काठमाडौं– विश्वभर महामारीको रूपमा फैलिएको कोरोना भाइरस (कोभिड–१९)को संक्रमण रोकथाम तथा नियन्त्रणका लागि काठमाडौं महानगरपालिकाले १० करोड रूपैयाँको ‘आकस्मिक कोष’ स्थापना गर्ने भएको छ । बिहीबार बसेको कार्यपालिकाको विशेष बैठकले यस्तो निर्णय गरेको हो ।
बैठकमा कामपाका प्रमुख विद्यासुन्दर शाक्यले उक्त कोषबाट भाइरस रोकथाम तथा नियन्त्रणका लागि तत्काललाई साना, मझौला र ठूला वडामा क्रमशः दुई लाख, तीन लाख र चार लाखका दरले निकाशा पठाउने निर्णय गरेको जानकारी दिए ।
उनले कोरना भाइरस रोकथाम तथा नियन्त्रण एवं डेंगू रोग नियन्त्रणका लागि नेपाली तथा नेपाल भाषामा पर्चा, पम्पेल्ट, ब्यानरजस्ता प्रचार सामग्री निर्माण एवं वितरण गर्ने निर्णय समेत भएको बताए ।
नगरप्रमुख प्रमुख शाक्यले भने, ‘विभिन्न स्थानमा स्वास्थ्यजनशक्ति, स्वास्थ्य सामग्री, प्रचार सामग्रीसहितको हेल्प डेक्स स्थापना तथा सञ्चालन गरिनेछ भने महानगरपालिकास्थित मठ, मन्दिर, मस्जिद, गुम्बाजस्ता धार्मिक, सामाजिक सम्पदा क्षेत्रमा भीडभाड नगर्न सर्वसाधारणलाई अनुरोध गर्ने निर्णय पनि बैठकले गरेको छ ।’
विश्वलाई आक्रान्त बनाइरहेको कारोना भाइरस रोकथाम तथा नियन्त्रणसम्बन्धी कार्य प्रभावकारी ढंगले सञ्चालन गर्न कामपा जनस्वास्थ्य महाशाखाअन्तर्गत ‘फोकल प्वाइन्ट’को रूपमा २४सै घण्टा हेल्प डेक्स सञ्चालन गर्ने पनि जानकारी दिए ।
साथै बैठकले स्तरीय विपद् व्यवस्थापन समितिलाई क्रियाशील बनाउनेजस्ता निर्णय पनि गरेको छ । संघीय सरकारले गरेको निर्णय कार्यान्वयन गर्न÷गराउन सम्बन्धित विभाग÷महाशाखा÷शाखालाई निर्देशन गर्ने, उपप्रमुखको नेतृत्वमा रहेको अनुगमन समितिलाई कालोबजारी नियन्त्रणका लागि प्रभावकारी ढंगले परिचालन गर्ने जनाइएको छ ।
यसैबीच स्वास्थ्य तथा जनसंख्यामन्त्री भानुभक्त ढकालले ‘कोभिड १९’को रोकथामको प्रयास साझा रहेको भन्दै यसका लागि सहयोग गर्न सबैलाई आग्रह गरेका छन् । बिहीबार मन्त्रालय र प्रेस काउन्सिल नेपालले संयुक्त रूपमा आयोजना गरेको कोरोना भाइरस संक्रमण र मिडियाको भूमिका विषयक छलफलमा मन्त्री ढकालले महामारी नियन्त्रण एक्लैको प्रयासले नहुने भन्दै सबैको सहयोग आवश्यक हुने बताएका हुन् ।
