काठमाडौं– नेपाली कांग्रेसका नेता डा. शेखर कोइरालाले आफ्नो खेमाका मन्त्रीहरु फिर्ता बोलाउने तयारी गरेका छन् । सत्ता समीकरण फेर्ने प्रयासमा लागेका नेता कोइरालाले पछिल्ला दिनमा भेटघाट तथा छलफलसमेत बढाएका छन् ।
बिहीबार प्रमुख प्रतिपक्षी दल नेकपा माओवादी केन्द्रका अध्यक्ष पुष्पकमल दाहाललाई भेटेका शेखरले शुक्रबार पूर्वराष्ट्रपति विद्यादेवी भण्डारीसँग भेटेका थिए । लगत्तै आइतबार उनले आफूनिकट सांसद र मन्त्रीहरुसँग भेटेका छन् । आइतबार काठमाडौंको बत्तीसपुतलीस्थित अनुपम फुडल्याण्डमा आफूनिकट सांसदहरु भेलामा उनले सुझाव मागेका थिए । भेटमा मुलुकमा देखिएका बेथिति रोक्नुपर्ने सुझाव आफूले दिएको सांसद हृदयराम थानीले बताए । ‘मुलुकमा देखिएको निराशा र आक्रोशबारे छलफल केन्द्रित थियो । बेथिति र निराशालाई रोक्नुपर्छ भनेर मैले सुझाव दिएँ,’ थानीले भने । कूल ८८ सांसद रहेको कांग्रेसमा शेखर पक्षका २० जना मुस्किलले पुग्छ । आइतबारको भेटमा सात जनामात्र सांसद उपस्थित भएका एक सांसदले बताए ।
हाम्रा जति पनि साथीहरु छन् संघदेखि प्रदेश सरकारमा । फिर्ता बोलाउन भन्ने छ । यसका लागि एक–दुई दिन पनि लाग्न सक्छ ।
डा. सुनिल शर्मा
सांसद, नेपाली कांग्रेस
बैठकपछि शेखरनिकट सांसद डा. सुनिल शर्माले भने, ‘हाम्रा जति पनि साथीहरु छन्, संघदेखि प्रदेश सरकारमा । ब्याक बोलाउन भन्ने छ । यसका लागि एक दुई दिन पनि लाग्न सक्छ ।’ शेखर प्रधानमन्त्री बन्न केहीले नरोक्ने शर्माको दाबी थियो । ‘संसदीय दलमा सम्माजननक बहुमत पुग्छ । शेखर दाइ प्रधानमन्त्री बन्नुहुन्छ,’ उनले भने । यद्यपि, यसमा नेकपा एमालेसँगको गठबन्धन ‘ब्रेक’ गर्ने कि नगर्ने र माओवादीले आफ्नो निर्णय दिइनसकेको शर्माको भनाइ थियो । सत्ता समीकरणकै रेसमा रहेका शेखरलाई माओवादी अध्यक्ष दाहाललेझैं अंकगणितको प्रश्न उठाएका थिए । माओवादी, एकीकृत समाजवादी र राष्ट्रिय स्वतन्त्र पार्टीले साथ दिएमा शेखरलाई कति सांसद चाहिन्छ त भन्ने हिसाबसमेत राजनीतिक वृत्तमा हुन थालेको छ ।
अहिले माओवादीसँग ३२ सांसद, रास्वपासँग १९, एकीकृत समाजवादीसँग नौ गरी ६० सांसद छन् । सरकार गठनका लागि १३७ सांसद आवश्यक हुन्छ । उपेन्द्र यादवको जनता समाजवादी पार्टी नेपालले साथ दिएमा पाँच सांसद जोड्दा ६५ जना पुग्छ । अब शेखरसँग कांग्रेसका कति सांसद छन् त ? मुस्किलले २० जना । मुस्किलले ९० सांसद पु¥याउँदा अब एमालेमा फर्केकी पूर्वराष्ट्रपतिले सघाएको अवस्थामा थप ५० सांसद चाहिन्छ । के भण्डारीको पक्षमा ५० सांसद पुग्ला त ? अहिलेका अवस्थामा सम्भव देखिँदैन ।
यसबारे थप छलफल गर्न कोइरालाले आफूनिकट मन्त्रीहरूलाई दरबारमार्ग डाकेका थिए । प्रधानमन्त्री केपी शर्मा ओली नेतृत्वको सरकारमा कांग्रेसबाट सहभागी १० मन्त्रीमध्ये तीन जना शेखर खेमाबाट भएका मन्त्री हुन् । संस्कृति, पर्यटन तथा नागरिक उड्डयनमन्त्री बद्री पाण्डे, युवा तथा खेलकुदमन्त्री तेजुलाल चौधरी र कृषिमन्त्री रामनाथ अधिकारी सहभागी बैठकमा पछिल्लो परिस्थितिबारे छलफल भएको बताइएको छ । शेखर समूहका नेताहरु भने स्वास्थ्यमन्त्री प्रदीप पौडेल पनि आफू पक्षबाटै मन्त्री भएको दाबी गर्छन् । पौडेल भने देउवा पक्षबाट मन्त्री बनेका हुन् ।
कृषिमन्त्री अधिकारीले भने भेटमा मन्त्री बोलाउने विषयमा कुनै कुराकानी नभएको बताए । ‘सामान्य कुराकानी हो । बाहिर आएजस्तो केही हैन,’ मन्त्री अधिकारीले भने । कांग्रेस संस्थापनइतरका नेता कोइराला पछिल्लोपटक कांग्रेस एमाले गठबन्धन सरकारसँग रुष्ट सुनिन्छन् । असार १६ गते केन्द्रीय समितिमा उनले कांग्रेस एमाले गठबन्धनको औचित्यबारे असन्तुष्टि जनाएका थिए । संविधान संशोधन र सुशासनको पक्षमा काम एक भएका यो गठबन्धनले केही काम गर्न नसकेको शेखरको भनाइ थियो । ‘के कारणले कांग्रेसले एमालेलाई सत्ताको नेतृत्व दियो ? यदि संविधान संशोधनका लागि यो सत्ता गठबन्धन हो भने सातबुँदे सहमतिमा लेखिएको संविधान संशोधनको मुद्दा कहाँ पुग्यो ?,’ शेखरले सभापति देउवालाई प्रश्न गरेका थिए ।
देउवाले भने राष्ट्रिय सभामा बहुमत नभएकोले संविधान संशोधन हुन नसकेको भन्दै झारा टारेका थिए । झण्डै दुईतिहाइको शक्तिशाली सरकारले जनताको पक्षमा काम गर्न नसकेको भन्दै चौतर्फी आलोचना बढेको समयमा शेखरको सक्रियतालाई धेरैले चासोका साथ हेरेका छन् । पछिल्लो परिस्थिति र आफूले चाल्नुपर्ने कदमबारे शेखरले अझै छलफल अघि बढाउने उनको सचिवालयले जनायो । उनले सानो–सानो समूह बनाएर भेट जारी राख्ने उनका स्वकीय सचिव दिनेशचन्द्र थपलियाले बताए । ‘सानो–सानो समूह बनाएर भेटिरहनु भएको छ । यो क्रम जारी रहन्छ,’ कोइरालाका स्वकीय सचिव दिनेशचन्द्र थपलियाले भने ।
