वि.सं. २०८४ मा आमनिर्वाचन हुने छ । त्यसको दुई वर्ष पहिले नै महाधिवेशन हुनुपर्ने हो । होइन भने निर्वाचनपछि गराउँदा उत्तम हुन्छ ।
डा. शशांक कोइराला
पूर्वमहामन्त्री, नेपाली कांग्रेस
काठमाडौं– प्रमुख राजनीतिक दल नेपाली कांग्रेसले मंगलबार देशभर मेलमिलाप दिवस मनायो । आठवटा मृत्युदण्डका मुद्दा अदालतमा चलिरहेका बेला बिपी कोइराला मेलमिलापको नीति लिई २०३३ पुस १६ गते भारतबाट नेपाल फर्केका थिए । सोही दिनको सम्झनामा कांग्रेसले हरेक वर्ष मेलमिलाप दिवस मनाउँदै आएकोमा सदाझैं यसपटक पनि नेताहरुले एकअर्काविरुद्ध रोष पोखेका छन् । यतिबेला नेपाली कांग्रेसका नेताहरु १५औं महाधिवेशनको वार्मअपमा लागेका छन् । यस सन्दर्भमा भावी सभापतिका दाबेदार मानिएका नेताहरुले फरक–फरक मत राखेका हुन् ।
मेलमिलाप दिवसको अवसरमा चितवन पुगेका पूर्वमहामन्त्री डा. शशांक कोइरालाले कांग्रेसको महाधिवेशन २०८४ पछिमात्र गर्दा पनि हुने धारणा राखे जबकि अहिलेका महामन्त्री गगन थापाले भने तोकिएकै समयमा महाधिवेशन हुने दाबी गरे । ‘वि.सं. २०८४ मा आमनिर्वाचन हुने छ । त्यसको दुई वर्ष पहिले नै महाधिवेशन हुनुपर्ने हो । होइन भने निर्वाचनपछि गराउँदा उत्तम हुन्छ,’ कोइरालाले भने ।
१५औं महाधिवेशन हुन्छ, रूवाबासी नगरौं । प्रतिबन्धित कालमा त सम्हालिएर आएको पार्टीले आनन्दसँग समयमै महाधिवेशन गर्छ ।
गगन थापा
महामन्त्री, नेपाली कांग्रेस
निर्धारित समयमा अधिवेशन गराउँदा पार्टीभित्रको असन्तुष्टि हराए पनि निर्वाचनको मुखमा महाधिवेशन गराउँदा पार्टीभित्रको तिक्तता छताछुल्ल हुने बताए । यता महामन्त्री थापाले भने महाधिवेशन हुन्छ कि हुँदैन भनेर रुवाबासी नगर्न आग्रह गरे । मकवानपुरको हेटौंडा पुगेका थापाले भने, ‘पार्टीका मञ्चहरूमा र केन्द्रीय समितिमा २०८४ को चुनाव र १५औं महाधिवेशनबारे कुरा गर्छौं, १५औं महाधिवेशन हुन्छ, रूवाबासी नगरौं । प्रतिबन्धितकालमा त सम्हालिएर आएको पार्टीले आनन्दसँग समयमै महाधिवेशन गर्छ ।’
महाधिवेशन पार्टीको नियमित प्रक्रिया भएको पनि उल्लेख गर्दै थापाले चुनावको चिन्ता अहिले नै गर्न नहुने तर्कसमेत गरे । ‘को नेतृत्वमा आउने कुरा समयमा सोचौंला,’ उनले भने, ‘अहिले २०८१ मा छौं, काम गर्ने हो २०८४ को चुनावको चिन्ता गर्ने होइन ।’
गगनमाथि शर्माको व्यंग्य
२०७९ को निर्वाचनपछि संसदीय दलको नेतामा भिडाउँदै गगनलाई भावी प्रधानमन्त्रीका रुपमा हेरेका महामन्त्री विश्वप्रकाश शर्माले उनीप्रति अविश्वास प्रकट गरे । ‘सभापतिजी विस्तारै रिटायर्ड हुने क्रममा हुनुहुन्छ, विधानअनुसार अब उहाँ महाधिवेशनमा प्रतिस्पर्धा गर्न पाउनुहुन्न, पाँचपटक त प्रधानमन्त्रीको भारी बोकिसक्नुभयो,’ पूर्वकर्मचारी समाज नेपालले मंगलबार काठमाडौंमा आयोजना गरेको कार्यक्रममा महामन्त्री शर्माले भने, ‘अब उहाँलाई कतिपटक प्रधानमन्त्रीको भारी बोकाउने ? अरूले बोक्न अघि सर्नुस् भनेर मैले भनेको छु । तर उहाँलाई काँध थाप्छु भन्नेहरू अलि नसुरिएकोजस्तो बुझ्छु ।’ गगनले पछिल्लोपटक देउवासँग निकटता बढाएका छन् ।
