा चल्यो । यसपछि झस्किएकी भण्डारी अध्यक्ष ओलीसँग भेट्न च्यासल पुगिन् । साउन ५ गते भएको भेटपछि भण्डारीले आफूले सदस्यता नवीकरण गरिसकेको प्रष्ट पारिन् ।
त्यसपछि बसेको केन्द्रीय कमिटिले भने उनको सदस्यता नै रद्द गरिदियो । मंगलबार अबेर सम्पन्न एमालेको केन्द्रीय समिति बैठकले भण्डारीको सदस्यता रद्द गर्ने निर्णय गरेको हो । बुधबार केन्द्रीय कमिटिको निर्णय सार्वजनिक गर्दै एमाले महासचिव शंकर पोखरेलले भण्डारीको सदस्यता नवीकरण निस्क्रिय भएको बताएका हुन् ।
‘उहाँले सदस्यता नवीकरण गरिसकेपछि यो विषयलाई सार्जजनिक नगरौं, यो एउटा विशेष विषय हो । त्यसअर्थमा पार्टीका तर्फबाट यसलाई सार्वजनिक गर्नु हुँदैन र यसलाई छलफल गर्नुपर्दछ । उपयुक्त समयमा पार्टीले निर्णय लिनुपर्दछ भनेर हामीले त्यो विषयलाई सार्वजनिक नगरेको विषय थियो,’ महासविच पोखरेलले भने । भण्डारी आफैले यस विषयमा राजनीतिकरण बढाएपछि सदस्यता स्वतः निस्क्रिय भएको उनको तर्क थियो । ‘पूर्वराष्ट्रपति आफैले त्यसबारे सार्वजनिक गरेपछि पार्टीले त्यसबारे भन्नुपर्दथ्यो । त्यस अर्थमा हामीले हिजोको बैठकबाट एउटा निष्कर्ष निकालेका छौं । उहाँको जे भूमिका मुलुकका लागि आवश्यक ठानिएको छ । त्यो परिप्रेक्षमा पार्टी राजनीतिमा फर्किनु उचित हुँदैन भन्ने निष्कर्ष निकालीसकेपछि सदस्यताको विषय स्वतः निष्क्रिय भएको छ,’ पोखरेलले भने ।
बुधबार नै बुटवल पुगेर एमाले उपाध्यक्षसमेत रहेका अर्थमन्त्री विष्णु पौडेलले पनि भण्डारी राजनीतिमा आउनु अनुचित भएको र पार्टी सदस्यता नवीकरण नहुने बताए । ‘अब उहाँ राजनीतिमा आउनु हुन्छ की हुँदैन भन्ने जहाँसम्म विषय छ । राष्ट्रपति गणतन्त्रको शान हो । राष्ट्रपति राष्ट्र प्रमुख हो । राष्ट्र प्रमुख भएर कुनै एउटा पार्टी विशेषमा, हिजो उपाध्यक्ष हुँदा एमालेको उपाध्यक्ष हुनुहुन्थ्यो, तर जब उहाँ राष्ट्रप्रमुख हुनुभयो । एमालेको मात्र होइन सिंगो राष्ट्रको राष्ट्रप्रमुख हुनुभयो । सिंगो राष्ट्रको राष्ट्रपति जस्तो अभिभारा संविधानको रक्षा, संरक्षण गर्ने अभिभारा वहन गरेर सेवानिवृत्त भएको पूर्वराष्ट्रपति राजनीतिमा आउने कुरा उचित हुँदैन,’ पौडेलले थपे, ‘त्यसकारण उहाँले सिंगो राष्ट्रकै अभिभावकको भूमिकामा रहनुपर्छ । उहाँको पार्टी सदस्यता नवीकरण हुन सक्दैन, गर्न उचित पनि हुँदैन ।’
भण्डारीको घोषणाबाट असन्तुष्ट देखिएका प्रधानन्त्री तथा एमालेका अध्यक्ष केपी ओलीको विशेष प्रस्तावमा सदस्यता नवीकरण रद्द गरिएको थियो । उक्त निर्णयको उपाध्यक्षद्वय युवराज ज्ञवाली, सुरेन्द्र पाण्डे र स्थायी समिति सदस्य कर्णबहादुर थापाले असहमति जनाएका थिए ।
अदालत जाने तयारीमा भण्डारी
आफूविरुद्ध रणनीतिक रुपमा चाल चालेका थाह पाएपछि भण्डारीले मंगलबार दिउँसो नै भंगालस्थित आफ्नो निवासमा केही पत्रकारलाई बोलाएर आफू राजनीतिमा अघि बढिसकेको बताएकी थिइन् । भण्डारीले अब आफूले कुनै हालतमा पछाडि फर्कने ठाउँ नरहेको तर्क अघि सारिन् । ‘म राजनीतिमा अघि बढेँ, माझकिरातको छोरी हुँ, खुट्टा कमाउँदिनँ,’ उनले भनिन् ।
पहिले ओलीसँगको छलफलमा राजनीतिमा आउँदा कुनै फरक नपर्ने बताए पनि अहिले भने आफूलाई सबै मिलेर रोक्न खोजेको विद्याको भनाई थियो । ओलीले यसरी नै बन्देज लगाइराखे भण्डारीले नयाँ दल खोल्ने चर्चासमेत चलेको छ । यद्यपि यसका लागि केही दिन लाग्ने उनी निकट नेताहरु बताउँछन् । उनी निकट एक नेताका अनुसार विद्यालाई सबैतिरबाट कमजोर बनाएर ओलीले एमालेमा पनि ढोका बन्द गरेको गुनासो गरे । ‘पूर्व राष्ट्रपतिले पाउने सेवासुविधा त्याग्न लगाइयो, त्यसपछि पार्टीको ढोका बन्द गरिदिए । अहिले भण्डारी निकै कमजोर पात्र बन्नुभएको छ,’ ती नेताले भने । योसँगै बुधबार भण्डारीपुत्री उषाकिरणले फेसबुकमार्फत आक्रोश पोखेकी थिइन् । उषाकिरणलाई थुम्थुम्याउन ओलीले राष्ट्रिय सभाको सदस्य बनाउने तयारी थालेकोसमेत चर्चा एमाले वृत्तमा शुरु भएको छ ।
-1752335779.jpg)
