काठमाडौं– जारी लकडाउन आगामी नया“ वर्षको ३ बैशाखसम्म लम्बिएको छ । एकमन्त्रीका अनुसार सोमबार बसेको मन्त्रिपरिषद् बैठकले लकडाउन अवधि लम्बाउने निर्णय गरेको हो ।
पछिल्लो समय कोरोना भाइरसको जोखिम बढ्दै गएपछि सरकारले लकडाउन लब्याउने निर्णय गर्नुपरेको ती मन्त्रीले भनेका छन् । सरकारी स्रोतका अनुसार कोरोनाको संक्रमण दोस्रो चरणमा प्रवेश गरेकाले लकडाउन अवधि लम्ब्याइएको हो । गत शनिबार पहिलोपटक एकबाट अर्को व्यक्तिमा कोरोना संक्रमण नतिजा सार्वजनिक भएसँगै थप चुनौती थपिएको छ ।
यसअघि सरकारले ११ चैतदेखि लागू एक हप्ता लकडाउन गरेको थियो । त्यसपश्चात पनि १८ चैतमा दोस्रोपटक लकडाउन एक हप्ता लम्ब्याउने निर्णय गरेको थियो । दोस्रोपटक थप गरेको अवधि मंगलबार सकिने भएकाले फेरि लकडाउन अवधि थप गरेको हो । स्वास्थ्य मन्त्रालयका अनुसार हालसम्म नेपालमा ९ जना कोरोना संक्रमित भेटिएका छन् । एक जना उपचारपछि फर्किसकेका छन् भने ८ जनाको विभिन्न अस्पतालमा उपचार भइरहेको र उनीहरूको अवस्था सामान्य रहेको अस्पतालले बताएको छ ।
