चौतारा- कांग्रेसनिकट नेपाल भूतपूर्व सैनिक संघ, सिन्धुपाल्चोकको अध्यक्षमा कुलबहादुर राउत चयन भएका छन् । शनिबार भएको प्रथम अधिवेशनले राउतको नेतृत्वमा कार्यसमिति चयन गरेको हो ।
अधिवेशनले सचिवमा ज्ञानेन्द्र सिग्देल, कोषाध्यक्षमा जलप्रसाद लम्साल चयन गरेको छ । यसै गरी रमेश राउत, कृष्ण अधिकारी, प्रकाश तामाङ, डिल्लीप्रसाद भट्टराई, सुदर्शन कार्की, कृष्ण तामाङ, खिलबहादुर तामाङ, गणेशबहादुर तामाङ, केदार चालिसे, श्रीध्वज लामा, होमबहादुर कार्की र सागर तामाङ सदस्यमा निर्वाचित भएको निर्वाचन अधिकृत तुलसीप्रसाद दङ्गलले बताए ।
त्यस्तै बागमती प्रदेश प्रतिनिधिमा बुद्धिबहादुर तामाङ, शेरबहादुर तामाङ, फटकबहादुर कार्की, रमेश राउत, प्रकाश तामाङ र लिलाबहादुर तामाङ चुनिए । संघीय प्रतिनिधितर्फ भने मनिलोचन न्यौपाने, भुपेन्द्र थापा, बोधविक्रम पण्डित, गोपाल जिरेल, श्रीध्वज लामा चयन भएका छन् ।
कार्यक्रममा बागमती कांग्रेसका सहमहामन्त्री हरिशरण श्रेष्ठले निवृत्त भएर बसेका भूतपूर्व सैनिकहरुलाई संगठित गर्न सकेमा पार्टीको संगठन बढ्ने र बलियो हुने बताए । श्रेष्ठले सिन्धुपाल्चोकमा केन्द्रले सर्कुलर गरेको कार्यक्रम गर्न नसकेकोमा दुख व्यक्त गरे । सहमहामन्त्री श्रेष्ठले जिल्लाका नेताहरू लाई एक आपसमा रचनात्मक सहयोग गरि अघि बढ्न अनुरोध गरे।
यता भूतपूर्व सैनिक संघका विभागीय सदस्य एवम् लमजुङका पूर्व जिल्ला सभापति गर्जबहादुर गुरुङले पार्टीको विपि अध्ययन केन्द्र ऐतिहासिक बनेको देख्दा आफूलाई साह्रै खुशी लागेको बताए । भूतपूर्व सैनिक संघ सेनाहरुको साझा चौतारी भएको उनले बताए ।
यता जिल्ला सभापति जंगबहादुर लामाले पार्टीको भवन बन्दा पनि भातृ संस्थाले आफ्नो कार्यालयमा साइन बोर्ड झुन्डाउन नमानेकोमा आपत्ति जनाए । सैनिक संघसंग जति खेर पनि सहयोग समन्वय गरि जाने प्रतिबद्दता जनाउदै लामाले सैनिक साथीहरूको सक्रियता अनुसार पार्टीमा उचित स्थान दिने वचन बताए ।
सैनिक साथीहरूलाई भोट र नोट हैन जिम्मेवारी दिएर अघि बढाउन पनि उनले अनुरोध गरे ।
कांग्रेस महासमिति सदस्य एवं गाउँपालिका महासंघका पूर्वमहासचिव बंशलाल तामाङले भुपु सैनिक संघले आफ्नो अधिवेशन समयमै गरेकोमा खुसी व्यक्त गरे । भुपु सैनिकहरुले जीवनको अत्यन्तै उर्वरा समय देश र जनतामा खर्चिएको र बाँकी समय लोकतन्त्रको पक्षमा समय दिनु प्रशंसनीय कार्य भएको तामाङको भनाई थियो ।
त्यस्तै महासमिति सदस्य शिव सुनारले सैनिक संघ विधिवत रुपमा अघि बढ्नेमा आफू विश्वस्त रहेको बताए । देश र जनताको लागि जीवन को अमुल्य रगत र पसिना बगाएकोमा सैनिकलाई उच्च सम्मान व्यक्त गर्दै चेन अफ कमान्ड सम्हालेका सैनिक साथीहरुले पार्टीलाई मार्गनिर्देशन र घचघचाई पार्टीलाई सहि दिशामा दोहोराउन मद्दत पुग्ने बताए।
कांग्रेस जिल्ला सचिवसमेत रहेका त्रिपुरा सुन्दरी गाउँपालिकाका अध्यक्ष भक्तध्वज बोहोराले प्रथम अधिवेशनबाट भावनात्मक एकताको सन्देश दिने प्रयास गरेको बताउँदै सैनिकहरु लामो समय सम्म अनुशासनमा बसेर चेन अफ कमाण्ड सम्हालेकाले पार्टीलाई पनि अनुशासनमा बस्न सिकाउनु पर्ने बताए ।
पूर्व जिल्ला सचिव एवम् महाधिवेशन प्रतिनिधि बिलबहादुर तामाङले पार्टीमा भुपु सैनिक साथीहरुको महत्त्वपूर्ण भूमिका रहने बताए । अधिवेशनकै अवसरमा क्षेत्र नम्बर १ सभापति बालकृष्ण बस्नेतलाई जिल्ला सभापति जंगबहादुर लामाले नयाँ तथा पुरानो कृयाशिल सदस्य फारम पनि बुझाएका थिए ।
इन्द्रावती गाउँपालिका भूतपूर्व सैनिक संघका अध्यक्ष लिलाबहादुर तामाङले स्वागत मन्तव्य राखेको कार्यक्रम मणिलोचन न्यौपानेको सभापतित्वमा सम्पन्न भएको थियो ।
