फूर्तिसाथ यो पनि गर्छु त्यो पनि गर्छु भनेर पहिलेजस्तो गरी आँट गरेको छैन । खल्तीमा हुँदा पो आँट गरिन्छ । राज्यको ढुकुटीमा नहुँदा आँट गर्न पनि गाह्रो हुन्छ नि ! धेरै मुस्किलले कताको रकम कता मिलाएर काम गर्नुपरेको छ ।
केपी शर्मा ओली
प्रधानमन्त्री
- नेकपाकालमा ओलीले टावर निर्माणदेखि घरघरमा पाइपबाट ग्यास पु¥याउनेदेखि, रेल, पानीजहाज र स्याटालाइट परियोजनाका सपना बाँड्थे
- यसपटक प्रधानमन्त्रीमा फर्केर आउँदा राज्यको ढुकुटीमा पैसा नै नभएको ओलीको भनाइ
- त्यसै कारण फूर्तिसाथ यो पनि गर्छु त्यो पनि गर्छु भनेर पहिलेजस्तो गरी आँट नगरेको ओली बताउँछन्
काठमाडौं– दोस्रोपटक प्रधानमन्त्री हुँदा हौसियर एकैचोटि ३९६ अस्पताल उद्घाटन गरेका केपी शर्मा ओली अहिले भने बजेटको कारण देखाउँदै आफ्नो योजना अलपत्र भएको बताएका छन् । २०७७ साल मंसिर १५ मा तामझाम र हतारहतार शिलान्यास गरिएका अस्पतालहरुको अवस्था भद्रगोल भएपछि ओलीले यस्तो बताएका हुन् ।
मंगलबार बालुवाटारमा आयोजित ‘सिनेपा’ अत्याधुनिक इण्डोर छायांकन स्टुडियो निर्माण आरम्भ उद्घाटनमा अहिले हौसिने समय नरहेको बताएका हुन् । ‘जे पनि हुन्छ, भन्थेँ । जे पनि गर्नुपर्छ भन्थेँ । एकैचोटि ३९६ वटा हस्पिटल शिलान्यास गरेको हो नि,’ प्रधानमन्त्री ओलीले भने ।अहिले भने सरकारसँग बजेटकै अभाव भएकाले कुनै पनि योजना सुरू गर्दा विचार गर्नुपर्ने अवस्था आएको उनको भनाइ थियो । ‘अघिल्लोचोटि प्रधानमन्त्री हुँदा अहिलेजस्तो त्यसबेला पैसाको हाहाकार थिएन,’ ओलीले भने ।
नेकपाकालमा ओलीले टावर निर्माणदेखि अपूरा कार्ययोजनासमेत उद्घाटन गर्थे । त्यतिबेला ओलीले घरघरमा पाइपबाट ग्यास पु¥याउनेदेखि रेल, पानीजहाज र स्याटालाइट परियोजनाका सपना बाँडेका थिए । पहिले आफूले सुरू गरेका योजनाहरु तीन वर्षसम्म अलपत्र भएका र ती सुरू गर्ने मन भए पनि पैसा नभएको ओलीको तर्क रह्यो । ‘तीन वर्षको ग्यापपछि म फेरि प्रधानमन्त्रीमा फर्केर आउँदा जहाँसम्म गाडी पुगेको थियो, त्यही रोकेको गाडी त्यहाँबाट अगाडि बढेको थिएन । फेरि सुरू गर्नुप¥यो । तर सुरू गर्नलाई पैसा नै छैन,’ प्रधानमन्त्री ओलीले भने ।
यसपटक उनी कार्यक्रमहरु अघि सार्न निकै हच्किएका सुनिन्छन् । ‘त्यसैकारण फूर्तिसाथ यो पनि गर्छु त्यो पनि गर्छु भनेर पहिलेजस्तो गरी आँट गरेको छैन,’ ओलीले भने, ‘किनकि खल्तीमा हुँदा पो आँट गरिन्छ । राज्यको ढुकुटीमा नहुँदा आँट गर्न पनि गाह्रो हुन्छ नि ! धेरै मुस्किलले कताको रकम कता मिलाएर काम गर्नुपर्ने छ ।’
देशको आर्थिक संकट गहिरिँदो छ । त्यसैले यसपटकको बजेट बनाउनअघि सरकारले निकै कसरत गरिरहेको छ । अर्थतन्त्रमा सरकारले लिएको गलत नीतिका कारण घरजग्गा व्यवसायदेखि बैंकिङ कारोबार कमजोर हुँदै गएको छ । यद्यपि, प्रधानमन्त्री ओलीले यो सरकारले ओरालो लागेको अर्थतन्त्रलाई ‘ब्रेक’ लगाइसकेको दाबी गरेका छन् । ‘तर हामीले ओरालो लागेको अर्थतन्त्रलाई ब्रेक लगाएका छौं । यो त्रिशूलीमा खस्नेवाला छैन । अब बाटोबाटै अगाडि बढ्छ,’ ओलीले भने ।
माओवादीलाई कटाक्ष– एक रुपैयाँमा पार्टी अफिस बन्दैन
कुनै पनि परियोजना बन्न निकै कठिन हुने उल्लेख गर्दै ओलीले नसक्ने काममा आँट गर्न नहुने सुझावसमेत दिए । कलाकार सीताराम कट्टेल र कुञ्जना घिमिरे ‘धुर्मुस–सुन्तली’को जोडीले चितवनमा निर्माण थालेको क्रिकेट मैदानको उदाहरण दिँदै ओलीले यस्तो सुझाएका हुन् ।
‘मैले यसो नगर बाबु, नानु, यो सम्भव छैन, भन्दाभन्दै गरे । धुर्मुस सुन्तलीले बहुत् दुःख पाए, माया लाग्छ,’ ओलीले भने । त्यसैगरी उनले एक रुपैयाँले पार्टी कार्यालय पनि नबन्ने तर्क गरे । ‘अस्ति हाम्रो पार्टी अफिस गएर एक–एक रुपैयाँमा हामी बनाउँछौं भन्ने पनि निस्किए,’ प्रधानमन्त्री ओलीले भने, ‘एक–एक रुपैयाँमा पार्टी अफिस बनाउने रे ! एक–एक रुपैयाँ दिन्छौं र पार्टी अफिस बनाउँछौं भन्नेलाई ‘ल ल्याऊ’ भन्दा वाचाबाट मुख फर्काए ।’
गत असोजमा विवादित व्यवसायी भाटभटेनी सुपरमार्केटका सञ्चालक मीनबहादुर गुरुङले एमाले कार्यालयका लागि कीर्तिपुरमा १० रोपनी १४ आना जग्गा दान दिएका थिए । उक्त जमिनमा ओलीले एमाले केन्द्रीय कार्यालय बनाउन शिलन्याससमेत गरेका थिए । त्यसपछि नेकपा माओवादी केन्द्रनिकट विद्यार्थी संगठन अखिल क्रान्तिकारीले नेकपा एमालेको पार्टी कार्यालय बनाउन भन्दै एक रुपैयाँ संकलन अभियान चलाएको थियो । काठमाडौंमा चलाइएको अभियानमा सोह्रखुट्टे र माइतीघरबाट तीन हजार ४१३ रुपैयाँ संकलन भएको थियो ।
-1745656903.jpeg)