- संस्थापनइतरका नेताहरुको अनुशासन नदेखिएको भन्दै छाडापन नियन्त्रण गर्न संस्थापनपक्षको माग
- डलर अर्बपति विनोद चौधरीको योग्यताबारे प्रश्न उठाएपछि शेखरमाथि खनिए, आफूहरू जस्तालाई छेक्न खोजेको आरोप
- २०६४ को संविधानसभा निर्वाचनपछि एमाले कोटाबाट सभासद् बनेका चौधरी २०७४ मा कांग्रेस प्रवेश गरेका हुन् । कांग्रेस प्रवेश गर्नसाथ चौधरीले समानुपातिक सांसद बन्ने अवसर पाएका थिए । पछिल्लो समय उनी नेपाली कांग्रेसको केन्द्रीय कोषाध्यक्ष बन्ने लाइनमासमेत उभिएका थिए ।
- विधानअनुसार कांग्रेसमा केन्द्रीय सदस्य बन्न १० वर्ष क्रियाशील सदस्य भएको हुनुपर्छ । तर २०७४ मा कांग्रेस प्रवेश गरेका चौधरीले चार वर्षपछि २०७८ मंसिरमा केन्द्रीय सदस्य बन्ने मौका पाए
काठमाडौं– नेपाली कांग्रेसको जारी केन्द्रीय समिति बैठकमा संस्थापनपक्ष हाबी देखिएको छ । सोमबारबाट ललितपुरको सानेपास्थित केन्द्रीय कार्यालयमा सुरु भएको बैठकमा संस्थापनपक्षले प्रश्न गर्नेहरुलाई नियन्त्रण गर्न माग गरेका छन् ।केन्द्रीय समितिमा सुरुको दिनमा संस्थापनइतरका नेताहरु डा. शेखर कोइराला, नैनसिंह महरलगायतले प्रश्न गरेका थिए । दुवै नेताले नेकपा एमालेसँगको गठबन्धनको औचित्य पुष्टि गर्न माग गरेका थिए । यस विषयमा अधिकांश नेताहरुले संस्थापनइतरका नेताहरुको अनुशासन नदेखिएकोले छाडापन नियन्त्रण गर्न माग गरे । ‘हाम्रो पार्टीमा अनुशासन भएन । संसद्मा र बाहिर रहेका साथीहरूले आफूलाई जे मनमा आयो त्यही बोल्ने काम भयो । व्यक्तिवादी प्रवृत्ति बढी भयो । अनुशासन पार्टीमा कायम गर्नुपर्छ भन्नेकुरा आएको छ,’ बैठकपछि प्रवक्ता डा. प्रकाशशरण महतले भने ।
महत संस्थापनपक्ष अर्थात् सभापति शेरबहादुर देउवापक्षका नेता हुन् । सोमबार संस्थापनइतरका नेता डा. कोइारालाले डलर अर्बपति विनोद चौधरीको योग्यताबारे प्रश्न गरेका थिए । मंगलबारको केन्द्रीय समितिमा चौधरी शेखरमाथि खनिए । ‘म सारा विधि पु¥याएर पार्टी नियमअनुसार नै आएको हुँ,’ चौधरीले भने ।शेखरलाई लक्षित गर्दै चौधरीले आफूहरूजस्तालाई छेक्न खोजेको आरोप लगाए । ‘यो पार्टीलाई हाँक्ने जमर्को गर्ने नेताहरूको दृष्टिकोणमा निजी क्षेत्रका हामीजस्ता मानिसलाई सधैं गुटका नाममा छेक्ने हो ?, हाम्राविरूद्ध यस्तै अभिव्यक्ति दिने हो ?,’ उनले प्रतिप्रश्न गरे ।
त्यसपछि उनले २०७९ को प्रतिनिधिसभा चुनावको प्रसंग निकाल्दै शेखरपक्षबाट असहयोग भएको बताए । चौधरी देउवाको निगाहबाट केन्द्रीय सदस्यमा निर्वाचित पात्र हुन् । २०६४ को संविधानसभा निर्वाचनपछि एमाले कोटाबाट सभासद् बनेका चौधरी २०७४ मा कांग्रेस प्रवेश गरेका थिए । कांग्रेस प्रवेश गर्नसाथ चौधरीले समानुपातिक सांसद बन्ने अवसर पाएका थिए । पछिल्लो समय उनी नेपाली कांग्रेसको केन्द्रीय कोषाध्यक्ष बन्ने लाइनमासमेत उभिएका थिए । विधानअनुसार कांग्रेसमा केन्द्रीय सदस्य बन्न १० वर्ष क्रियाशील सदस्य भएको हुनुपर्छ । तर २०७४ मा कांग्रेस प्रवेश गरेका चौधरीले चार वर्षपछि २०७८ मंसिरमा केन्द्रीय सदस्य बन्ने मौका पाए ।
