- उपप्रधानमन्त्रीसमेत रहेका सहरी विकासमन्त्री प्रकाशमान सिंहमार्फत काठमाडौंमा तरुण दलको भवन बनाउन तीन करोड छुट्याउन सफल
- नेपाली कांग्रेस दोलखाको भवन बनाउन बागमती प्रदेश सरकारबाट चार करोड विनियोजन, दुई करोड १४ लाखमा ठेक्का
काठमाडौं– सुशासन र पारदर्शिता नेपाली कांग्रेसले सरकारमा आएदेखि घन्काउँदै आएको नारा हो । कांग्रेसका शीर्ष नेताहरु यही नारा उछाल्दै अहिलेका प्रधानमन्त्री केपी शर्मा ओलीले ठीकसँग शासन नगरेको आरोप लगाउँदै आएका थिए ।
कांग्रेस संस्थापनइतरका नेता डा. शेखर कोइराला सत्ताको आलोचना गर्दै आएका नेतामध्ये एक पर्छन् । शनिबारमात्र कोइरालाले भक्तपुर पुगेर सत्ताको चाबी कांग्रेससँग नरहेको तर्क अघि सारेका थिए । ‘सरकार र सत्ता फरक कुरा हुन् । हामी सरकारमा छौं । नेपाली कांग्रेस सरकारमा छ । तर सत्ताको चाबी हामीसित छैन,’ कोइरालाले भनेका थिए ।
उनै कोइरालाको दल कांग्रेसले भने सरकारको ढुकुटीको रकम आफ्नो दलको कार्यालय र भ्रातृ संगठनको भवन बनाउन छुट्याउन सफल भएको छ । एमालेसँग सत्तामा रहेको कांग्रेसले संघीय सरकारदेखि प्रदेश सरकारबाट दलीय भवन बनाउन बजेटबाट करोडौं छुट्याएको हो । सबैभन्दा पहिले त उपप्रधानमन्त्रीसमेत रहेका सहरी विकासमन्त्री प्रकाशमान सिंहमार्फत तरुण दलको भवन बनाउन तीन करोड रुपैयाँ छुट्याउन सफल भएको हो ।
काठमाडौंको रविभवनमा कांग्रेसको भ्रातृ संगठनको भवन बनाउन बजेट पाएकोमा तरुण दलका अध्यक्ष विद्धान गुरुङले विज्ञप्ति नै जारी गरेर सभापति शेरबहादुर देउवा र मन्त्री सिंहलाई धन्यवाद दिएका थिए । विज्ञप्ति आएसँग सामाजिक सञ्जालमा चर्को विरोध सुरु भएपछि तरुण दलले अर्को विज्ञप्ति जारी गर्दै त्यसको बचाउ गरेको थियो । सच्याएको विज्ञप्तिमा उक्त बजेट गणेशमान सिंह स्मृति भवनका लागि भएको बताइएको छ ।
‘नेपाल तरुण दलको आग्रहमा गणेशमान सिंह स्मृति भवनका लागि तीन करोड रुपैयाँ विनियोजन भएकोमा उपप्रधानमन्त्री एवं सहरी विकासमन्त्री प्रकाशमान सिंहज्यूप्रति आभार व्यक्त गर्दछौं,’ शनिबार जारी गरेको विज्ञप्तिमा थप भनिएको छ, ‘युवाहरूको सशक्तीकरण, क्षमता विकास र सीपयुक्त तालिम सञ्चालनसहित नेतृत्व विकासका लागि सो भवनले योगदान पुग्ने विश्वास लिएका छौं । युवाहरूको हकहित, क्षमता विकास र प्रतिभा प्रवद्र्धनका लागि तरुण दलको आग्रहमा भवनका लागि बजेट विनियोजन भएको विषयलाई अन्यथा ढंगबाट गलत प्रचार नगरिदिनुहुन अनुरोध गर्दछौं ।’
कांग्रेस नेता सिंहले आफ्ना बुवा गणेशमानको नाममा देशका विभिन्न ठाउँमा भवन तथा पार्कहरु बनाउन सरकारबाट बजेट विनियोजन गर्दै आएका छन् । काठमाडौंका विभिन्न स्थानमा गणेशमान सिंह प्रतिष्ठानबाट यस्ता बजेटहरु माग गर्ने र बजेट छुट्याउने काम विगतबाटै जारी छ । यसपटक तरुण दलले पनि यही नाममा आफ्नो भवन बनाउन बजेट माग गरेको देखिन्छ ।
दोलखामा कांग्रेस भवनका लागि दुई करोड
संघमा भ्रातृ संगठनका लागि बजेट दिएको कांग्रेसले बागमती प्रदेशको अर्थ मन्त्रालयबाट दोलखाको पार्टी कार्यालयका लागि दुई करोड १४ लाख रुपैयाँबराबरको ठेक्का सम्झौता गरेको छ । चार करोड रुपैयाँ बजेट विनियोजन भएकोमा बिपी स्मृति भवनको नाममा बागमती प्रदेशको भौतिक पूर्वाधार विकास मन्त्रालयअन्तर्गतको सहरी विकास तथा भवन कार्यालय काभ्रेले दुई करोड १४ लाख रुपैयाँमा ठेक्का सम्झौता गरेको हो ।
सहरी विकास तथा भवन कार्यालय धुलिखेल काभ्रेपलाञ्चोकले गत चैतको १५ गते भवन निर्माणका लागि टेण्डर आह्वान गरेको थियो । जेठ ९ गते पिआर÷यांग्रा÷डाइनामेट जेभी कम्पनीसँग दुई करोड १४ लाख ८९ हजार रुपैयाँ लागतमा काम सम्पन्न गर्ने गरी ठेक्का सम्झौता गरिएको सहरी विकास तथा भवन कार्यालयले जनायो । दोलखाको भीमेश्वर नगरपालिका–६ मा बिपी स्मृति भवन नाममा बन्न लागेको भवन सम्झौता भएको मितिले १८ महिनाभित्र काम सम्पन्न गरिसक्नुपर्ने छ ।
ठेक्का सम्झौता भएसँगै जेठ १७ गते कांग्रेस दोलखाले भवनको शिलान्यास कार्यक्रम आयोजना गरेको थियो । भवनको शिलान्यास कांग्रेस नेता कृष्णप्रसाद सिटौलाले गरेका थिए । बागमती प्रदेशका अर्थमन्त्री कुन्दनराज काफ्लेका सिटौला गुटका नेता हुन् । उनैको पहलमा बजेट परेकाले सिटौलालाई भवन शिलान्यासको मौका दिइएको कांग्रेस दोलखाका सभापति बर्मा लामाले बताए ।
