एसइई परीक्षा स्थगित, संक्रमण फैलिएका मुलुकबाट प्रवेशमा प्रतिबन्ध, २५ जनाभन्दा बढी भेला हुन नपाइने
काठमाडौं– कोरोना भाइरस (कोभिड–१९) को संक्रमण विश्वव्यापी फैलिँदो छ । चीनको वुहानबाट सुरु भएको यो संक्रमणबाट नेपालसमेत खतरामा रहेको विश्व स्वास्थ्य संगठन (डब्लुएचओ)ले जनाइसकेको छ । त्यसैले सरकारले कोरोना भाइरस संक्रमण रोकथाम तथा नियन्त्रणमा उच्च सर्तकता अपनाउँदै आएको छ ।
कोरोना भाइरस संक्रमण रोकथाम गर्न विश्वका विभिन्न मुलुकले आफ्नो देश ‘लक डाउन’ अभियान सुरु गरेका छन् । यसैक्रममा नेपाल सरकारले पनि कोरोना भाइरस रोकथाममा सावधानी अपनाउदै अर्ध ‘लक डाउन’ गरेको छ । यसलाई ‘लक डाउन’को पूर्वअभ्यासको रूपमा लिइएको छ ।
एइई परीक्षा स्थगित
उपप्रधानमन्त्री तथा रक्षामन्त्री ईश्वर पोखरेलको संयोजकत्वमा गठित कोरोना संक्रमण रोकथाम तथा नियन्त्रण उच्चस्तरीय समन्वय समितिको बैठकले स्कुल, कलेज, सिनेमा हल बन्द गर्नेदेखि लिएर उडानमार्फत हुने आगमनमा समेत प्रतिबन्ध लगाउने निर्णय गरेको छ । साथै, बिहीबारदेखि सुरु हुन लागेको माध्यमिक शिक्षा परीक्षा (एसइई)समेत स्थगित गर्ने निर्णय गरेको छ ।
एसइई परीक्षाको सम्पूर्ण तयारी भइसकेको अवस्थामा पूर्वसन्ध्यामा सरकारले परीक्षा रोक्ने निर्णय गरेको हो । पहिलोपटक यस वर्षदेखि एसइईमा प्रदेशअनुसार फरक–फरक प्रश्नपत्र छापिएको थियो । ६ चैतदेखि तोकिएको परीक्षा अर्को निर्णय नभएसम्मका स्थगित भएको हो । एसइई परीक्षाका लागि देशभर १९९५ केन्द्र तोकिएको थियो ।
संक्रमण फैलिएका मुलुकबाट प्रवेशमा प्रतिबन्ध
यस्तै, सरकारले कोरोना भाइरसको रोकथाम र नियन्त्रणका लागि युरोपेली, पश्चिम एसियाली, खाडी क्षेत्रका मुलुक, इरान, टर्की, मलेसिया, दक्षिण कोरिया र जापानका नागरिकलाई नेपाल प्रवेशमा प्रतिबन्ध लगाएको छ ।
कोरोना भाइरसको संक्रमण विश्वव्यापी भएपछि सरकारले त्यसको रोकथामका लागि यस्तो निर्णय लिएको हो । सरकारले कोरोना भाइरसको संक्रमण फैलिएका सबै मुलुकका नागरिकलाई नेपाल प्रवेशमा प्रतिबन्ध लगाएको छ ।
कोरोना भाइरसको संक्रमण, रोकथाम तथा नियन्त्रण उच्चस्तरीय समन्वय समितिको बुधबार बसेको बैठकले ३ बैशाखसम्म संक्रमण फैलिएका मुलुकका नागरिकलाई नेपाल प्रवेश गर्न प्रतिबन्ध लगाएको छ । सरकारले प्रतिबन्ध लगाएकाबाहेक विदेशी नागरिकले नेपाल प्रवेश गर्न खोजे उनीहरूले एक साताअघिको स्वास्थ्य प्रमाणपत्र अनिवार्य रूपमा बुझाउनु पर्नेछ ।
कोरोना भाइरसबाट चीनपछि युरोपेली मुलुकमा सबैभन्दा बढी इटाली प्रभावित भएको छ । विश्व स्वास्थ्य संगठनले विश्वका जुनसुकै मुलुकममा जतिबेला पनि कोरोना संक्रमण फैलिन सक्ने भन्दै सावधानी अपनाउन अपिल गरेको छ ।
२५ जनाभन्दा बढी भेला हुन नपाइने
यस्तै, सरकारले कोरोना फैलिन नदिन अत्यावश्यक कामबाहेक आवत–जावत गर्न रोक लगाएको छ । बैठकको निर्णयअनुसार अब सार्वजनिकस्थलमा २५ जनाभन्दा बढी मानिस भेला नपाइने भएको छ । ‘सांस्कृतिक, सामाजिक र त्यस्तै कार्यमा पार्टी प्यालेस, मठमन्दिर, गुम्बा, मस्जिद, चर्चजस्ता धार्मिक र सार्वजनिकस्थलमा २५ जनाभन्दा बढी मानिस भेला हुन बन्द हुनेछ’ विज्ञप्तिमा भनिएको छ ।
यस्तै, चैत मसान्तसम्म सबै विद्यालय र कलेज बन्द गर्ने निर्णय गरेको छ । बैठकपछि सार्वजनिक विज्ञप्तिमा भनिएको छ, ‘बाल विकास केन्द्र, आधारभूत तथा माध्यमिक विद्यालयहरू र विश्वविद्यालयहरूमा पठनपाठन २०७६ चैत मसान्तसम्मका लागि बन्द गर्ने ।’
प्रधानमन्त्री तथा मन्त्रिपरिषद्को कार्यालय सिंहदरबारमा बसेको बैठकमले कारोनाको विषयमा भ्रम फैलाउने र सामान लुकाउनेलाई कारबाही गर्नेलगायत विभिन्न १५ बुँदे निर्णय गरेको छ ।
सार्वजनिक सवारीमा सिट क्षमताभन्दा बढी यात्रु ओसारपसार नगर्न अनुरोध गर्दै यसको अनुगमनको जिम्मा नेपाल प्रहरीलाई दिइएको छ । यातायातका साधन चलाउनुअघि प्रत्येक दिन समय–समयमा सवारीसाधनलाई किटाणु निर्मलीकरण गर्न लगाउने सरकारको निर्णयमा उल्लेख छ । यसको अनुगमन यातायात व्यवस्था विभाग र प्रहरीले गर्नेछ । साथै, कोरोना भाइरसबारे कुनै पनि सञ्चारमाध्यम तथा सामाजिक सञ्जाललाई विद्यमान कानुनअनुसार कारबाही गरिने भएको छ ।