महामन्त्री शर्माले भने आफू मन्त्री पनि नबनेको र बन्ने इच्छासमेत नराखेको अवस्थामा अहिले नै पार्टी सभापति वा प्रधानमन्त्रीको दाबेदारका रूपमा नरहेको पनि बताए । ‘म मन्त्री पनि बनेको छैन बन्ने इच्छा पनि छैन, प्रधानमन्त्री र सभापति भविष्यमा कुनै दिन नेतृत्व गर्ने दिन आउला तर अहिले नै दाबेदार होइन,’ शर्माले गगनप्रति इंगित गर्दै भने, ‘पाँचचोटि प्रधानमन्त्री भएका सभापतिजीलाई गाह्रो भइसकेको होला, म भारी बोकिदिन्छु भनेर सुरिनेहरूको अभाव पार्टीभित्र देखिरहेको छु । दिएदेखि खाउँला भन्ने हुँदैन, म बन्छु प्रधानमन्त्री भनेर दृढतापूर्वक उभिन सक्नुपर्छ ।’
पाँचपटक प्रधानमन्त्री भएका सभापतिजीलाई गाह्रो भइसकेको होला, म भारी बोकिदिन्छु भनेर सुरिनेहरूको अभाव पार्टीभित्र देखिरहेको छु । दिएदेखि खाउँला भन्ने हुँदैन, म बन्छु प्रधानमन्त्री भनेर दृढतापूर्वक उभिन सक्नुपर्छ ।
विश्वप्रकाश शर्मा
महामन्त्री, नेपाली कांग्रेस
कांग्रेसका सभापति देउवाले भने सबै नेपालीबीच एकता र मेलमिलाप भएमात्र राष्ट्रिय उद्देश्य पूरा हुने बताए । राष्ट्रिय एकता तथा मेलमिलाप दिवसको अवसरमा मंगलबार बिहान सोह्रखुट्टेमा आयोजित कार्यक्रमलाई सम्बोधन गर्दै देउवाले भने, ‘पूर्वका होउन् वा पश्चिमका होउन्, विभिन्न चाहनाहरु होलान्, ती सबैलाई समन्वय गरेर, एकताको सूत्रमा बाँधेर राष्ट्रिय एकतालाई संसारमा नै स्थापित गर्न सक्छौं ।’
सरकारविरुद्ध असन्तुष्टि बढेको नेताहरुको भनाइ
नेपाली कांग्रेसका महामन्त्रीद्वय थापा र शर्माले सरकारविरुद्ध जनताको असन्तुष्टि बढ्न थालेको बताएका छन् । थापाले नेपाली जनता समस्याले उकुसमुकुस भएको भन्दै समाधानका लागि आफ्नो पार्टीले सम्बोधन गर्नुपर्ने बताए ।‘आजको दिनको नेपाली समाजको सबैभन्दा ठूलो समस्या भनेको प्रगतिको भोक छ, त्यसमा हामीले सोच्नुपर्ने छ,’ थापाले भने, ‘जनता छन्, उनीहरूसँग समस्या छन्, त्यसको समाधान कांग्रेसले पूरा गरिदियोस् भन्ने छ । पुराना कुरामा अड्किएर बस्ने होइन । नेपाली समाज उकुसमुकुस छ । त्यसलाई हामीले सम्बोधन गर्नुपर्ने छ ।’
यसैगरी अर्का महामन्त्री शर्माले सरकारको काम गराइप्रति असन्तुष्टि देखिएको बताए । ‘चोकबजारमा व्यापक असन्तुष्टि छ । सबै मान्छेमा केही न केही आक्रोश छ । सबैसँग प्रश्न छ, सबैलाई सबैसँग गुनासो छ,’ शर्माले भने । यस विषयमा आफूले गर्नुपर्ने कामको जिम्मेवारी बोध भने गराउनुपर्ने उनको भनाइ थियो ।
-1745656903.jpeg)