रौतहट- रौतहटको गौरस्थित कारागारबाट केही कैदीवन्दीहरू फरार भएपछि जिल्ला प्रशासन कार्यालय, रौतहटले कडा सुरक्षा सतर्कता अपनाएको छ । घटनालाई मध्यनजर गर्दै प्रशासनले एक महत्वपूर्ण सूचना जारी गर्दै फरार कैदीवन्दीहरूलाई तुरुन्तै आत्मसमर्पण गर्न आग्रह गरेको छ ।
मिति २०८२ भदौ २४ गते गौर कारागारमा भएको आन्दोलनको क्रममा केही कैदीवन्दीहरू भाग्न सफल भएका थिए । सो घटनापछि जिल्ला प्रशासन कार्यालयले भदौ २६ गते सार्वजनिक सूचना जारी गर्दै फरार कैदीहरूलाई नजिकको प्रहरी कार्यालयमा आत्मसमर्पण गर्न आह्वान गरेको हो ।
प्रमुख जिल्ला अधिकारी (सिडिओ) विनोद कुमार खड्का द्वारा हस्ताक्षरित सूचनामा भनिएको छ, "फरार कैदीवन्दीलाई कसैले लुकाएको वा आश्रय दिएको पाइएमा प्रचलित कानुनअनुसार कडा कानुनी कारबाही गरिनेछ।" साथै, सर्वसाधारण नागरिकहरूलाई शंकास्पद व्यक्ति वा गतिविधि देखिएमा तुरुन्त प्रहरीलाई जानकारी दिन अनुरोध गरिएको छ ।
सुरक्षा व्यवस्थालाई थप सुदृढ बनाउँदै शान्ति सुव्यवस्था कायम राख्न प्रशासनले सबै निकायहरूलाई सतर्क रहन निर्देशनसमेत दिएको छ । यही सन्दर्भमा, रौतहट जिल्ला प्रशासन कार्यालयले अर्को सूचना जारी गर्दै मिति २०८२ भदौ २७ गतेसम्म अत्यावश्यक सेवाबाहेकका सबै सरकारी सेवा बन्द रहने जनाएको छ ।
सूचनामा भनिएको छ, “यस जिल्लाका सरकारी कार्यालयहरूबाट प्रदान गरिने अत्यावश्यक सेवा बाहेकका सम्पूर्ण सेवाहरू मिति २०८२।०५।२७ गतेसम्मका लागि बन्द रहने व्यहोरा जानकारीको लागि सूचित गरिन्छ । यसबाट सेवाग्राहीहरूमा पर्न गएको असुविधा प्रति क्षमाप्रार्थी छौं।”
हाल सेवा बन्दको स्पष्ट कारण खुलाइएको छैन, तर कारागारको घटनासँग सम्बन्धित सुरक्षा चुनौतीका कारण यस्तो निर्णय गरिएको हुन सक्ने अनुमान गरिएको छ । प्रशासनले अत्यावश्यक सेवा भने यथावत सञ्चालन हुने जनाएको छ र नागरिकहरूलाई आधिकारिक सूचना हेरेर मात्र कार्यालयमा सम्पर्क गर्न आग्रह गरेको छ ।
