- देउवाले सरकार ढल्दैन भन्दा ओली विश्वस्त
- माओवादी अध्यक्ष दाहाल सरकार ढल्ने भनाइ दोहो¥याइरहँदा र कांग्रेसकै नेताहरूले सरकारको आलोचना गर्दा ओली आत्तिएका थिए
- सरकार ढल्छ भन्ने नेताहरु फत्रक्क परेको ओलीको टिप्पणी
- विद्यालय शिक्षा र संघीय निजामती विधेयक छिटो निष्कर्षमा पु¥याउन पहल गर्ने एमाले संसदीय दलको निर्णय
काठमाडौं– नेकपा माओवादी केन्द्रका अध्यक्ष पुष्पकमल दाहालले नयाँ वर्षको दिन र त्यसपछि लगातार नयाँ सरकार बन्ने दाबी गरे । दाहालको दाबीलाई बल पुग्नेगरी कांग्रेसका उपसभापति पूर्णबहादुर खड्का, महामन्त्री गगन थापादेखि अन्य नेताहरूले पनि कांग्रेस समर्थित ओली सरकारको विकल्प खोज्ने आशयका अभिव्यक्ति दिए ।
दाहाल र कांग्रेसका असन्तुष्ट नेताहरूको अभिव्यक्तिले प्रधानमन्त्री केपी शर्मा ओली आत्तिएका थिए । तर, शुक्रबार कांग्रेस सभापति शेरबहादुर देउवा थाइल्याण्डको बैंककबाट फर्किएपछि त्रिभुवन अन्तर्राष्ट्रिय विमानस्थलमा पत्रकारहरूले सरकार ढल्छ ? भनेर प्रश्न सोध्दा देउवाले सरकार नढल्ने जवाफ दिए । देउवाको यो भनाइले प्रधानमन्त्री ओली ढुक्क देखिएका छन् । पार्टी संसदीय दलको बैठकमा शनिबार उनले सरकार नढल्ने देउवाको अभिव्यक्तिले दाहालसहितका विपक्षी नेताहरू फत्रक्क परेको टिप्पणी गरे । दाहाललाई लक्षित गर्दै उनले पुर्पुरोमा हात हालेर थचक्कै ढलेको कटाक्ष गरे ।
‘शेरबहादुरजीले हिजै (शुक्रबार) जवाफ दिनुभयो । त्यसपछि पुर्पुरोमा हात लगाएर विचराहरू थचक्क बसे । सरकार ढल्दैन भनेपछि थुचुक्कै हुँदा रहेछन्, पुर्पुरोमा हात लगाएर,’ उनले बैठकमा भने ।ओलीले देउवा थाइल्याण्ड भ्रमणबाट फर्कनुअघि सरकार ढल्ने भन्दै निकै हल्ला भएको उल्लेख गर्दै त्यसको प्रतिवाद गरे । ‘हिजोसम्म आगै बाल्न खोजेका थिए । शेरबहादुरजी फर्केर आउँदा एयरपोर्टबाटै सरकार ढल्छ कि जस्तो पारेका थिए । सरकार ढल्छ कि ढल्दैन भन्ने कुरामा नलाग्नूस्, त्यसको जिम्मा हामीलाई छाडिदिनूस्,’ उनले सांसदहरूलाई भने, ‘आफ्नो काममा लाग्नूस् भनेको त प्रधानमन्त्रीले आश मारिसके छन् भनेर अर्को भाषा प्रयोग गरियो ।’
कांग्रेसका संस्थापन र इतरपक्षीय नेताहरू ओली सरकारको कामप्रति सन्तुष्ट छैनन् । दुईतिहाइ बहुमतवाला सरकारको यस्तो तालले जनतामा आशा जगाउन नसक्ने उनीहरूको ठहर छ । काम गर्न नसकेका मन्त्रीलाई फेर्न पनि उनीहरूले सुझाउने गरेका छन् । यस्तोमा ओलीले भने दबाब महसुस गरेको देखिएको छ । उनले बुधबार काठमाडौंमा आयोजित एक कार्यक्रममा उनीहरूलाई लक्षित गर्दै देउवा प्रधानमन्त्री बनाउन पनि प्रतिक्षा गर्न आग्रह गरेका थिए । उनले अबको १५ महिना पर्खिन आग्रह गरेका छन् । प्रधानमन्त्री ओलीको यो हतास मानसिकता मिश्रित अभिव्यक्ति थियो । तर, देउवाले सरकार ढल्दैन भनेपछि ओली विश्वस्त देखिएका छन् ।
शिक्षा र निजामती विधेयकबारे एमालेको निर्णय
नेकपा एमालेले विद्यालय शिक्षा र संघीय निजामतीलगायतका विधेयक छिटोभन्दा छिटो निष्कर्षमा पु¥याउन पहल गर्ने भएको छ । शिक्षकहरू आन्दोलनमा रहेको र निजामती कर्मचारीहरूले आन्दोलन गर्ने चेतावनी दिएपछि एमाले संसदीय दलको बैठकले यस्तो निर्णय गरेको हो ।
हाल शिक्षा विधेयकमाथि संसद्को शिक्षा, स्वास्थ्य तथा सूचना प्रविधि समितिमा दफावार छलफल जारी छ । संघीय निजामती विधेयक पनि दफावार छलफलमै छ ।संविधान जारी भएपछिको तीन वर्षमा आवश्यक ऐन बनाउनुपर्ने संवैधानिक प्रावधान छ । तर, संविधान जारी भएको १० वर्ष हुन लाग्दासम्म शिक्षा र निजामतीलगायत ऐन जारी नहुँदा सरोकारवाला पक्षहरू आन्दोलित हुने स्थितिबीच एमालेले ती विधेयकहरूलाई निष्कर्षमा पु¥याउने पहल गर्ने निर्णय गरेको हो ।
एमालेका मुख्य सचेतक महेश बर्तौलाले भने, ‘संसद्मा छलफलमा रहेको विद्यालय शिक्षा विधेयक, संघीय निजामती विधेयकलगायत र अन्य विचाराधीन विधेयकहरूलाई गुणस्तरीय कानुन बनाउनेगरी छिटोभन्दा छिटो निष्कर्षमा पु¥याउन नेकपा एमाले संसदीय दल र सदस्यहरूले प्रभावकारी पहलकदमी लिने निर्णय भयो ।’
बैठकले संसदीय काम र जिम्मेवारीलाई मुख्य प्राथमिकतामा राखी कुशलता र सक्रियताका साथ सम्पादन गर्न संसदीय दलको नेता तथा प्रधानमन्त्रीबाट दलका सम्पूर्ण सदस्यहरूलाई निर्देशन भएको पनि बर्तौलाले बताए ।
