- कैलाश चौधरी र घनश्याम चौधरीलाई पन्छाउँदै रामेश्वर चौधरी मन्त्रीमा नियुक्त
- रेशम–रञ्जिताबीच विवाद हुँदा एक मन्त्रीका लागि दुई सांसदको नाम सिफारिस हुँदा लफडा
- नेतृत्व नै घर झगडामा रुमलिँदा संकटमा नयाँ दल
- रेशम–रञ्जिता झगडाले नागरिक उन्मुक्ति र जनमत एकतामा ढिलाइ
काठमाडौं– सुदूरपश्चिम प्रदेशको उद्योग, पर्यटन, वन तथा वातावरणमन्त्रीमा रामेश्वर चौधरी नियुक्त भएका छन् । सुदूरपश्चिम प्रदेशका मुख्यमन्त्री कमलबहादुर शाहको सिफारिसमा प्रदेश प्रमुख नजिर मियाँले नेपालको संविधानको धारा १६८ बमोजिम चौधरीलाई आइतबार मन्त्रीमा नियुक्त गरेका हुन् । उनले आइतबार नै पद तथा गोपनीयताको शपथ लिए ।
नागरिक उन्मुक्ति पार्टी (नाउपा)को तर्फबाट प्रदेशसभा सांसद चौधरी मन्त्री बनेका हुन् । पार्टीका अध्यक्ष रञ्जिता श्रेष्ठ चौधरी र संरक्षक रेशमलाल चौधरीपक्षबीचको विवादले उनलाई चिट्ठा परेको छ । दुवै पक्षले यसअघि सिफारिस गरेका दुई सांसदले भने यो अवसर गुमाएका छन् ।
पार्टी अध्यक्ष श्रेष्ठले प्रदेशसभा सदस्य कैलाश चौधरीलाई मन्त्री बनाउन सिफारिस गर्न संसदीय दललाई निर्देशन दिएको थियो । संसदीय दलको बैठकले भने अध्यक्षको निर्देशनविपरीत संसदीय दलका नेता घनश्याम चौधरीलाई मन्त्रीमा सिफारिस गर्ने निर्णय गरेको थियो ।
तर घनश्यामले मन्त्री बन्न अस्वीकार गरे । र, आइतबार बसेको अर्को बैठकले रामेश्वरलाई मन्त्री बनाउन सिफारिस गरेको थियो । दलकी प्रमुख सचेतक इन्दिरा गिरीले दलभित्र विवाद भएको स्वीकार गर्दै सहमतिमा अगाडि बढेको बताइन् । ‘दलमा विवाद हुन्छ, सहमति खोजेर अघि बढ्ने हो,’ उनले भनिन् ।
विवादास्पद ‘अडियो’ सार्वजनिक भएपछि उक्त पार्टीबाट उद्योग, पर्यटन, वन तथा वातावरणमन्त्रीको जिम्मेवारीमा रहेका लक्ष्मणकिशोर चौधरीले गत चैतमा पदबाट राजीनामा दिएका थिए ।
घरझगडाले पार्टीमा लफडा
सुदूरपश्चिम प्रदेश सरकारमा एक मन्त्रीका लागि दुई जना सांसदलाई अघि सारेका घटनाले नागरिक उन्मुक्ति (नाउपा) भित्र पारिवारिक विवाद पुनः सतहमा आएको छ । रेशम र रञ्जिता श्रीमान्–श्रीमती हुन् । उनीहरूबीच बेमेल छ । त्यही भएर रञ्जिताले उद्योग, पर्यटन, वन तथा वातावरण मन्त्रालयमा सांसद कैलाशलाई मन्त्रीका लागि सिफारिस गरेकी थिइन् ।
रञ्जिताको यो कदममा रेशम र उनी पक्षको गम्भीर असहमति थियो । उनले कैलाशलाई मन्त्री बनाउने निर्णयको विरोध गरे । मन्त्रीका लागि रेशम समूहले घनश्याम चौधरीलाई अगाडि सारेको थियो । तर नाउपा सुदूरपश्चिम प्रदेश संसदीय दलका नेतासमेत रहेका उनले मन्त्री बन्न अस्वीकार गरे । पूर्वमन्त्रीसमेत रहेका उनले विवादकै कारण मन्त्री बन्न अस्वीकार गरेका हुन् । संसदीय दलमा बहुमत पनि रेशम र उनको पक्षमा छ । तर, अध्यक्ष रञ्जिताले आफूनिकट कैलाशलाई सिफारिस गर्दा लफडा भएको थियो ।
उसो त नागरिक उन्मुक्ति पार्टीमा यो विवाद पहिलो न अन्तिम । रेशम–रञ्जिता कलहको एउटा परिघटना मात्रै हो । उनीहरूबीचको कलहले पश्चिम तराईबाट देशको राजनीतिमा उदाएको दल नाउपालाई संकटोन्मुख बनाएको छ । पुराना दलहरूको गढ भत्काउँदै राजनीतिमा उदय यो दलको स्थापनाकै बेलादेखि रञ्जिता र रेशम कमाण्डर हुन् । खुला मोर्चामा अध्यक्ष रञ्जिता र आन्तरिक मोर्चामा संरक्षक रेशम प्रभावी छन् । यी दुईबीच शक्ति संघर्ष विगतदेखि नै जारी छ । एकले अर्कालाई पार्टीको कार्यकारी भूमिकामा अस्वीकार गर्दै आएका छन् ।
नाउपा थारुवान आन्दोलन र ७ भदौ २०७२ मा भएको टीकापुर घटना र त्यसपछि भएका परिघटनाको जगमा स्थापित स्थापित भएको हो । यतिबेला भने उक्त दल रेशम–रञ्जिताको घर झगडाको सिकार भएको छ ।नाउपाका एक नेताका अनुसार नाउपा र जनमत पार्टीबीचको एकता ढिलाइमा पनि रेशम–रञ्जिता झगडा कारक छ । उनले भने, ‘रञ्जिता जनमतसँगको एकतामा अध्यक्ष सिकेकै हैसियतमा रहन चाहन्छिन् । नभए, पार्टी एकता गर्ने उनको चाहना छैन ।’
यसअघि २७ पुस २०८० मा टीकापुरमा भएको पार्टीको पहिलो महाधिवेशनबाट अध्यक्षमा रेशम निर्विरोध निर्वाचित भएका थिए । त्यसबेला रञ्जिता असन्तुष्ट हुँदै बन्दसत्र छाडेर हिँडेकी थिइन् । तर, निर्वाचन आयोगले दुई महिना नबित्दै २४ फागुनमा रेशम सदस्य हुन पनि अयोग्य भएको निर्णय गरेको थियो ।आयोगको सो निर्णयसँगै नाउपाको अध्यक्षमा रञ्जिता फर्किन् । तर, त्यसयता श्रीमान्–श्रीमतीको शक्ति संघर्ष पार्टी र सत्तामा देखिएको छ । मूलतः थारुहरूले पुराना दलहरू कांग्रेस, एमाले, माओवादी, राप्रपा, जसपाजस्ता दलहरूविरुद्ध विद्रोह गर्दा स्थापित भएको दल नाउपालाई संकटतर्फ धकेलेको देखिएको ती नेता बताउँछन् । यसरी पश्चिम तराईबाट उदाएको दल नाउपामा श्रीमान्–श्रीमती झगडाको प्रभाव पार्टी र सत्तामा देखिएको छ ।
-1745656903.jpeg)