काठमाडौं- बीवाईडीले १ करोड ३० लाख पर्ने ‘याङवाङ यु७’ सार्वजनिक गरेको छ । न्यु इनर्जी भेइकल्स (एनईभीज) क्षेत्रमा विश्वकै अग्रणी सवारी निर्माता कम्पनी बीवाईडीले नयाँ औद्योगिक माइलस्टोन हासिल गर्दै १ करोड ३० लाखौं युनिट सवारी साधन उत्पादन घोषणा गरेको हो।
चीनको सेन्झेन–शानवेई स्पेसल कोअपरेसन जोन अन्तर्गतको जियाओमो प्रोडक्सन बेस मा आयोजना गरिएको कार्यक्रममा ‘याङवाङ यु७’ मोडल सार्वजनिक गरेको हो । त्यसैको उद्घाटन गर्दै उक्त सवारीलाई १ करोड ३० लाखौं युनिटको रुपमा चिनाउँदै उत्सव मनाइएको हो ।
सन् २०२५ को पहिलो अर्धवार्षिक अवधिमा बीवाईडीले उल्लेखनीय व्यापारिक प्रदर्शन गरेको छ । जनवरीदेखि जुनसम्म घरेलु बजारमा कम्पनीले २१ लाख १३ हजार युनिट सवारी बिक्री गरेको छ । जुन गत वर्षको सोही अवधिको तुलनामा ३१.५ प्रतिशतले वृद्धि भएको हो ।
यही अवधिमा अन्तर्राष्ट्रिय बजारमा बीवाईडीको बिक्रीमा झनै चमत्कारी उछाल आएको छ । १२८.५ प्रतिशत वृद्धि दरका साथ ४ लाख ७२ हजार युनिट सवारी अन्तर्राष्ट्रिय बजारमा बिक्री भएका छन् । यस उत्कृष्ट बिक्री प्रदर्शनको आधारमा बीवाईडीले ग्लोबल न्यु इनर्जी भेइकल बिक्रीमा पहिलो स्थान कायम गर्न सफल भएको छ । साथै, १ करोड ३० लाख युनिट न्यु इनर्जी भेइकल उत्पादन गर्ने विश्वकै पहिलो अटोमोबाइल कम्पनी बन्ने ऐतिहासिक कीर्तिमान कायम गरेको छ ।
कम्पनीले यो उपलब्धिलाई केवल संख्या मात्र नभई उद्योगको विकास, प्रयोगकर्ताको विश्वास र प्राविधिक नेतृत्वको सन्देशका रूपमा रहने बताएको छ । १ करोड ३० लाखौं सवारीको रूपमा सार्वजनिक गरिएको ‘याङवाङ यु७’ बीवाईडीको अल्ट्रा–लक्जरी अटोमोटिभ ब्रान्ड अन्तर्गतको प्रमुख मोडल हो । यो मोडल चीनमै १० हजार युनिट बिक्री पार गर्ने पहिलो लक्जरी सवारीको उपाधि प्राप्त गर्न सफल भएको छ ।
यसले उच्च–गुणस्तरीय उपभोक्ता बजारमा प्राविधिक निपुणता, ब्रान्ड भ्याल्यु, र उद्यमशील डिजाइन को नमुना प्रस्तुत गरेको छ । ‘याङवाङ’ ब्रान्डले चिनियाँ लक्जरी सवारीको क्षेत्रमा नयाँ मानक स्थापना गर्दै ग्लोबल लक्जरी अटोमोबाइल प्रतिस्पर्धामा एक दृढ उपस्थिति जनाउन थालेको संकेत दिएको छ । बीवाईडीको यो सफलताले केवल एउटा कम्पनीको उपलब्धि मात्र नभएर, न्यु इनर्जी भेइकल युगमा चिनियाँ अटोमोबाइल उद्योगको प्राविधिक प्रगति र आत्मविश्वासको झल्को पनि दिएको छ । ‘याङवाङ यु७’ र अन्य मोडलमार्फत चिनियाँ अटो उद्योगले उच्च प्रतिस्पर्धात्मक क्षमता, स्थानीय नवप्रवर्तन, र विश्वसनीयता समेत प्रदर्शन गर्दै आएको बताएको छ ।
-1752335779.jpg)