मंगलबार रमेश रिजाल, उमा रेग्मी, जीपछिरिङ लामा, अर्जुनप्रसाद जोशी, मीनबहादुर विश्वकर्मा, देवेन्द्रराज कँडेल, डा. डिला संग्रौला, रमेश लेखक, किरण यादव, लक्ष्मी परियार, कृष्णकिशोर घिमिरे, टेकप्रसाद गुरुङ, चन्द्रबहादुर केसी, मानबहादुर नेपाली, उदयशमशेर राणा, दिलमान पाख्रिन, रामहरि खतिवडा, विनोदकुमार चौधरी, गुरू बराल, उर्मिला नेपाल केसी, सीताकुमारी राना, राधा घले, सीतादेवी देवकोटा, शारदा पौडेल र आमन्त्रित सदस्य पुष्पराज पराजुलीले आ–आफ्नो धारणा राखेका थिए । यसरी धारणा राख्ने अधिकांश केन्द्रीय सदस्य देउवापक्षका हुन् ।
केन्द्रीय सदस्य उदयशमशेरले नेताहरुमा छाडापन देखिएको बताए । बागमती प्रदेशको बजेटमा छाडापन देखिएको दाबी गर्दै उनले यसलाई नियन्त्रण गर्न जोड दिए । ‘बागमती प्रदेशको बजेट छाडा रूपमा आयो । यसलाई कसरी ठीक बाटोमा लैजाने पार्टीले पनि एउटा मेकानिजम बनाउनुपर्छ, सदन र बाहिर पनि कतिपय नेताहरूले छाडा भएर कुरा उठाएका छन्, त्यसलाई कसरी कन्ट्रोल गर्ने पार्टीले पनि ध्यान दिनुपर्छ,’ राणाले भने, ‘बजेट ल्याउने बेला पनि पार्टीले सांसदहरूसँग छलफल गर्नुप¥यो र सांसदहरूले पनि बोल्दा लक्ष्मणरेखा काट्न भएन ।’
सत्तामा रहेका केन्द्रीय सदस्यहरुले गठबन्धनको विकल्प नखोज्न आग्रह गरे । गृहमन्त्रीसमेत रहेका केन्द्रीय सदस्य रमेश लेखकले यो गठबन्धनको विकल्प नखोज्न आग्रह गरे । ‘गठबन्धनलाई राम्रोसँग हिँडाएर कांग्रेसको हितमा जान सक्ने किसिमले काम गरिरहेका छौं । अरू राजनीतिक दलहरूलाई पनि समेटेर अहिलेको सरकारलाई निरन्तरता दिन उपयुक्त हुन्छ । अहिले अर्को विकल्पमा कुरा गर्न थाल्यांै भने गन्तव्यमा पुग्दैनौं । कांग्रेसलाई ठीक हुँदैन,’ लेखकले भने ।
लेखकले प्रयास गर्दागर्दै पनि कमीकमजोरी भएकोले सुधार्दै लगिने बताए । ‘प्रयास गर्दागर्दै पनि कमीकमजोरी हुन्छन् । धेरै साथीहरू सरकारमा बस्नुभएको छ, नबसेका साथीहरूले पनि अवस्था बुझ्नुभएकै छ,’ उनले भने ।कांग्रेस प्रवक्ता डा. महतले पनि गठबन्धनको विकल्प नरहेको बताए । ‘गठबन्धनको बारेमा त समग्रमा अब धेरै विकल्प हामीसँग छैन । कसैको बहुमत छैन । विभिन्न खाले परीक्षण भइसक्यो सत्ता समीकरणको । गठबन्धन भन्नेबित्तिकै सबैकुरा आफूले भनेको जस्तो हुँदैन । त्यो कुरा साथीहरूले बुझ्नुभएको छ,’ महतले भने, ‘यद्यपि कतिपय साथीहरूको गुनासो छ । तथापि गठबन्धनका विषयमा फेरि प्रतिकूल विचार केही आएको छैन । डेलिभरी अझ राम्रो हुनुपर्छ, पार्टीबाट गएका मन्त्रीहरूले राम्रो काम गर्नुपर्छ भन्ने छ ।’
