विधानले कसैमाथि कारबाही गर्नुपरे केन्द्रीय समिति बैठकमा अध्यक्षले कारबाहीको प्रस्ताव लानुपर्छ । त्यसो नगरी स्वेच्छचारी ढंगले अध्यक्षले कारबाही गर्नुभयो, त्यसविरुद्ध हामी निर्वाचन आयोगमा जान्छौं ।
जनकराज पाठक
कार्यसम्पादन समिति सदस्य, राप्रपा
काठमाडौं– राष्ट्रिय प्रजातन्त्र पार्टी (राप्रपा) अध्यक्ष राजेन्द्र लिङ्देनले प्रवक्ताबाट सगुनसुन्दर लावती र अनुशासन आयोगको अध्यक्षबाट नवराज सुवेदीलाई हटाएपछि पार्टीमा कलह बढेको छ । लिङ्देनले स्पष्टीकरण नसोधी केन्द्रीय समिति बैठकमा कारबाहीको प्रस्ताव पनि नलगिकन स्वेच्छचारी ढंगले पदबाट हटाएको भन्दै महामन्त्री डा. धवलशमशेर जबरापक्ष असन्तुष्ट छ । अध्यक्ष लिङ्देनको उक्त कदम विधानविपरीत भएको असन्तुष्टपक्षको आरोप छ ।
पदमुक्त गरिएका दुवै नेता जबरापक्षीय हुन् । जबरापक्षका नेताहरूले शनिबार छुट्टै भेला आयोजना गरी छलफल गरेका छन् । छलफलले अध्यक्ष लिङ्देनको कदम गैरकानुनी र स्वेच्छचारी भएको भन्दै निर्वाचन आयोगमा चुनौती दिने निर्णय गरेको जानकारी दिइएको छ ।‘विधानले कसैमाथि कारबाही गर्नुपरे केन्द्रीय समिति बैठकमा अध्यक्षले कारबाहीको प्रस्ताव लानुपर्छ । त्यहाँबाट अनुमोदन भएपछि अनुशासन आयोगले छानबिन गरेर कारबाही गर्छ, तर, त्यसो नगरी स्वेच्छचारी ढंगले अध्यक्षले कारबाही गर्नुभयो, त्यसविरुद्ध हामी निर्वाचन आयोगमा जान्छौं,’ छलफलपछि कार्यसम्पादन समिति सदस्य जनकराज पाठकले भने ।
मैले मनोनीत गर्ने पदहरूमा हेरफेर हुन सक्छ । राम्रो काम गरेन भने हटाइन्छ । पदाधिकारीहरूमा पनि हेरफेर हुन सक्छ ।
राजेन्द्र लिङ्देन
अध्यक्ष, राप्रपा
अध्यक्ष लिङ्देनले भने अझै कडा रूपमा प्रस्तुत हुने चेतावनी दिएका छन् । उनले भने, ‘भोलि पनि त्यस्तो अवस्था आयो भने पदाधिकारीहरूमा हेरफेर हुन सक्छ । मैले मनोनीत गर्ने पदहरूमा हेरफेर हुन सक्छ । मनोनीत गरेको मान्छेले राम्रो काम गरेन भने हेरफेर गरिन्छ ।’राप्रपाको उपाध्यक्षमा मनोनीत मुकुन्दश्याम गिरी, हेमजंग गुरु, दिलविकास राजभण्डारी र रवीन्द्र मिश्र छन् । निर्वाचित भएका उपाध्यक्षहरू बुद्धिमान तामाङ, विक्रम पाण्डे, रोशन पाण्डे र ध्रुवबहादुर प्रधान हुन् । महामन्त्रीमा शरदराज पाठक, प्रह्लाद शाह र राजेन्द्र गुरूङ मनोनीत हुन् । धवलशमशेर, कुन्ती शाही र भुवन पाठक निर्वाचित महामन्त्री हुन् । राप्रपाको सबै सहमहामन्त्री, सहायक महामन्त्री, पाँचै जना प्रवक्ता मनोनीत नै हुने प्रावधान छ । सोहीअनुसार यी पदहरूमा रहेका पदाधिकारी मनोनीत भएका हुन् ।
