काठमाडौं– बिचौलियाबाट ३२ लाख घुस लिएको अडियो सार्वजनिक हुँदा पनि भूमि व्यवस्था, सहकारी तथा गरिबी निवारणमन्त्री बलराम अधिकारी राजीनामा दिने सुरसारमा छैनन् । विपक्षी दलहरू मात्रै होइनन्, मन्त्री अधिकारीकै दल नेकपा एमालेबाटै पनि उनको राजीनामा माग भइरहेको छ ।
यद्यपि, पार्टी अध्यक्षसमेत रहेका प्रधानमन्त्री केपी शर्मा ओलीले नै उनलाई संरक्षण दिइरहेका छन् । अधिकारी ओलीनिकट मानिन्छन् । सम्भवतः त्यही भएर उनी मन्त्रीबाट राजीनामा दिने तयारीमा छैनन् । अधिकारी कास्कीको पोखरामा रहेको लिची बगैंचा हत्याउन भएको प्रपञ्चमा जोडिएका छन् । यस्तोमा एमाले कास्कीले मन्त्री अधिकारीलाई छानबिन गरी कारबाहीको दायरामा ल्याउनुपर्ने निर्णय नै गरेको छ । शनिबार पोखरामा भएको पार्टीको विस्तारित बैठकमा लिची बगैंचा हडप्न सार्वजनिक भएको घुस प्रकरणमा जोडिएका संघीय मामिला तथा सामान्य प्रशासनमन्त्री राजकुमार गुप्ताले राजीनामा दिएको तर भूमि व्यवस्थामन्त्री पदमै रहेकाले अधिकारीलाई पदमुक्त गरेर अनुसन्धानको दायरामा ल्याउन निर्णय गरिएको छ ।
जिल्ला अध्यक्ष बैनबहादुर अधिकारीले बैठकले घुस प्रकरणमा जोडिएका भूमि व्यवस्थामन्त्री अधिकारीसहित सबै मन्त्रीलाई राजीनामा गराएर अनुसन्धान गर्नुपर्ने र दोषी देखिएको कारबाहीको दायरामा ल्याउनुपर्ने माग गर्ने निर्णय भएको जानकारी दिए । ‘पोखराको चर्चित लिची बगैंचा प्रकरणमा जोडिएर भूमि व्यवस्थामन्त्री बलराम अधिकारीको पनि अडियो सार्वजनिक भएको छ । माझिकुनामा माछा खानेसम्मको डिल सार्वजनिक भइसकेको छ । यस्तो अवस्थामा उहाँलाई पनि राजीनामा गराएर अनुसन्धानको दायरा ल्याउन माग गर्ने निर्णय भएको हो,’ उनले पत्रकारहरुसँग भने ।
घुस प्रकरणमा मुछिएका मन्त्री गुप्ताले राजीनामा दिए पनि अधिकारीले आनाकानी गरिरहेका छन् । उनीसमेतले पोखरा–१६ अमरदीपमा रहेको करिब १३५ रोपनी लिची बगैंचा हत्याउन घुस लिएको विषय हालै सार्वजनिक भयो । यो प्रकरणमा नागरिक उन्मुक्ति पार्टीकी अध्यक्षसमेत रहेकी पूर्वभूमि व्यवस्थामन्त्री रञ्जिता श्रेष्ठसमेत मुछिएकी छन् ।यसबारे छानबिन गर्न संसदीय समिति गठनको माग भइरहेको छ । हाल अख्तियार दुरुपयोग अनुसन्धान आयोगले भने छानबिन गरिरहेको छ । भूमि आयोग कास्कीका अध्यक्ष खेम पुनलाई बनाउन बिचौलिया सुजन लामाले सामान्य प्रशासनमन्त्री छँदा गुप्तालाई ३२ लाख र मालपोत कास्कीका तत्कालीन प्रमुख रामचन्द्र अधिकारीको सरुवा रोक्न ५३ लाख रुपैयाँ घुस लेनदेन गरेको अडियो हालै सार्वजनिक भएको हो । यसले सत्तामा नै तरंग उत्पन्न गरेको छ ।
मन्त्री अधिकारीले आफूले घुस लिएको प्रमाण पेस गर्न चुनौती दिँदै आएका छन् । यद्यपि, बिचौलिया लामाले स्वार्थ समूह र राजनीतिक शक्तिको आडमा पोखराको लिची बगैंचा हडप्ने प्रपञ्च गरेका थिए । त्यसका निम्ति उनले हकवाला भनिएका व्यक्तिहरूसँग जग्गा दर्ता भइसकेपछि प्रतिशतका आधारमा लाभ लिने दुई पटकसम्म करारनामासमेत गरेका थिए । २०८० र २०८१ म फरक–फरक समूहसँग मिलेर लामाले हकवालासँग जग्गा हत्याउन करारनामा गरेको देखिएको छ । उक्त जग्गा दुर्गादेवी शाह र लोकदिव्यश्वरी शाहको नाममा छ ।
