- प्रधानमन्त्री केपी शर्मा ओली र कांग्रेस सभापति शेरबहादुर देउवाबीचको भेटपछि डा. गुणाकर भट्टको राजीनामा स्वीकृत गर्न दबाब
- भट्टलाई कांग्रेसको कोटाबाट गभर्नरमा सिफारिस गरिँदै
- गभर्नर सिफारिस समितिमा एक सदस्य थप भएसँगै नयाँ गभर्नर नियुक्ति अघि बढ्ने
काठमाडौं– नयाँ गभर्नर कसलाई बनाउने भन्ने विषयमा सत्तारुढ दल सहमतिनजिक पुगेका छन् । शनिबार राति प्रधानमन्त्री केपी शर्मा ओली र नेपाली कांग्रेसका सभापति शेरबहादुर देउवाबीच भएको लामो छलफलपछि गठबन्धन दल गभर्नर नियुक्तिमा सहमतिनजिक पुगेका हुन् ।
थाइल्याण्ड भ्रमणबाट फर्केपछि देउवा प्रधानमन्त्री ओलीलाई भेट्न बालुवाटार पुगेका थिए । उक्त भेटमा सरकार परिवर्तनबारे चलेका पछिल्ला चर्चा, गभर्नर नियुक्ति, शिक्षक आन्दोलनका विषयमा कुराकानी भएको बालुवाटार स्रोतले जनायो ।गभर्नर नियुक्तिमा ढिलाइ भएको भन्दै कांग्रेसका नेतहरुले असन्तुष्टि जनाउँदै आएका थिए । कांग्रेसको प्रमुख असन्तुष्टि भनेको गभर्नर आफूनिकटकालाई बनाउनुपर्छ भन्ने हो ।
यसकारण पनि कांग्रेस महामन्त्री गगन थापाले यो प्रकरणमा बिचौलियाले प्रधानमन्त्रीको बेडसम्मै पहुँच बनाइसकेको आरोप लगाएका थिए । देउवासँग भेटेपछि प्रधानमन्त्री ओलीले यसको प्रमाण देखाउन चुनौती दिएका छन् । ‘प्रधानमन्त्रीको बेडरुमसम्मै विचौलियाको पहुँच पुग्या छ रे... दया लाग्छ तिनको त्यस्ता शब्द सुन्दा, के बोलेको त्यो ? त्यस्ता कुराहरु प्रमाणित गर्न सक्छन् तिनले ?,’ ओलीले चुनौती दिए ।
यसैबीच नेपाल राष्ट्र बैंकले आइतबार गभर्नरविनै ७०औं वार्षिकोत्सव मनायो । चैत २४ गतेयता राष्ट्र बैंकको नेतृत्व खाली छ । सत्तारुढ दल नेपाली कांग्रेस र नेकपा एमालेबीच कसरलाई गभर्नर बनाउने भन्ने विषयमा सहमति हुन नसक्दा नेतृत्वविनै राष्ट्र बैंकले वार्षिकोत्सव मनाएको हो ।
सिफारिस समिति सदस्यको खोजी
चैत ११ गतेको मन्त्रिपरिषद्ले उपप्रधान एवं अर्थमन्त्री पौडेलको नेतृत्वमा तीन सदस्यीय गभर्नर सिफारिस समिति गठन गरेको थियो । उक्त समितिमा पूर्वगभर्नर विजयनाथ भट्टराई र योजना आयोगका पूर्वउपाध्यक्ष विश्व पौडेल रहेकोमा भट्टराईले एक साताअघि मात्र राजीनामा दिए ।
सिफारिस समितिको बैठक नै नबसी गभर्नर नियुक्त गर्न लागेकोमा असन्तुष्टि जनाउँदै भट्टराईले राजीनामा दिएका हुन् । योसँगै नयाँ गभर्नर सिफारिस समितिमा एक सदस्य रिक्त रहेको छ ।देउवा र ओलीबीच शनिबार सिफारिस समितिमा केही पूर्वगभर्नरहरुलाई नियुक्त गरेर गभर्नर नियुक्तिका लागि अन्तिम नाम सार्वजनिक गर्ने तयारीको विषयमा पनि छलफल भएको अर्थले जनाएको छ ।
