काठमाडौं-
नेपाल–चीनबीचको सम्बन्धलाई थप बलियो बनाउन परम्परागत चिनियाँ चिकित्सा प्रणाली (Traditional Chinese Medicine - TCM) प्रभावकारी माध्यम बन्न सक्ने कोशी प्रदेशकी प्रदेश सभा सदस्य मिना श्रेष्ठले बताएकी छन्।
काठमाडौंस्थित रेडिसन होटलमा मंगलबार आयोजित विशेष कार्यक्रममा बोल्दै श्रेष्ठले परम्परागत उपचार प्रणालीले द्विपक्षीय सम्बन्ध मात्र होइन, नेपालमा स्वास्थ्य सेवाको क्षेत्रमा समेत योगदान पुर्याउने विश्वास व्यक्त गरिन्।
चिनियाँ परम्परागत चिकित्सा प्रणाली प्रवर्द्धन गर्ने उद्देश्यले आयोजित उक्त कार्यक्रममा चीनको जनवादी गणतन्त्रको नेपालस्थित दूतावास र चीनको विदेशी भाषा प्रकाशन प्रशासनको निर्देशनमा CICG अन्तर्गत युरोप तथा अफ्रिकाको केन्द्र (चाइना टुडे) द्वारा आयोजना गरिएको हो। कार्यक्रममा बेइजिङ वु लिन तेह च्यारिटी फाउन्डेसन, युनान अन्तर्राष्ट्रिय आर्थिक, व्यापार तथा सांस्कृतिक सहयोग केन्द्र, पोटाला पत्रिकाको व्यापक सञ्चार प्लेटफर्म, साउथ एशिया नेटवर्क टिभी, र अरनिको समाजको सहआयोजन रहेको थियो।
कार्यक्रममा चिनियाँ विशेषज्ञ टोली तथा वरिष्ठ चिकित्सकहरूद्वारा चिनियाँ चिकित्सा प्रणालीअन्तर्गत एक्युपञ्चर, हर्बल मेडिसिनलगायतका विधिबारे प्राविधिक प्रस्तुति दिइएको थियो। साथै, नेपालका स्वास्थ्यकर्मीलाई चिनियाँ विशेषज्ञहरूद्वारा प्रशिक्षण दिने घोषणा पनि गरिएको छ।
सभा सदस्य मिना श्रेष्ठले भनिन्, “नेपालमा प्राचीनकालदेखि नै आयुर्वेदिक र घरेलु उपचारको परम्परा छ। हाम्रा पहाडी भेगहरूमा प्रशस्त जडीबुटी पाइन्छन्, जसको वैज्ञानिक ढंगले प्रयोग गर्न सकेमा ठूला लाभ लिन सकिन्छ।” उनले चिनियाँ परम्परागत चिकित्सा प्रणालीमार्फत नेपाल–चीन सम्बन्ध अझ मजबुत हुने विश्वास व्यक्त गर्दै चिनियाँ सरकारप्रति निरन्तर सहकार्यको लागि धन्यवाद दिइन्।
स्वास्थ्य मन्त्रालयका प्रतिनिधिले नेपालमा वैकल्पिक चिकित्सा विधिको विस्तारका लागि चिनियाँ सहयोग महत्वपूर्ण रहेको बताए। विशेषतः ग्रामीण क्षेत्रमा सस्तो र सुलभ उपचार प्रणालीको रुपमा यस्ता विधि उपयोगी हुने उल्लेख गरे।
कार्यक्रमको अवसरमा पोटाला पत्रिका, साउथ एसिया नेटवर्क टिभी र अरनिको समाजबीच जनकल्याण सहकार्यका लागि त्रिपक्षीय समझदारीमा हस्ताक्षर भएको छ। त्यस्तै, पोटाला सञ्चार र साउथ एसिया वेभ टिभी नेटवर्कबीच पनि सहकार्यको सम्झौता गरिएको छ। कार्यक्रममा चिनियाँ परम्परागत चिकित्सा सम्बन्धी पुस्तकहरू अतिथिहरूलाई हस्तान्तरण गरिएको थियो।
कार्यक्रमको सहव्यवस्थापन सियुआन अस्पताल, सन याट सेन युनिभर्सिटी, नेपाल–चीन सांस्कृतिक तथा शैक्षिक परिषद्, क्विजाउ बेलिङ औषधी कम्पनी लिमिटेड, बेजिङ युनाइटेड हार्ट वेलफेयर फाउन्डेसन, इन्स्टिच्युट अफ टिबेटन स्टडीज, मिन्जु विश्वविद्यालय लगायतका संस्थाहरूले गरेका थिए।
आयोजक संस्थाका अनुसार, उक्त कार्यक्रमले नेपाल–चीन सम्बन्धलाई थप सुदृढ गर्नुका साथै स्वास्थ्य क्षेत्रको सहकार्य विस्तार गर्न उल्लेखनीय योगदान गर्ने विश्वास गरिएको छ। कार्यक्रममा चिकित्सक, अनुसन्धानकर्ता, वैकल्पिक उपचारकर्मी, सञ्चारकर्मी र विभिन्न क्षेत्रका विशिष्ट व्यक्तिहरूको उपस्थिति रहेको थियो।
