काठमाडौं - नेकपा माओवादी केन्द्रको पदाधिकारी बैठकले गृहमन्त्री रमेश लेखकले राजीनामा नदिएसम्म संघीय संसदको अवरोध जारी राख्ने निर्णय गरेको छ।
पार्टी अध्यक्ष पुष्पकमल दाहाल 'प्रचण्ड'को निवास खुमलटारमा शुक्रबार बसेको बैठकले भिजिट भिसा प्रकरणमा छानबिन सहज बनाउन मन्त्री लेखकको राजीनामा अपरिहार्य रहेको निष्कर्ष निकालेको हो।
सचिव लिलामणि पोखरेलले बैठकमा मध्यपहाडी जागरण अभियान जारी राख्ने र वाइसीएलको महाधिवेशनबारे छलफल गरिएको जानकारी दिए। साथै, नेपाल समाजवादी पार्टीसँगको एकता पछि नेता-कार्यकर्ता समायोजनबारे पनि छलफल गरिएको छ।
