- मुगु कर्णाली र किमाथांका जलविद्युत् आयोजनाको ठेक्का प्रक्रियामा भएका अनियमितताबारे उजुरी परेपछि छलफलका लागि समितिले बैठक बोलाएको थियो
- २५ सदस्यीय समितिमा गणपूरक संख्या पु¥याउन १४ जना सांसद चाहिन्छ तर बुधबारको बैठकमा जम्मा १२ जना सांसदमात्रै उपस्थित भए
- तर कांग्रेसमात्र नभएर प्रतिपक्षी दल माओवादी केन्द्र र राष्ट्रिय स्वतन्त्र पार्टीकै सांसदहरुको
काठमाडौं– ऊर्जामन्त्री दीपक खड्काविरुद्ध परेको उजुरीबारे छलफलका लागि बुधबार बोलाइएको संसदीय समिति बैठक कांग्रेस सांसदहरुले ‘बंक’ गरेका छन् । पूर्वाधार विकास समितिले ऊर्जामन्त्रीविरुद्ध परेको उजुरीबारे छलफल गर्न बुधबार बिहान साढे ११ बैठक बोलाएको थियो ।तर मन्त्री आउँदा पनि
कांग्रेसका अधिकांश सांसद भने आइपुगेनन् । आएका सांसद पनि हाजिर गर्दै बाहिरिए । समिति सभापति दीपकबहादुर सिंहका अनुसार बैठक सञ्चालनका लागि दुई जना सांसद नपुगेपछि बैठक नै स्थगित गरिएको हो । कूल २५ सदस्यीय समितिमा गणपूरक संख्या पु¥याउन १४ जना सांसद चाहिन्छ । तर, बुधबारको बैठकमा जम्मा १२ जनामात्रै उपस्थित भए ।
बैठकमा ऊर्जामन्त्री खड्का र राज्यमन्त्री पूर्णबहादुर तामाङ आमन्त्रित थिए । मुगु कर्णाली र किमाथांका जलविद्युत् आयोजनाको ठेक्का प्रक्रियामा भएका अनियमितताबारे उजुरी परेपछि छलफलका लागि समितिले बैठक बोलाएको थियो । ऊर्जामन्त्री खड्का र राज्यमन्त्री तामाङ भने बोलाएकै समयमा उपस्थित भएका थिए । तर, कांग्रेसमात्र नभएर प्रतिपक्षी दल नेकपा माओवादी केन्द्र र राष्ट्रिय स्वतन्त्र पार्टीकै सांसदहरुको उल्लेख्य उपस्थिति नभएपछि बैठक स्थगित भएको बताइन्छ ।
नेपाली कांग्रेसबाट आठ, नेकपा एमालेबाट सात, नेकपा माओवादी केन्द्रबाट तीन, राप्रपाबाट दुई, रास्वपाबाट दुई, नेकपा एकीकृत समाजवादी पार्टीबाट एक, नागरिक उन्मुक्ति पार्टीबाट एक र जनता समाजवादी पार्टीबाट एक जना गरी यो समितिमा २५ जना सदस्य छन् । बैठकमा नेपाली कांग्रेसका राजेन्द्र बजगाईं र कल्पना चौधरी भने पुगेका थिए । अरु सांसद नआइपुग्ने देखिएपछि उनीहरू हाजिर गरेर हिँडे ।
कांग्रेसका अन्य सांसदहरू खमबहादुर गर्बुजा, दिनेशकुमार यादव, प्रतिमा गौतम, मैना कार्की, शंकर भण्डारी, सीता गुरुङ बैठकमै पुगेनन् । प्रतिमा गौतम बुधबार नै सिन्धुली हिँडेकी थिइन् ।
शंकर भण्डारीले भने आफू जिल्लाबाहिर हुने भएकाले बैठकको समय परिवर्तन गर्न आग्रह गरेका थिए । त्यसैगरी कांग्रेसले बुधबारबाट सुरु गरेको नेपाल स्टार्ट अप र साना तथा मझौला व्यवसाय कार्यक्रममा सहभागी हुन पुग्दा बाँकी सांसद पनि आइपुगेनन् । सभापति सिंहका अनुसार सहिद दिवस पनि कांग्रेस सांसदहरु बैठकमा आइनपुग्नुको कारण बन्यो ।
यद्यपि अरु पार्टीका सांसदहरुको संख्या पनि कम थियो । बैठकमा नेकपा माओवादी केन्द्रबाट एक, नेपाली कांग्रेसबाट दुई, नेकपा एमालेबाट पाँच, राप्रपाबाट दुई, जसपाबाट एक जना सहभागी हुन पुगेका थिए ।नेकपा एमालेबाट ठाकुर गैरे, गोकर्ण विष्ट, प्रेमराज महर्जन, दयालबहादुर शाही र निर्मल कोइराला बैठकमा सहभागी हुन पुगेका थिए । माओवादी केन्द्रबाट माधव सापकोटामात्रै पुगेका थिए ।
राप्रपाबाट समितिमा प्रतिनिधित्व गर्ने दुईजना दीपकबहादुर सिंह र बिना लामा नै उपस्थित थिए । रास्वपाबाट प्रतिनिधित्व गर्ने दुई सांसद निशा डाँगी र शिव नेपाली दुवै उपस्थित भएनन् । एकीकृत समाजवादीबाट प्रतिनिधित्व गर्ने सांसद प्रकाश ज्वाला पनि बैठकमा पुगेनन् । स्थगित भएसँगै अब अर्को बैठक आगामी २४ गते बिहान ८ बजेका लागि बोलाइएको छ ।
