विराटनगर– सत्तारुढ दल नेपाली कांग्रेसका नेता डा. शेखर कोइरालाले प्रधानमन्त्री केपी शर्मा ओलीको भनाइप्रति पार्टीले नबोलेकोमा अचम्म लागेको बताएका छन् । सोमबार पार्टी सभापति शेरबहादुर देउवाको निवासमा भएको पदाधिकारी बैठकमा यस विषयमा छलफल नभएकोमा आफू अचम्ममा परेको कोइरालाले बताएका हुन् ।
मोरङको विराटनगरमा मंगलबार आयोजित कांग्रेसको शुभेच्छुक संगठन नेपाल नाई संघको राष्ट्रिय परिषद् उद्घाटन गर्दै कोइरालाले यस्तो धारणा राखेका हुन् । ‘मलाई त के लागेको थियो सभापतिजीको घरमा भएको बैठकमा देशको बारेमा कुरा होला, भर्खरै प्रधानमन्त्रीले १५ गते काठमाडौं कब्जा गर्न पार्टी कार्यकर्तालाई दिएको निर्देशनका बारेमा छलफल होला तर दुर्भाग्य, यो विषय उठ्दै उठेन,’ कोइरालाले भने, ‘छलफल के विषयमा हुन्छ भने मेरो विषयमा हुन्छ । योभन्दा हस्यास्पद के हुन्छ ?’
सोमबार बूढानीलकण्ठमा सम्पन्न पदाधिकारी बैठकमा नेताहरुले गृहमन्त्री रमेश लेखकको राजीनामा मागबारे शेखरसँग स्पष्टीकरण सोध्नुपर्ने बताएका थिए । यता प्रधानमन्त्री ओलीले भने मंगलबार काठमाडौंको सडक कब्जामा लिन आफ्ना कार्यकर्तालाई निर्देशन दिएका थिए । आइतबारको सचिवालय बैठकमा ओलीले भनेका थिए, ‘१५ गते ११ बजेदेखि २ बजेसम्म काठमाडौंमा नेकपा एमालेको नियन्त्रण हुनुपर्छ । कसरी कुन संस्था अगाडि लाग्छ, कुन संस्थाको आयोजना हुन्छ त्यसलाई छाडिदिनुस् ।’
कोइरालाले देशको सर्वोच्च पदमा बसेको मान्छेले गैरराजनीति र मुठभेडको भाषा बोल्दासमेत कांग्रेसले यसबारेमा आधिकारिक धारणा नराख्नु दुखद भएको बताए । ‘के बाध्यता आइप¥यो त्यस्तो प्रधानमन्त्रीले जे–जे गरे पनि कांग्रेसले छुट दिँदै जाने ?,’ कोइरालाले प्रश्न गरे । प्रधानमन्त्री व्यक्तिमात्रै नभएर संस्था पनि भएको भन्दै त्यो पदमा बस्ने मान्छेले बोल्ने हरेक कुराले अर्थ राख्ने कोइरालाको तर्क थियो ।