उक्त पदमा पूर्वगभर्नर डा. तिलक रावल वा डा. चिरञ्जीवी नेपालमध्ये एक जनालाई ल्याउने तयारी भइरहेको छ । प्रस्तावित दुवै नेपाली कांग्रेसनिकट हुन् ।
सरकार नढल्नेमा ढुक्क ओली
गभर्नर नियुक्ति प्रकरणकै कारण धरमरमा परेको ओली गभर्नर पद कांग्रेसलाई सुम्पिएपछि ढुक्क सुनिएका छन् । मदन भण्डारी फाउन्डेसनको चौथो राष्ट्रिय सम्मेलन उद्घाटनका क्रममा आइतबार उनले यस्तो बताएका हुन् ।
‘एउटा कम्युनिस्ट आन्दोलन ध्वस्त पार्न हाम्राविरुद्ध विभिन्न प्रकारका लाञ्छना र आरोप लगाउने । अर्को ढल्यो, ढल्यो, ढल्यो सरकार ढल्यो । अहिले ढल्यो, भरे ढल्यो भन्ने,’ प्रधानमन्त्री ओलीले भने, ‘शेरबहादुरजी फर्कनेबित्तिकै ढल्यो । शेरबहादुरजीले चिसो पानी टाउकाबाट खन्याएपछि फेरि छक्क परेका छन् ।’
अहिले एमाले र नेपाली कांग्रेसको सहभागितामा सरकार बन्नु समयको आवश्यकता भएको तर्क गर्दै ओलीले स्थिरता, विकास र सुशासनले गति लिन थालेको दाबी गरे । ‘झूटा कुराको सहायतामा यस्तो विरोध गरिएको छ कि मानौं, सरकारले केही गरेको छैन । हामीले देश बर्बाद बनाइरहेका छौं, हामीले कुनै अपराध गरिरहेका छौं,’ प्रधानमन्त्री ओलीले भने, ‘आजकल नीलो रंगका स्यालहरु निकै हाउभाउ गरिरहेका छन् ।
तिनीहरुको वास्तविक रुप लामो समय टिक्ने छैन । एमाले आफूलाई आगामी निर्वाचनमार्फत निर्णायक राष्ट्रिय शक्तिमा विकसित हुने लक्ष्यमा छौं । हामी हाम्रा सही विचार, इमान र सत्यको राजनीतिबाट स्थापित हुन्छौं ।’
भट्टको राजीनामा स्वीकृत गर्न निर्देशन
उपप्रधान तथा अर्थमन्त्री विष्णु पौडेलले कायममुकायम गभर्नर नीलम ढुंगानालाई डाकेर डा. गुणाकर भट्टको राजीनामा स्वीकृत गर्न निर्देशन दिएका छन् । आइतबार अर्थमन्त्री पौडेलले कार्यकारी निर्देशक पदबाट राजीनामा दिएका भट्टको राजीनामा स्वीकृत गर्न निर्देशन दिएको अर्थ मन्त्रालय स्रोतले जनायो ।
भट्टले यसअघि नै कार्यकारी निर्देशक पदबाट राजीनामा दिएका थिए । उनको राजीनामा विचाराधीन रहेको छ । यता अर्का प्रत्यासी राष्ट्र बैंकका नीति अनुसन्धान प्रतिष्ठानका कार्यकारी निर्देशक प्रकाश श्रेष्ठको राजीनामा भने अस्वीकृत भइसकेको छ । श्रेष्ठ एमालेनिकट प्रत्यासी हुन् ।
यद्यपि गभर्नरमा उनको नाम चर्चामा आएको भन्दै राजीनामा रोकिएको थियो । शनिबार देउवा र ओलीबीचको भेटमा अर्थमन्त्री पौडेल र गृहमन्त्री रमेश लेखक पनि सहभागी थिए । छलफलमा गभर्नर भट्टलाई बनाउने विषयमा सहमतिनजिक पुगेको बालुवाटार स्रोतको दाबी छ ।