अध्यक्ष लिङ्देनको भनाइले त वरिष्ठ उपाध्यक्ष मिश्रसहित चार जना उपाध्यक्ष र तीन महामन्त्रीसँगै अन्य पदाधिकारीमाथि पनि कारबाहीको डण्डा चल्छ । लिङ्देनले ‘हायर एण्ड फायर’को नीति अख्तियार गर्न लागेको देखिएको छ । यसप्रति जबरापक्षको फरक मत छ । जबरापक्षीय एक पदाधिकारीले भने, ‘अध्यक्षले पदाधिकारीलाई आफ्नो सहयोगी ठानेँ । मनोनीत गरेपछि हटाउन पाइन्छ भन्ने बुझाइ उहाँको देखियो, त्यस्तो होइन, हामी त उहाँले मनोनीत गरे पनि पार्टीको पदाधिकारी हौं, उहाँको होइन ।’
लिङ्देनको अध्यक्षतामा गत बुधबार बसेको बैठकले अनुशासन आयोगको अध्यक्षमा उपाध्यक्ष रोशन कार्कीलाई मनोनीत गरेको अर्का प्रवक्ता मोहन श्रेष्ठले जारी गरेको विज्ञप्तिमा उल्लेख छ । यसअघि लिङ्देनले पार्टीको संगठन विभाग प्रमुखबाट महामन्त्री डा. राणालाई हटाइदिएका थिए । उनको ठाउँमा वरिष्ठ उपाध्यक्ष बुद्धिमान तामाङलाई ल्याए । हरेक पार्टीको संगठन विभाग प्रमुख शक्तिशाली पद मानिन्छ । संगठनमा पकड जमाउन मिल्ने यो भूमिकाबाट अन्ततः लिङ्देनले राणालाई हटाए, तामाङलाई दिए । पछिल्ला दिनमा लावती र सुवेदी हटाइए । लिङ्देनको यस्तो कदमलाई राप्रपाको आगामी महाधिवेशनसँग जोडेर विश्लेषण गर्न थालिएको छ ।
आगामी मंसिरमा राप्रपा महाधिवेशन हुने भनिएको छ । अध्यक्ष लिङ्देन चुनावी माहोल बनाउन हालै पूर्वी पहाडी जिल्लामा पुगेका पनि थिए । यस्तोबेला पार्टीमा भिन्न विचार समूहको नेतृत्व गर्ने जबरापक्षमाथि लिङ्देनले धमाधम कारबाहीको डण्डा चलाइरहेको हो ।लिङ्देनले शक्ति आर्जन गर्न खोजेको टिप्पणी पनि हुने गरेको छ । किनभने दुवै पक्ष एकअर्कालाई कमजोर बनाउने रणनीतिमा देखिएका छन् । अध्यक्षका लागि अहिले अध्यक्ष लिङ्देन दोहोरिने पक्षमा रहेका छन् । अनि, उनको विकल्पमा उपाध्यक्ष विक्रम पाण्डे र महामन्त्री जबरा देखिएका छन् । उनीहरुले पार्टी संगठनमा त्यही लक्ष्यका साथ लगानी बढाएका छन् ।
यता धवलको चाहना अध्यक्षमा छ वा पाण्डेलाई साथ दिन्छन् भन्नेचाहिँ प्रस्ट नभइसकेको राप्रपा नेताहरूको भनाइ छ । राप्रपा स्रोतका अनुसार राणाको संगठनमा पकड नभएका कारण लिङ्देनको विपक्षी टिममा उभिने सम्भावना छ । त्यो भने पाण्डेलाई साथ दिने देखिन्छ । पाण्डेलाई नेता प्रकाशचन्द्र लोहनीले पनि साथ दिने देखिएको छ । तर, पशुपति शमशेर राणा भने कता खुल्छन् भन्ने अहिलेसम्म प्रस्ट भइसकेको छैन । तर, उनी लिङ्देनलाई साथ दिँदै आएका छन् ।
लोहनी र राणाले अघिल्लो महाधिवेशनमा लिङ्देनलाई साथ दिएका थिए । मन्त्री हुन नपाएपछि लोहनी र राणा लिङ्देनसँग बिच्किएका छन् । पार्टीको कार्यसमिति सदस्यहरूले लोहनीको सट्टा पशुपतिशमशेर राणालाई समानुपापतिकको बन्द सूचीको एक नम्बरमा पार्ने निर्णय लिए, जसले गर्दा लोहनी अध्यक्ष लिङ्देनसँग टाढिएका थिए ।यसरी, शक्ति संघर्षमा रहेका बेलामा सुवेदीलाई अनुशासन आयोगबाट हटाउने निर्णय लिङ्देनका लागि जोखिमपूर्ण छ ।
