- कांग्रेसका नेताहरु डा शशांक कोइराला, डा शेखर कोइराला, महामन्त्री गगन थापा हिन्दु राष्ट्रको पक्षमा बोल्न शुरु
- २०८० फागुन १० गते ललितपुरको गोदावरीमा भएको महासमितिमा हिन्दु राष्ट्र निर्माणका लागि भन्दै केन्द्रीय सदस्य शंकर भण्डारीले प्रस्ताव पेश गरेका थिए
काठमाडौं– शीर्ष दल नेपाली कांग्रेसले पछिल्लो दिन धार्मिक एजेन्डालाई जोडतोडका साथ उठाउन थालेको छ । भावी नेतृत्वको रुपमा हेरिएका डा शेखर कोइरालादेखि कांग्रेस महामन्त्री गगन थापाले हिन्दु राष्ट्रको एजेन्डा चर्काउन थालेका हुन् ।
१५ औं महाधिवेशनमा कांग्रेस नेतृत्व दाबीका लागि सबैभन्दा पहिले हिन्दु धर्मबारे जनमत संग्रह हुनुपर्ने आवाज पूर्व महामन्त्री डा शशांक कोइरालाले उठान गरेका थिए । शशांकले प्रकाशमान सिंह, विमलेन्द्र निधिलाई साथमा लिएर नेतृत्व दाबी गर्ने तयारी गरिरहेका छन् ।
महामन्त्री थापा पनि नेतृत्व दाबीका लागि देश दौडाहमा छन् र यस मुद्दामा वकालत गर्न थालेका हुन् । थापाले धर्मनिरपेक्ष राष्ट्र हुनै नसक्ने बताउँदै आउँदा कांग्रेस नेता डा शेखरले पनि हिन्दुवादी कार्ड अघि सारेका छन् । हिजोआज महामन्त्री गगन आइकनिक रुपमा फूलटीकाका साथ देखिन्छन् ।
२०८० फागुन १० गते ललितपुरको गोदावरीमा भएको महासमितिमा शंकर भण्डारीले हिन्दु राष्ट्र निर्माणका लागि भन्दै सभापति शेरबहादुर देउवालाई प्रस्ताव नै बुझाएका थिए । त्यसअघि पनि डा शशांकले यसबारे वकालत गर्दै आएका थिए । महाधिवेशनअघि डा शेखरले पनि हिन्दुवादी कार्ड प्रयोग गर्न थालेका हुन् केही दिनअघि कांग्रेसका एक असन्तुष्ट नेता लोकेश ढकालले सार्वजनिक रुपमै कांग्रेसले हिन्दु राष्ट्रको एजेन्डा लिने बताएका थिए ।
त्यतिमात्र हैन ढकालले राजा ल्याउन कांग्रेस तयार भइसकेको दाबी गरे । ‘मेरो पार्टी सभापति अहिले यङ किङमा आइसक्नुभएको छ । विस्तारै कांग्रेसले राजसंस्था र हिन्दुराष्ट्रको पक्षमा आउँछ ।’ हृदयेन्द्र शाहलाई राजा बनाए राजसंस्था स्वीकार्ने अभिव्यक्ति देउवाले दिएको सूचना आफूले पाएको ढकालले दाबी गर्दै आएका छन् । नेपाली कांग्रेसलाई हिन्दु राष्ट्र र राजसंस्थाका लागि भारतले दबाव दिइरहेको बताइन्छ ।
देउवाको बचाउमा उत्रियो कांग्रेस
कांग्रेस सभापति देउवा आफैले यसबारे केही बोलेका छैनन् । यद्यपि उनले विज्ञप्ति जारी गर्न लगाउँदै यो विषय भ्रामक भएको दाबी गरेको छ । बिहीबार एक विज्ञप्ति जारी गर्दै कांग्रेस केन्द्रीय कार्यालयका मुख्य सचिव कृष्णप्रसाद पौडेलले यस्ता खालका समाचार कपोलकल्पित भएको जनाएको छ । ‘नेपाली कांग्रेसका सभापति, संसदीय दलका नेता एवं पूर्व प्रधानमन्त्री शेरबहादुर देउवाको धारणा भनी राजसंस्थाबारे प्रकाशित भएको भ्रामक र कपोलकल्पित समाचारप्रति नेपाली कांग्रेसको गम्भीर ध्यानाकृष्ट भएको छ,’ पौडेलले जारी गरेको विज्ञप्तिमा भनिएको छ ।
देउवाले लोकतान्त्रिक व्यवस्थाका लागि नेतृत्वदायी भूमिका निर्वाह गर्दै आएको तर्क गर्दै कांग्रेसले यस खालको सूचना छरिनु आपत्तिजनक काम भएको जनाएको छ । ‘कसैले क्षणिक स्वार्थ पूर्ति गर्न राजसंस्थाबारे उहाँको धारणा भनि संचार माध्यममा गलत सूचना संप्रेषण गर्नु अनैतिक र घोर आपत्तिजनक कार्य हो,’ विज्ञप्तिमा भनिएको छ, ‘उहाँले कहि कतैं नबोलेको, नभनेको र नसोचेको कुरालाई मनगढन्ते ढंगले आम संचारको माध्यमलाई दुरुपयोग गर्दै प्रचारमा ल्याउनु पत्रकारिताको मर्म र भावना विपरीत हो ।’
कांग्रेस प्रचार विभागका प्रमुख मीनबहादुर विश्वकर्माले पनि राजसंस्थाबारे देउवाले बोल्दै नबोलेको विषय प्रचारमा आएको दाबी गरेका छन् । ‘उहाँले कहीकतै नबोलेको, नभनेको र नसोचेको कुरा मनगडन्ते ढंगले प्रचारमा ल्याउनु पत्रकारिताको क्षेत्र र धर्म होइन, कसैले क्षणिक स्वार्थ पूर्ति गर्न राज संस्थाबारे उहाँको धारणा भनी मिडियामा गलत सूचना संप्रेषण गर्नु अनैतिक कार्य हो,’ विश्वकर्माले भनेका छन् ।
चैत १० गते कांग्रेसको केन्द्रीय कार्यालयमा आयोजित एक कार्यक्रममा देउवाले ज्ञानेन्द्र शाह राजा हुन लायक पात्र नभएको ठोकुवा गरेका थिए । ‘संवैधानिक राजा हुन लायक पनि छैनन् । संवैधानिक राजा हुन पनि सक्दैनन् । राप्रपा पनि पछि पछुताउँछ । राप्रपाले बरु पार्टी सभापति बनाए हुन्छ । पार्टीमा लाग्यो भने राप्रपाले पनि दुःख पाउँछ,’ देउवाले भनेका थिए ।
-1745656903.jpeg)