काठमाडौं -राष्ट्रपति रामचन्द्र पौडेलले पूर्वन्यायाधीश सुशीला कार्कीलाई शुक्रबार बिहान प्रधानमन्त्री नियुक्त गर्ने तयारी गरेका छन्। कार्कीको शपथ ग्रहण पनि शुक्रबार बिहानै गराउने तयारी रहेको शीतल निवास स्रोतले बताएको छ।
कार्कीलाई प्रधानमन्त्री नियुक्त गर्न राष्ट्रपति पौडेलले बिहीबार दिनभर र मध्यरातसम्मै छलफल र परामर्श जारी राखेका छन्।
उनले बिहीबार राजनीतिक दलका प्रमुख नेताहरू र संविधानविदहरूसँग अलग अलग छलफल गरे।उच्च राजनीतिक स्रोतका अनुसार बिहीबार दिउँसो राष्ट्रपति पौडेल र प्रधानसेनापति अशोकराज सिग्देलले संयुक्त रूपमा निवर्तमान प्रधानमन्त्री केपी शर्मा ओलीसँग पनि छलफल गरेका थिए।
उनीहरूले सुशीला कार्कीलाई अन्तरिम सरकारको प्रधानमन्त्री बनाउन लागेको भनेर ओलीलाई जानकारी गराए।
जेनजी आन्दोलनका प्रतिनिधिहरुले आजैका मितिमा पूर्वप्रधानन्यायाधीश सुशीला कार्कीलाई अन्तरिम सरकारको प्रधानमन्त्री नियुक्त गर्न माग गरेका छन्।आजैका मितिमा प्रधानमन्त्री नियुक्त नगरे पुनः सडकमा उत्रिने चेतावनी पनि उनीहरुले दिएका छन्।
‘हामी नेपाल’का अध्यक्ष सुदन गुरुङले अन्य जेनजी समूहका प्रतिनिधिहरुलाई समेत सँगै राखेर भिडिओ सामाजिक सञ्जालमा पोस्ट गरी यस्तो चेतावनी दिएका हुन्।
‘अब पनि (प्रधानमन्त्री नियुक्ति) भएन भने हामी गोली खान तयार छौँ,’ उनले भने, ‘मेरा २० जना केटाहरू मरिसकेका छन्। अझै हामी मर्न तयार छौँ। पहिलो गोली म खान्छु। राष्ट्रपति कार्यालय घेराउ गर्न जान्छौँ।’
जेनजीहरुले आफ्ना समूहमा सम्प्रेषण गरेको सन्देशमा पनि प्रधानमन्त्री नियुक्तिको प्रक्रिया लम्बिएको र परिवर्तन उल्टिने जोखिम भएको भन्दै आन्दोलनका निम्ति तयार हुन भनेका छन्।
